ჯიგა გრენობლის მთებიდან - 'ეს ჩემს კარიერაში წინგადადგმული ნაბიჯია!'

მკითხველმა უკვე იცის, რომ საქართველოს ნაკრების 26 წლის ნახევარმცველი ჯაბა ჯიღაური კარიერას საფრანგეთის რანგით მეორე ლიგაში გააგრძელებს, სადაც "გრენობლის" ღირსებას დაიცავს.

რა თქმა უნდა, ეს ქართული საფეხბურთო რეალობისთვის გვარიანი ტრანსფერია. "გრენობლში" გადასვლა ფეხბურთელისთვისაც უდავოდ წინგადადგმული ნაბიჯია.

ბოლოს "ჯიგა" (ასე უწოდეს "გრენობლში") "ორდაბასის" ღირსებას იცავდა. "ლელო" მას საფრანგეთში დაუკავშირდა და ინტერვიუ ჩაწერა...

- ჯაბა, გილოცავთ ახალ კლუბში გადასვლას და უდავო კარიერულ წინსვლას. როგორია თქვენი პირველი შთაბეჭდილებები?

- მადლობა მოლოცვისთვის! რაც შეეხება პირველ შთაბეჭდილებებს - მხოლოდ დადებითი! რა თქმა უნდა, დიდი სხვაობაა ყაზახეთისა და საფრანგეთის ქვედა ლიგას შორის, ამაზე ორი აზრი არ არის. ლიგა 2-ში მაღალი დონეა...

ძალიან თბილად მიმიღეს, დიდ ყურადღებას მაქცევენ. აქ ყველა პირობაა იმისთვის, რომ ფეხბურთელმა თავი ფეხბურთელად იგრძნოს. ეს ჩემთვის წინგადადგმული ნაბიჯია. მადლობა "სმარტბოლის" დამფუძნებლებს, ლევან ზუხბაიასა და მიხეილ ხუციშვილს. მათ ყველაფერი გააკეთეს, რომ ეს ტრანსფერი შემდგარიყო.

- თუ ესაუბრეთ გუნდის მთავარ მწვრთნელ ფილიპ ჰინშბერგერს?

- სხვათა შორის, ძალიან გულთბილად და დიდხანს მელაპარაკა. თურმე, ჩემი არაერთი თამაში ჰქონდა ნანახი და კარგად იცოდა, რას წარმოვადგენდი. მელაპარაკა გუნდის მიზნებზე. ამიხსნა, რომელი სათამაშო სისტემის მიმდევარია, სად ხედავს ჩემს ადგილს და ასე შემდეგ...

მოკლედ, შინაარსიანად ვისაუბრეთ. უკვე ვიცით, რომ მომავალ სეზონში "გრენობლის" ძირითადი სათამაშო სქემა 4-3-3 იქნება.

- სად ხედავს მწვრთნელი თქვენს ადგილს?

- მარცხენა ან მარჯვენა ნახევარმცველად. რა თქმა უნდა, აქ დიდი კონკურენციაა, მაგრამ ზოგადად, ეს ფეხბურთელისთვის ძალიან კარგია. ცხადია, სეზონი გრძელია და შეიძლება ცენტრშიც მომიწიოს თამაშმა, მაგრამ ჩემი ძირითადი პოზიციები იქნება ის, რაც მწვრთნელმა მითხრა.

- ფრანგული ენის არცოდნა პრობლემას ხომ არ გიქმნით?

- ინგლისური მწვრთნელმაც და ფეხბურთელებმაც იციან. ისე, ვარჯიშებზე ფრანგული ენა გამოიყენება... სხვათა შორის, კლუბმა უკვე იზრუნა იმაზე, რომ ფრანგულს დავეუფლო. სექტემბრიდან ადგილობრივ უნივერსიტეტში ვივლი და ფრანგული ენის სწავლას დავიწყებ. ამას თავად "გრენობლი" დააფინანსებს.

- რა იქნება გუნდის მიზანი მომავალ სეზონში? ფაქტია, ლიგა 2-ის სატურნირო ცხრილში მუდამ დიდი სიმჭიდროვეა და, ალბათ, ასე იქნება მომავალ სეზონშიც...

- კი ბატონო, ასეა, აქ მართლაც მუდამ დიდი სიმჭიდროვეა ცხრილში და ასეთივე სეზონს ელოდებიან. აქ ძალიან თანაბარი კონტინგენტია. შეიძლება, ვიბრძოლოთ ლიგა 1-ში გადასვლისთვისაც კი. არის 3-4 კლუბი, რომელიც სხვებთან შედარებით ცოტა ძლიერია, სხვა მხრივ, პრაქტიკულად, არანაირი განსხვავება არ არის. ასე რომ, თანაბარი ჩემპიონატის მოლოდინში ვარ.

- დაუმეგობრდით უკვე რომელიმე ფეხბურთელს?

- ყველასთან კარგად ვარ. გადაჭარბების გარეშე შემიძლია გითხრათ, რომ, ერთი მხრივ, ძალიან გულღია და მხიარული ბიჭები არიან, ხოლო მეორე მხრივ - ნამდვილი პროფესიონალები. ყველაზე ახლოს ბელგიელ რაიან სანუსთან ვარ. ის გუნდში როტერდამის "სპარტადან" მოვიდა. იქ გუნდის კაპიტანი იყო.

- ხელშეკრულება რა ვადით გააფორმეთ?

- ორწლიან კონტრაქტს მოვაწერე ხელი.

- ცხადია, ნაკრებს "გრენობლიდან" უფრო გამოადგებით...

- მეც ამის იმედი მაქვს. სულ მალე ერთა ლიგის გათამაშება იწყება. ყველას დიდი იმედი გვაქვს, რომ წარმატებით ვითამაშებთ ამ ტურნირზე. ეს ჩვენთვის განსაკუთრებული შანსია და მისი გამოყენება გვმართებს.

- ინფრასტრუქტურაზე აღარც შეგეკითხებით...

- აქ კითხვები მართლაც არ არის - ყველაფერი იდეალურადაა! ეს ეხება როგორც სათამაშო, ისე სავარჯიშო მინდვრებს. როგორც ნამდვილ ევროპულ გუნდს შეეფერება, სწორედ ისეთი პირობებია.

- ქალაქი მოგეწონათ?

- ძალიან ლამაზი ქალაქია, მთებში, ძალიან მაგარი ბუნებაა...

- საფრანგეთში ფეხბურთი ყველგან ძალიან უყვართ და გამონაკლისი, ალბათ, არც გრენობლი იქნება...

- კლუბს აქვს შესანიშნავი ოციათასიანი სტადიონი. როგორც მითხრეს, სეზონის სასტარტო შეხვედრას, სულ მცირე, 10 ათასი ქომაგი დაესწრება.

- სტარტი კარს მოგადგათ...

- 27 ივლისს პირველ ტურში "სოშოს" ვმასპინძლობთ. სამწუხაროდ, მე ვერ ვითამაშებ...

- რატომ?

- მცირე ტრავმა მაწუხებს და ინდივიდუალურად ვვარჯიშობ. სერიოზული არაფერია. მალე ვითამაშებ.

- რა ნომრით ითამაშებთ?

- რომ მოვედი, სულ ორი ნომერი იყო თავისუფალი, 18 და 26. მე პირველი ავირჩიე.

ყოველდღიური სპორტული გაზეთი "ლელო"
1737
მკითხველის კომენტარები / 0 /
მსგავსი ამბები
რუბრიკის სხვა სიახლეები
;