ჯეიმი რედნაპი პრემიერლიგაზე - შეფასებები, ანალიზი, პროგნოზები და წლის გუნდი

პრემიერლიგა დასრულდა, მაგრამ ინგლისურ სეზონში კიდევ ერთი მატჩია სათამაშო - შაბათს, 19 მაისს, ასოციაციის თასის ფინალია, რომელშიც ერთმანეთს "მანჩესტერ იუნაიტედი" და "ჩელსი" შეხვდებიან.

შესაბამისად, ორივე გუნდისთვის ეს არის შანსი, "გადაარჩინონ" სეზონი - მოიგონ, თუნდაც ერთი ტიტული. მით უმეტეს, ეს ეხება "ჩელსის", რომელმაც არა მარტო დათმო ჩემპიონობა, ოთხეულშიც კი ვერ მოხვდა.

ვეჭვობთ, თასის მოგებამ ანტონიო კონტეს მომავალი შეცვალოს. ის, უდიდესი ალბათობით, დატოვებს "არისტოკრატებს" და კარიერას სხვა კლუბში გააგრძელებს.

რაც შეეხება "მანჩესტერს", ფაქტია მომავალი სეზონისთვის ჟოზე მოურინიოს სერიოზული ცვლილებების განხორციელება მოუწევს საიმისოდ, რათა "იუნაიტედმა" რეალურად შეძლოს ბრძოლა ჩემპიონობისთვის - შინაურ ფრონტზე, და ღირსეული შედეგის მიღწევა - ევროასპარეზზე...

ერთი სიტყვით, პრემიერლიგაში ამ ზაფხულს ბევრი რამ შეიცვლება და სწორედ ამ თემაზეა "დეილი მეილის" ექსპერტ ჯეიმი რედნაპის წერილი, რომელსაც ქვემოთ გთავაზობთ:

"შევთანხმდებთ, რომ "მანჩესტერ სიტი", დღევანდელი გადასახედიდან, კვლავაც შეუჩერებელი მოჩანს და აქედან გამომდინარე, "დიდი ექვსეულის" გუნდებს მოუწევთ, იფიქრონ რეალურ და არა - მოჩვენებით კონკურენციაზე...

"მანჩესტერ იუნაიტედი" მეორე ადგილზე გავიდა და შანსი აქვს, მოიგოს ასოციაციის თასი. მაგრამ ეს არ არის ის, რასაც ჟოზე მოურინიო სეზონის წინ გეგმავდა. ალბათ, არ შევცდები, თუ ვიტყვი, რომ ეს "იუნაიტედი" იყო ყველაზე მოსაწყენი მათ შორის, რაც კი მახსოვს და მინახავს.

ეს კიდევ ერთხელ გამოჩნდა სეზონის ბოლო მატჩში, რომელშიც მოურინიოს გუნდმა 1:0 მოუგო "უოტფორდს". ჩემპიონატის ფინიშს, სულ ცოტა, სხვანაირი ფეხბურთი მოუხდებოდა. "ოლდ ტრაფორდი" ასეთი თამაშის ღირსი არ არის...

თუ მოურინიოს სურს, რამე შეცვალოს, აუცილებლად უნდა იყიდოს გარეთ ბეილი. მან თავისი თავი ამოწურა მადრიდში და არ იქნება წინააღმდეგი, დაბრუნდეს პრემიერლიგაში, სადაც კიდევ ერთხელ დაამტკიცებს თავის კლასსა და ტალანტს, რის საშუალებაც ნაკლებად ჰქონდა "რეალში". ახალ გუნდთან ერთად, მას ექნება ახალი მოტივაცია - გამოიწვიოს "მანჩესტერ სიტი" ჩემპიონობისთვის ბრძოლაში.

ვიცი, რომ ედენ აზარს "რეალში" უნდა გადასვლა და "ჩელსი" არ იქნება წინააღმდეგი, ის ბეილში გაცვალოს. ამიტომ, მოურინიომ უნდა იჩქაროს...

