ჯაჭვური გადაადგილებები: ცხადაძე გაბალაში, სტოილოვი ყაზახეთის ნაკრებში...

მართლაც საინტერესო ამბავია. როგორც ამტკიცებენ, კახა ცხადაძემ, შესაძლოა, აზერბაიჯანული "გაბალა" ჩაიბაროს. ვერ ვიტყვით, რომ ეს აუცილებლად მოხდება, მაგრამ მოლაპარაკება იყო.

ცხადაძე ავტორიტეტული და კვალიფიციური მწვრთნელია და ამას აზერბაიჯანშიც აღიარებენ. 49 წლის სპეციალისტი საშუალო ბიუჯეტის მქონე ბაქოს "ინტერით" ლიდერებს ეჭიდავებოდა და გუნდი მუდმივად ევროტურნირზე გაჰყავდა. ის ამ გუნდში რომან გრიგორჩუკის ერთ-ერთ შემცვლელად მოიაზრება.

თუ ასე მოხდა და ცხადაძემ "გაბალა" ჩაიბარა, მაშინ ყაზახეთის ნაკრებში ცნობილი ბულგარელი სპეციალისტი სტანიმირ სტოილოვი დაინიშნება. ვიცით, რომ ამ პოსტზე ერთ-ერთი კანდიდატი ცხადაძეც გახლდათ.

მაგრამ საეჭვოა, საქართველოს ფეხბურთის ფედერაციაზე წყენის მიუხედავად, ცხადაძემ ჩაიბაროს ნაკრები, რომელიც ერთა ლიგაში საქართველოს ყველაზე სერიოზული კონკურენტია.

ყაზახეთის ნაკრებში დანიშვნას უწინასწარმეტყველებენ სლავენ ბილიჩსაც. 49 წლის ხორვატის აგენტმა ყაზახეთის ფეხბურთის ფედერაციასთან მოლაპარაკებები უკვე დაიწყო. მას 2-წლიან თანამშრომლობას სთავაზობენ.

მესამე და მთავარ კანდიდატურაზე კი ზემოთ ვთქვით - "ასტანას" დამრიგებელი სტოილოვი. ბულგარელი სპეციალისტი ორჯერ იყო თავისი ქვეყნის ეროვნული ნაკრების მთავარი მწვრთნელი.

ყაზახური გრანდი კი 2014 წელს ჩაიბარა და მას შემდეგ "ასტანამ" ზედიზედ ოთხჯერ მოიპოვა ჩემპიონის ტიტული. სტოილოვი პირველი მწვრთნელია, რომელმაც ყაზახური გუნდი ჩემპიონთა და ევროპალიგის ჯგუფურ ეტაპებზე გაიყვანა, ხოლო ევროპალიგის მიმდინარე გათამაშებაში პლეი ოფში მოხვდა.

ყაზახეთის ფეხბურთის ფედერაციაში აცხადებენ, რომ ნაკრების ახალი მწვრთნელის ვინაობა 10 თებერვლის შემდეგ გაირკვევა - ანუ, მას მერე, რაც ფეხბურთის ფედერაციის ყრილობაზე ახალ პრეზიდენტს აირჩევენ.

და ჯაჭვის ბოლო რგოლიც: ყაზახური ინტერნეტგამოცემა სპორტს.კზ-ის ცნობით, თუ სტოილოვი ყაზახეთის ნაკრებს ჩაიბარებს, მაშინ "ასტანაში" "გაბალას" ამჟამინდელი მთავარი მწვრთნელი რომან გრიგორჩუკი დაინიშნება - ცნობილი უკრაინელი სპეციალისტი, რომლის ხელმძღვანელობითაც "გაბალა" ევროპალიგის ჯგუფურ ეტაპზე პირველად მოხვდა.

ყოველდღიური სპორტული გაზეთი "ლელო"
1459
მკითხველის კომენტარები / 0 /
მსგავსი ამბები
რუბრიკის სხვა სიახლეები
;