ჯანო ანანიძის პირველი დღე ახალ მწვრთნელთან: ან ახლა, ან აღარასოდეს!.. შედგება ქართული დერბი მოსკოვში?

პარასკევს დომენიკო ტედესკომ "სპარტაკის" ფეხბურთელებს პირველი სრულფასოვანი ვარჯიში ჩაუტარა. რა თქმა უნდა, ამ ფეხბურთელებს შორის იყო ჯანო ანანიძეც, რომელიც ორი სანაკრებო მატჩის შემდეგ დაუბრუნდა "სახალხო გუნდს".

პირდაპირ ვთქვათ - ჯანო ნამდვილად არ იყო საუკეთესო ირლანდიასა და გიბრალტართან მატჩებში. თუმცა ამაში მას პირდაპირი ბრალი არ მიუძღვის. ანანიძეს თითქმის არ ჰქონდა სათამაშო პრაქტიკა ოლეგ კონონოვის ხელში და ცხადი იყო, რომ ეს მის სანაკრებო გამოსვლებზეც აისახებოდა. სხვა საქმეა, რომ საქართველოს ნაკრების მწვრთნელი ვლადიმირ ვაისი მას ლამის თვალდახუჭული ენდობა...

ჯერჯერობით, არავინ იცის, რას ფიქრობს ტედესკო ანანიძეზე იმ უბრალო მიზეზის გამო, რომ ქართველს არ იცნობს. ეს კი ლოგიკურად ნიშნავს იმას, რომ ახლოს გასაცნობად ტედესკო მას შანსს მისცემს. მანამდე, ბევრი რამ იქნება დამოკიდებული იმაზეც, თუ როგორ წარმოაჩენს ჯანო თავს ვარჯიშებზე. მაგრამ შანსი რომ ექნება, ამაში თითქმის დარწმუნებულები ვართ.

სატრანსფერო ფანჯრის გახსნამდე ტედესკოს სრული წარმოდგენა ექნება როგორც ჯანოზე, ისე მთელ გუნდზე. ასე რომ, დრო არის. მერე ის საკუთარი გემოვნებით დაიწყებს გუნდის დაკომპლექტებას და სად იქნება ჯანოს მომავალი, ჯერჯერობით არავინ იცის.

არადა, ჩვენთვის ეს სასიცოცხლო საკითხია - სათამაშო პრაქტიკის მქონე და ფორმაში მყოფი ანანიძე ჰაერივით სჭირდება საქართველოს ნაკრებს, რომელსაც მარტში მისი არსებობის ისტორიაში უმნიშვნელოვანი თამაშები (იმედია, სწორედ "თამაშები") ელის.

ჯანო 27 წლისაა და კარიერაზე ჯვარს ვერ დაუსვამს - მან უნდა იბრძოლოს თავისი კარიერის გადასარჩენად და ასეთი დათქმაც გაუკეთოს საკუთარ თავს - თუ "სპარტაკში" საბოლოოდ დამკვიდრების ეს მცდელობაც წარუმატებელი გამოვა, თავისი გზა უნდა მონახოს - ან ახლა, ან აღარასოდეს! აფსუსია, კაცმა, ვისაც ჯერ ასაკიც უწყობს ხელს და ძალიან დიდი პოტენციალიც აქვს, "სპარტაკს" ანაცვალოს კარიერა...

შაბათს, 19 ოქტომბერს, ტედესკოს დებიუტი აქვს "რუბინთან" საშინაო მატჩში. თუ ჯანომაც ითამაშა (გიორგი ჯიქია დისკვალიფიცირებულია) და ყაზანელმა ქართველებმაც (ხვიჩა კვარაცხელიამ ტრავმა მიიღო 19-წლამდელთა ნაკრებში, ზურიკო დავითაშვილი და ბექა მიქელთაძე წესით მზად უნდა იყვნენ), ჩვენებურების დერბისაც ვნახავთ. მატჩი ჩვენი დროით 17:30 დაიწყება.

1508
მკითხველის კომენტარები / 0 /
მსგავსი ამბები
რუბრიკის სხვა სიახლეები
;