ჰარი კეინი ჩვენი მთავარი იმედი უნდა იყოს მსოფლიოს ჩემპიონატზე. მაგრამ ვშიშობ, ეს იმედი მისთვის ზედმეტ წნეხად არ იქცეს. მას ბოლო დროს აკრიტიკებდნენ იმის გამო, რომ დამაგვირგვინებელ ფაზაში ცოტა სიზუსტე აკლია. მას ჰქონდა ტრავმა და აქედან გამომდინარე - პატარა ჩავარდნაც.

მაგრამ სწორია ამგვარი შეფასება იმ ფეხბურთელის მიმართ, ვინც "ნიუკასლთან" ბრწყინვალე გოლი გაიტანა და დუბლი შეასრულა "ლესტერთან" ბოლო ტურის მატჩში?

ზემოთ ვახსენე "წნეხი". სწორედ ეს ფაქტორი უნდა იყოს იგნორირებული მსოფლიოს ჩემპიონატზე და ეს ეხება არა მხოლოდ კეინს, არამედ ინგლისის ნაკრების ყველა ფეხბურთელს. ნუ იქნებით წნეხის ქვეშ და ნუ აღიქვამთ ფეხბურთს, როგორც მძიმე სამუშაოს, უბრალოდ, ისიამოვნეთ ფეხბურთით.

მე მახსოვს ევრო 96, როცა სწორედ წნეხის გამო ვერ შევძელით საკუთარ კედლებში ჩემპიონატის მოგება...

ჯეკ უილშირმა ამ სეზონში კიდევ ერთხელ დაამტკიცა, რომ შესანიშნავი ფეხბურთელია. მაგრამ იმისთვის, რომ ერთი ადგილი არ ტკეპნოს, მას ახალი გამოწვევა სჭირდება. ეს შეიძლება მოხდეს ან "არსენალის" ახალი მწვრთნელის პირობებში, ან სადმე სხვაგან.

ჯეკი ძალიან უყვართ "არსენალის" ფანებს, ისევე, როგორც "ტოტენჰემის" ქომაგებს - კეინი. ბოლო დროს მე კრიტიკული ვიყავი უილშირის მიმართ. მან ვერ გაიტანა იმდენი გოლი და ვერ შეასრულა იმდენი საგოლე პასი, რამდენიც მისი ტალანტის მქონე ფეხბურთელს შეჰფერის. "არსენალის" ახალმა მწვრთნელმა მისგან გაცილებით მეტი უნდა მოითხოვოს.

უილშირისთვის მაგალითი უნდა იყოს ალექს ოქსლეიდ-ჩემბერლენი, რომელმაც "არსენალიდან" წასვლის შემდეგ მკვეთრად მოუმატა. შეიძლება, "მეთოფეები" ძალიან ნერვიულობენ იმის გამო, რომ ჯეკი ტრავმებისადმი ზედმეტად მიდრეკილი გახდა, მაგრამ ის ახლა ისეთივე ჯანმრთელია, როგორიც წინა წლებში მინახავს.

ვფიქრობ, უილშირისთვის საუკეთესო სვლა იქნება ტრანსფერი "ვესტ ჰემში". ამ გუნდის ფანებს ძალიან უყვართ ინდივიდუალები - ისეთი ფეხბურთელი, რომელსაც შეუძლია, რაღაც ჯადოსნური გააკეთოს თამაშის დროს. ჯეკს შეუძლია, დაეხმაროს "ვესტ ჰემს", გაანათოს "ლონდონ სთედიუმი".


