ჯერ უნივერსიადა, მერე მსოფლიო - "ჩვენს მოფარიკავეებს საპრიზო ადგილებზე გასვლის რეალური შანსი აქვთ"

ორი დღის შემდეგ იტალიურ ნეაპოლში ზაფხულის უნივერსიადაზე ხუთი ქართველი მოფარიკავე მოსინჯავს ძალებს.

ოთხ ივლისს ბრძოლაში მოხმალავე მიხეილ მარდალეიშვილი ჩაებმება, ექვსში კი მოხმალავე გოგონები - ლიკა ჯიჯეიშვილი, თეონა გოგლიძე, ხოლო რაპირით ფარიკაობაში ლუკა ღაღანიძე და ლაშა გალუაშვილი იბძოლებენ მედლებისთვის.

- ჩვენს მოფარიკავეებს საპრიზო ადგილებზე გასვლის რეალური შანსი აქვთ, - გვითხრა საქართველოს ფარიკაობის ფედერაციის პრეზიდენტმა მერაბ ბაზაძემ.

- თანაც ეს ორთაბრძოლები მათთვის ძალთა კიდევ ერთი შემოწმება იქნება მსოფლიოს ჩემპიონატის წინ. ამ შეჯიბრებას კი 14 ივლისიდან უნგრეთის დედაქალაქი ბუდაპეშტი უმასპინძლებს. 

- ევროპის განვლილ პირველობაზე რას იტყვით?

- სანდრო ბაზაძემ, ტრადიციულად, კარგად იფარიკავა. ჯგუფში ყველა მეტოქეს აჯობა, პლეი ოფში კი ტიტულოვანი მეტოქეები დაჯაბნა. ერთადერთი გულდასაწყვეტი ის იყო, რომ პირველივე წრეში მიხეილ მარდალეიშვილს შეხვდა. რაც შეეხება ნახევარფინალში რუს კამილ იბრაგიმოვთან ორთაბრძოლას, ქართველმა მოხმალავემ, როცა ანგარიში გათანაბრდა - 11:11, რამდენიმე ტექნიკური შეცდომა დაუშვა და პაექრობა დათმო, არადა, იბრაგიმოვი მას არაერთხელ დაუმარცხებია, თანაც მეტად მნიშვნელოვან ტურნირებში.

წაგების მიუხედავად, ევროპის ჩემპიონატებზე ზედიზედ მესამე ბრინჯაოს მოპოვება ურიგო შედეგი არ არის - სტაბილურობის მაჩვენებელია, თან ისიც გასათვალისწინებელია, რომ სანდრომ წინა წლებში მნიშვნელოვან ჩემპიონატებში მონაწილეობის გამო ეროვნული გამოცდების ჩაბარება ვერ მოახერხა. წლეულსაც არ უნდოდა უმაღლესი სასწავლებლის მიღმა დარჩენა, ამიტომ დაძაბული ვარჯიშების შემდეგ თავისუფალ დროს პოულობდა სამეცადინოდ. დღეს - 2 ივლისს პირველი გამოცდა აქვს ქართულში და წარმატება მინდა ვუსურვო როგორც შვილს და როგორც ჩვენს ოლიმპიურ იმედს. სანდრო ბაზაძე მოხმალავეებში ტოკიოს თამაშებზე მოხვედრის რეალური კანდიდატია.

- ბატონო მერაბ, გუნდურ ევროპაზე რა მოხდა - იტალიას ხომ საკმაოდ სოლიდური სხვაობით უგებდით?

- არბიტრებისთვის მარცხის გადაბრალება არ მიყვარს, მაგრამ ევროპის ჩემპიონატზე იტალიასთან შეხვედრისას რაც მოხდა, რუმინელი მსაჯის - მარიუს ფლორიას სინდისზეა.

ტოკიოს თამაშებზე გუნდურ ხმალში მოსახვედრად რუმინეთი ჩვენი კონკურენტია. ევროპაზე რუმინელებისთვის რომ გაგვესწრო, მეტ სარეიტინგო ქულებს ავიღებდით, ამიტომ მარიუსი აშკარად მიკერძოებას იჩენდა. არადა, იტალიელებთან პაექრობისას წინ ვიყავით 25:17. როცა ანგარიში გათანაბრდა - 44:44, სანდროს რეალური ჩხვლეტა არ ჩაუთვალა და ის მატჩი 44:45 წაგვაგებინა... 

- მსოფლიოზე რევანში გმართებთ. ბუდაპეშტში წამსვლელთა ვინაობა თუ არის ცნობილი?

- უნგრეთის დედაქალქში საქართველოს სპორტის ღირსებას დაიცავენ მოხმალავეები - სანდრო და ბექა ბაზაძეები, მიხეილ მარდალეიშვილი, მეოთხე ადგილი კი ვაკანტურია. აქ სამი პერსპექტიული ახალგაზრდა სპორტსმენი აცხადებს პრეტენზიას - ნიკა შენგელია, საბა სულამანიძე და ვაჟა რეჭია. ქალებში იფარიკავებენ ლიკა ჯიჯეიშვილი, თეოდორა კახიანი და დარია ანტონოვა. ამ უკანასკნელმა ბოლო შეჯიბრებებში ჩვენი იმედები ვერ გაამართლა.

ბუდაპეშტშიც სათანადო შედეგს თუ ვერ აჩვენებს, საქართველოს ნაკრებში აღარ მოვიწვევთ. უმჯობესი იქნება, თანხები ახალგაზრდების მომზადებას მოვახმაროთ. 

ბუდაპეშტში კიდევ სამი სპორტსმენი გამოვა: დაშნით მოფარიკავე მაია გუჩმაზოვა, რაპირისტები - ლუკა ღაღანიძე და ლაშა გალუაშვილი. ვეცდებით, მსოფლიოს ჩემპიონატზე ევროპის პირველობაზე უკეთესი შედეგი ვაჩვენოთ.

ყოველდღიური სპორტული გაზეთი "ლელო"
191
მკითხველის კომენტარები / 0 /
მსგავსი ამბები
რუბრიკის სხვა სიახლეები
;