ჰაინკესი: 'რეალს' ორი გოლი ვაჩუქეთ!..

ჩემპიონთა ლიგის პირველ, მიუნხენურ ნახევარფინალში "ბაიერნმა" შინ 1:2 წააგო "რეალთან" და ფინალში გასვლის შანსი მნიშვნელოვნად გაიუარესა. თუმცა "რეკორდმაისტერს" აქვს იმის მაგალითი, მცირე შანსისთვისაც კი ბოლომდე ბრძოლამ, შეიძლება, გააცოცხლოს იმედი...

ზინედინ ზიდანი ("რეალის" მწვრთნელი): "ჩვენ ძალიან კარგად ვითამაშეთ და შედეგიც შესაბამისია. ვფიქრობ, დამსახურებულად მოვიგეთ. ჩვენთვის დიდი პრობლემა იყო ის, რომ დავკარგეთ ისკო, მაგრამ ასენსიომ უბრალოდ დიდებულად ითამაშა.

სიმართლე გითხრათ, ველოდი კიდეც მისგან ასეთ თამაშს... მთელმა გუნდმა ძალიან ბევრი იმუშავა. მაგალითად, ავიღოთ ლუკას ვასკესი, რომელიც დაცვაშიც შესანიშნავი იყო და შეტევაშიც. მას ხომ ძალიან ხშირად უწევდა უკან დახევა და რიბერის აყვანა".

იუპ ჰაინკესი ("ბაიერნის" მწვრთნელი): "თამამად შეიძლება ითქვას, რომ მოწინააღმდეგეს ორი გოლი ვაჩუქეთ. იმ ეპიზოდებში ასე არ უნდა გვეთამაშა. ძალიან ბევრი საგოლე მომენტი ვერ გამოვიყენეთ და ამის გამო დავისაჯეთ. სამწუხაროდ, დავკარგეთ რობენი და ბოატენგი, რაც "ბაიერნისთვის" უდიდესი პრობლემაა. შესვენებამდე ძალიან მცირე დრო იყო დარჩენილი, როცა გოლი გავუშვით. ჩვენი შეცდომა მეტოქემ ძალიან კარგად გამოიყენა. მდგომარეობის გამოსასწორებლად 90 წუთი გვაქვს".

ხამეს როდრიგესი ("ბაიერნის" ნახევარმცველი): "ჩვენს თამაშში იყო შეცდომები, მეტოქეს კი ორი მომენტი ჰქონდა და ორივე გოლად აქცია. "ბაიერნი" ის გუნდი არ არის, იოლად დანებდეს. ვნახოთ, რა მოხდება მადრიდში. იქ ჩვენი საუკეთესო თვისებების გამოვლენა მოგვიწევს".

სერხიო რამოსი ("რეალის" მცველი): "მას შემდეგაც კი, როცა ჩამოვრჩით ანგარიშში, დარწმუნებული ვიყავი, რომ შევძლებდით თამაშის საჩვენოდ შემობრუნებას. ბოლომდე ვიბრძოლეთ და ეს დაგვიფასდა კიდეც".

გუშინდელი მონაცემებით, ჩემპიონთა ლიგის მიმდინარე გათამაშებაში უკვე 387 გოლი გავიდა, რაც ამ ტურნირისთვის აბსოლუტური რეკორდია.

ყოველდღიური სპორტული გაზეთი "ლელო"
1214
მკითხველის კომენტარები / 0 /
მსგავსი ამბები
რუბრიკის სხვა სიახლეები
;