ეს სეზონი გამოფხიზლებისთვის გამოადგებათ "ვესტ ჰემის" ბოსებს - დევიდ სალივანსა და დევიდ გოულდს. ან მათ უნდა აღიარონ, რომ ფეხბურთი მათი საქმე არ არის, ან მომავალი სეზონიდან ყველაფერი გააკეთონ გუნდის გასაძლიერებლად, რაც ნამდვილად შეუძლიათ. ფანები ვეღარ მოითმენენ კიდევ ერთ ჩაგდებულ სეზონს. საჭიროა ახალი მწვრთნელი - წარმატებული და იდეებით სავსე, რომელსაც ექნება მათგან ფინანსური მხარდაჭერა.

ეს იქნება გადამწყვეტი ზაფხული "ტოტენჰემისთვისაც". ვფიქრობ, გუნდიდან უნდა წავიდნენ ტობი ალდერვეირელდი, მუსა დემბელე და დენი როუზი.

"დეზებს" არ აქვთ იმხელა ფინანსური შესაძლებლობები, რამდენსაც "სიტი" გასწვდება, მაგრამ ეს არის მოცემულობა - "ტოტენჰემმა" უნდა დახარჯოს ფული იმისთვის, რომ "ტიტანებს" უფრო მძაფრი კონკურენცია გაუწიოს და სეზონის ბოლო დღემდე ებრძოლოს ჩემპიონობისთვის.


პრემიერლიგა დაემშვიდობა ორ შესანიშნავ ნახევარმცველს - მაიკლ ქერიკსა და ლეონ ბრაიტონს. დიდი ხანია ორივეს ვიცნობ. ისინი ჯერ კიდევ მამაჩემთან (ჯეიმი რედნაპი ცნობილი მწვრთნელის, ჰარი რედნაპის ვაჟია - რედ) იწყებდნენ კარიერას "ვესტ ჰემში". მაიკლი ჩემი ერთ-ერთი ფავორიტი ფეხბურთელია.

უბრალოდ, არ მესმის - როგორ შეიძლებოდა, მას მხოლოდ 34 მატჩი ჩაეტარებინა ინგლისის ნაკრებში, მაშინ, როცა ის იყო სერ ალექს ფერგიუსონის, ერთ-ერთი უდიდესი მწვრთნელის, მთავარი საყრდენი "მანჩესტერ იუნაიტედში"?

ცოტა ახალგაზრდა რომ იყოს, ქერიკი აუცილებლად იქნებოდა იმ თვითმფრინავში, რომელმაც ინგლისის ნაკრები რუსეთის მუნდიალზე უნდა ჩაიყვანოს...
ძალიან მწყდება გული ბრაიტონის გამო, იმის გამო, რომ მან კარიერა გავარდნით დაასრულა (ბრაიტონი "სუონსის" ფეხბურთელი იყო - რედ). მისი ტექნიკური შესაძლებლობები სრულად გამოჩნდა ბრენდან როჯერსის ხელში. ვფიქრობ, ლეონს შეუძლია, იამაყოს იმით, რასაც "სუონსიში" მიაღწია.


ვილფრიდ ზაჰა ამ ზაფხულს პრემიერლიგის ტოპექვსეულის მწვრთნელთა მთავარი სამიზნე იქნება. ეს არის ფეხბურთელი, რომელსაც შეუძლია, თავდაყირა დააყენოს თამაში. მის კარიერაში გადამწყვეტი მომენტი დგას და მიუხედავად იმისა, რომ "კრისტალ პალასში" დარჩენის სურვილი გამოთქვა, ნამდვილად დიდი ინტერესის საგანია და ეს უკვალოდ არ ჩაივლის.

ზაჰა არის საუკეთესო მოთამაშე ტოპექვსეულის მიღმა და ის ფეხბურთელი, რომელიც მზად არის დიდი კლუბისთვის, სადაც ის კიდევ უფრო უკეთ "გაიხსნება". ვფიქრობ, "ტოტენჰემი" საამისოდ იდეალური ადგილია...

ყოველდღიური სპორტული გაზეთი "ლელო"
228
მკითხველის კომენტარები / 0 /
მსგავსი ამბები
რუბრიკის სხვა სიახლეები