„ზესტაფონი" საქართველოს ვირტუალური თასის მფლობელია!

„ზესტაფონი" საქართველოს ვირტუალური თასის გამარჯვებულია! ფინალში გუნდი ბათუმის „დინამოს“ დაუპირისპირდა და 32:14 (3293:1496) დაამარცხა.

კორონავირუსის პანდემიასთან დაკავშირებული იძულებითი პაუზის პირობებში, საფეხბურთო ცხოვრებამ მწვანე მინდვრებიდან ვირტუალურ სივრცეში გადაინაცვლა. სწორედ არსებული ვითარების გათვალისწინებით, ფეიქბუქ-გვერდმა "სპორტ-ექსპრესმა" საქართველოს ვირტუალური თასის გათამაშების გამართა.

საინტერესო და სახალისო ტურნირში, რომლის მონაწილეთა შორის ეროვნული ჩემპიონატის პირველი ოთხი ლიგის მონაწილე 46 გუნდი ფიგურირებდა და რომელიც თითქმის სამი კვირის განმავლობაში მიმდინარეობდა. შეჯიბრება ოლიმპიური სისტემით ჩატარდა და შესარჩევის შემდეგ 16 გუნდი დარჩა. წარმატებას გულშემატკივართა სამრავლე და გათამაშების პროცესში მათი აქტიურობა განაპირობებდა.

ტურნირის რეგლამენტის თანახმად, გუშემატკივართა მიერ საყვარელი გუნდისთვის მიცემული ყოველი 100 ხმა ერთ გოლად ფასდებოდა. ხმების დათვლა დილის 10 საათიდან იწყებოდა და ღამის 12 საათზე მთავრდებოდა.

„ზესტაფონმა“ წინასწარი ეტაპი მარტივად დაძლია და მერვედფინალში ვანის "სულორის" 3:2 სძლია. ზემოიმერელთათვის ტურნირზე ყველაზე დაძაბული დაპირისპირება მეოთხედფინალში ჩხოროწყუს „სამეგრელოსთან" ელოდა და გამარჯვება მხოლოდ მინიმალური სხვაობით, 32:31 მოიგეს.

ამის შემდეგ, მარგველებმა ნახევარფინალში იოლად (13:2) დაამარცხეს თბილისის "ვიტ-ჯორჯია", რომელმაც მანამდე დაძაბულ ბრძოლაში მოულოდნელად ტურნირის ერთ-ერთ ფავორიტად მიჩნეული ქუთაისის "ტორპედო" დაამარცხა. საინტერესოა, რომ მერვედფინალში ქუთაისელებმა თბილისელ „დინამოს“ სძლიეს.

შედეგად, "ზესტაფონი" საქართველოს ვირტუალური თასის გათამაშების ფინალში გავიდა, სადაც მარტვილის "მერანისა" და ბათუმის "დინამოს" წყვილის გამარჯვებულთან დაპირისპირება ელოდა. ბათუმელებმა ნახევარფინალი, სასწაულებრივ, დაპირისპირების ბოლო ერთ საათში ამ ტურნირისათვის სარეკორდო ანგარიშით 46:45 მოიგეს და მარტვილელთა ძალიან კარგად ორგანიზებული გულშემატკივრები ტურნირის მთავარი მატჩის მიღმა დატოვეს...

იმერელთა მსგავსად, ბათუმელებსაც მრავალრიცხოვანი და კარგად ორგანიზებული ფან-კლუბი ჰყავთ, თუმცა მოულოდნელად მოხდა ისე, რომ ფინალურ შეხვედრაში, რომელიც 12 აპრილს გაიმართა, ზესტაფონელებმა მარტივად, ანგარიშით 32:14 მოახერხეს ძლიერი ოპონენტის დამარცხება და საქართველოს ვირტუალური თასის 2020 წლის გათამაშების გამარჯვებულის ტიტული და გამოცემა "სპორტ-ექსპრესის" რედაქციის მიერ საგანგებოდ დაწესებული თასი დამსახურებულად მოიპოვეს!

სულ, ვირტუალური ტურნირის მიმდინარეობისას, „ზესტაფონს" მხარი 9 000-მდე facebook-მომხმარებელმა დაუჭირა.

„გვინდა მადლიერება გამოვთქვათ საფეხბურთო კლუბ "ზესტაფონის" ფან-კლუბის, ფან-კლუბ "14-ე სექტორისა" და თვითოეული იმ გულშემატკივრის მიმართ, რომელმაც ქვეყანაში შექმნილი რთული ვითარების პირობებშიც კი, ყველა ჩვენგანს უდიდესი დადებითი ემოცია აჩუქა!“ - წერია საფეხბურთო კლუბ „ზესტაფონის" წერილში.


755
მკითხველის კომენტარები / 0 /
მსგავსი ამბები
რუბრიკის სხვა სიახლეები
;