ჯენარო გატუზო: 3-4 და ვნახოთ...

* 39 წლის რინო დაუბრუნდა კლუბს, რომელშიც 1999-2012 წლებში თამაშობდა.
* სერია A-ში "მილანი" 14 ტურის შემდეგ მხოლოდ მე-7 ადგილზეა.

გუშინ "მილანმა" ოფიციალურად წარადგინა წინა დღით ჩუმად მოხსნილი ვინჩენცო მონტელას ნაცვლად დანიშნული ჯენარო გატუზო. "რინოს" წარდგენას "მილანის" ბოსები მარკო ფასონე და მასიმილიანო მირაბელი ესწრებოდნენ.

ზაფხულში "მილანმა" ტრანსფერებში 200 მილიონი ევრო იმისთვის დახარჯა, რომ იტალიის ჩემპიონატში, თუ ჩემპიონობისთვის არა "შავ-წითლებს" ჩემპიონთა ლიგის საგზურისთვის უნდა ებრძოლათ. ახლა კი "მილანი" ლიგის ზონას 11 ქულით ჩამორჩება. არადა, ჯერ ჩემპიონატის ნახევარიც არ გასულა. მიუხედავად ამ ჩავარდნისა, კლუბმა მხოლოდ მწვრთნელი გამოცვალა (სინამდვილეში გატუზო პრიმავერადან დააწინაურა) და იანვარში ახალი ფეხბურთელების ყიდვას არ აპირებს.

"ჩვენ არ ვაპირებთ იანვარში სატრანსფერო ბაზარზე გასვლას. არავის ყიდვას არ ვაპირებთ, რადგან შევთანხმდით, რომ ამ შემადგენლობასაც შეუძლია სერიოზული მიზნების მიღწევა", - განაცხადა კლუბის გენერალურმა დირექტორმა ფასონემ.

მას ეთანხმება სპორტული დირექტორი მირაბელიც:

"ჩვენ ჯერ კარგად ვერ დავინახეთ გუნდის შესაძლებლობები. არადა, საკმაოდ კონკურენტუნარიანი შემადგენლობა გვყავს. ზაფხულში ჩვენ კარგი ინვესტიცია ჩავდეთ ახალგაზრდა, ნიჭიერ ფეხბურთელებში, რომლებიც აუცილებლად გაამართლებენ".

3-4-3?

დილით "გაძეტა დელო სპორტი" წერდა, რომ ჯენარო გატუზო "მილანს" 3-4-3 ტაქტიკით ათამაშებს. სპორტულმა გაზეთმა თითქმის გამოიცნო:

"ჩვენ ვითამაშებთ სამკაციანი დაცვით. მონტელასთან ვმეგობრობ, მაგრამ ბევრ რამეში განსხვავებული ხედვები გვაქვს. მას უყვარს ბურთის კონტროლი, რაზეც უარს არც მე ვამბობ, მაგრამ გუნდის სქემა უფრო პირდაპირი უნდა იყოს. სამი კაცი დაცვაში და ოთხი ნახევარდაცვაში გადაწყვეტილი ამბავია, წინ როგორ განვლაგდებით, ამას მალე გადავწყვეტთ", - აცხადებს "მილანის" ახალი თავკაცი.

გატუზო ფიქრობს სუსოს უფრო წარმატებულად გამოყენებაზე:

"მასზე ამბობენ, რომ მხოლოდ ფრთაზე შეუძლია თამაში. უნდა შევამოწმო ეს", - ამბობს გატუზო ესპანელზე.

დიდი ალბათობით, "დიავოლო" 3-4-1-2 სისტემით ითამაშებს, სადაც სუსო ორი ფორვარდის უკან განლაგდება.

რინო მილანის ფორვარდებზე

"დიდ ყურადღებას ვაქცევ, როგორ ვარჯიშობენ ფეხბურთელები. პატრიკი კი არავის ჩამორჩება. ჩვენ უფრო მეტი ფეხბურთელი გვესაჭიროება კუტრონეს მენტალიტეტის. ეს ახალგაზრდა არასოდეს ნებდება", გატუზომ თინეიჯერი ფორვარდი პატრიკ კუტრონე შეაქო, ხოლო პორტუგალიელ ანდრე სილვაზე აღნიშნა, რომ დროა, მან უფრო მეტი გააკეთოს გუნდისთვის. მწვრთნელს ნიკოლა კალინიჩი თითქმის არ უხსენებია.

ასე რომ, ველოდოთ "ბენევენტოსთან" ანდრე სილვასა და კუტრონეს დუეტს.

მონტელა ადრე გადაწყდა

"გაზეტასთან" ინტერვიუში მონტელამ აღნიშნა, რომ იგი არ გაუფრთხილებიათ, რომ თანამდებობიდან ათავისუფლებდნენ, მაგრამ "მილანის" ექსმწვრთნელმა აღნიშნა, რომ ეს საკითხი მის წინაშე ყოველთვის დამოკლეს მახვილივით იყო აღმართული.

"ნუ დავაბრალებთ "ტორინოსთან" მატჩს, ის გადაწყვეტილება, რომელიც კვირას მივიღეთ, დიდი ხნის ნაფიქრია, "აეროპლანინო" ძალიან გვიყვარს, მაგრამ... ვფიქრობთ, სწორი გადაწყვეტილება მივიღეთ", - განაცხადა მირაბელიმ.

ყოველდღიური სპორტული გაზეთი "ლელო"
1942
მკითხველის კომენტარები / 0 /
მსგავსი ამბები
რუბრიკის სხვა სიახლეები
;