ჰერ ტუხელ, რა მოხდა წუხელ? მბაპე: პიროვნებები გვაკლია!.. ტუხელი: არ ვიცი, ვინ წავიყვანო ნანტში?!.

კვირას "პარი სენ-ჟერმენმა" კატასტროფული მარცხი (1:5) იწვნია "ლილთან" საგარეო მატჩში და ჩემპიონობა გადადო. რა თქმა უნდა, პსჟ აუცილებლად გახდება ჩემპიონი და ეს შეიძლება მოხდეს ოთხშაბათსვე, როცა თომას ტუხელის გუნდი "ნანტს" გამოტოვებული მატჩის ჩასატარებლად ეწვევა...

ერთი სიტყვით, ფრანგული ოქრო დროის ამბავია, მაგრამ მეორე მხრივ, რატომ უნდა აგებდეს ასე გუნდი, რომელიც განებივრებულია ყატარული მილიარდებით. ესეც მოჩვენებითია ვითომ? მხოლოდ ძვირფასი ტრანსფერები ვერ წყვეტს პრობლემას. ამბობს კიდევ კილიან მბაპე

"ჩვენ არ გვაკლია კლასი, მაგრამ გვაკლია პიროვნებები. ეს არის ჩვენი ყველაზე დიდი ჩავარდნა. პსჟ ასე არ უნდა თამაშობდეს, ეს არ არის ნორმალური! თითქოს დებიუტანტები იყვნენ მოედანზე", - უთხრა პსჟ-ს შემტევმა ფრანგულ "კანალ პლუსს".

სხვათა შორის, ვიდრე 36-ე წუთზე ხუან ბერნატს გააძევებდნენ, მბაპეს ორი გოლი გაუუქმეს. თუმცა მას არ უცდია მარცხის გამართლება არჩათვლილი გოლებით. სხვა პრობლემაზე საუბრობს ტუხელი, საიდანაც კიდევ ერთხელ ჩანს სატრანსფერო პოლიტიკის ლაფსუსები:

"ამ თამაშისთვის მხოლოდ 15 ფეხბურთელი გვყავდა ჯანმრთელი. კერერიც კი, რომელმაც ტიაგო სილვა შეცვალა, გაციებული იყო... მართალი გითხრათ, არც კი ვიცი, ვინ შეიძლება წავიყვანოთ "ნანტთან" სათამაშოდ. ჩვენ არ გვყოფნის ფეხბურთელები და ეს ფაქტია", - ამბობს ტუხელი. 

სწორედ ამაშია სატრანსფერო პოლიტიკის ლაფსუსები, როცა ასეულობით მილიონს იხდი ორ ფეხბურთელში და გრჩება დაუბალანსებელი, თავკომბალა გუნდი, რომელსაც გოლების გატანა კი შეუძლია, მაგრამ პრობლემები აქვს სხვა რგოლებში. ისეთი შთაბეჭდილება რჩება, ტუხელს გუნდის დაკომპლექტებაში ბევრს არაფერს ეკითხებიან, თორემ ფეხბურთელები ასე საძებარი არ ეყოლებოდა...

ყოველდღიური სპორტული გაზეთი "ლელო"
867
მკითხველის კომენტარები / 0 /
მსგავსი ამბები
რუბრიკის სხვა სიახლეები
;