? როცა სამეფო ტახტი ცარიელია... შეთქმულება თუ უბრალოდ ლოპეტეგის კომპეტენციის დაბალი დონე

ზიდანს ჰქონდა ის, რაც არასოდეს ექნება ლოპეტეგის

მადრიდის "რეალი" ძალიან ცუდ დღეში რომაა, ეს ერთხელაც დადასტურდა "პლზენთან" შეხვედრაში. "სამეფო კლუბმა" კი მოიგო, მაგრამ მის თამაშში უამრავი ნაკლი იყო. ეს განსაკუთრებით დაცვის ხაზს ეხება და "პლზენის" ფეხბურთელებს ცოტა მეტი სიზუსტე რომ გამოეჩინათ, ჩეხები შინ ქულით მაინც დაბრუნდებოდნენ...

...არანაკლებ საინტერესოდ ვითარდებოდა მოვლენები "სანტიაგო ბერნაბეუს" ტრიბუნებზე. თამაშის მიმდინარეობისას მადრიდული პუბლიკა ხშირად უსტვენდა ხულიენ ლოპეტეგის. ბევრი მიიჩნევს, რომ კრიშტიანო რონალდოს წასვლა კი არა, სწორედ მწვრთნელის დაბალი კვალიფიკაციაა "სამეფო კლუბის" დღევანდელი ყოფის მიზეზი.

ამ დროს "რეალის" ხელმძღვანელობა აცხადებს, რომ დიდი წნეხის მიუხედავად, ბოლომდე ენდობა ლოპეტეგის და სწორედ ის დამოძღვრავს "სამეფო კლუბს" კარსმომდგარ "ელ კლასიკოში".

მეორე მხრივ, ეს შეიძლება იყოს იმის ირიბი აღიარებაც, რომ "კამპ ნოუს" მატჩის შემდეგ ლოპეტეგის ყველა ვარიანტში მოუწევს ჩემოდნების ჩალაგება...
"რეალის" ყოფილი ვარსკვლავი ემილიო ბუტრაგენიო, ვინც დღეს "სამეფო კლუბის" დირექტორია, ადასტურებს, რომ "ბარსელონასთან" მატჩში "რეალის" სამწვრთნელო სკამზე კვლავ ლოპეტეგი იჯდება:

"ჩვენ ფრთხილად უნდა ვიყოთ ფეხბურთელებთან მიმართებაში. მთავარია, მათ სიმშვიდე შეინარჩუნონ. კვირას გუნდს კვლავ ლოპეტეგი გაუძღვება", - ამბობს ბუტრაგენიო.

მინიშნება აშკარაა - კვირასო. და რა იქნება კვირის მერე?

რაც ლოპეტეგის არასოდეს ექნება...

ფაქტია, ხულიენ ლოპეტეგი სიტუაციას ვერ აკონტროლებს. ის სულაც არ არის ცუდი მწვრთნელი. 52 წლის ბასკი სპეციალისტი ტრადიციული ესპანური სამწვრთნელო სკოლის მიმდევარია. მას უყვარს ბურთის კონტროლი. ცუდი პერიოდი არ ჰქონდა ესპანეთის ნაკრებში და მშვენივრად იმუშავა ჭაბუკთა დონეზე, მაგრამ, განა ეს საკმარისია იმისთვის, რომ წარმატებით გაწვრთნა "რეალი"?

რა თქმა უნდა, არა! ლოპეტეგის გაცილებით მეტი სამწვრთნელო გამოცდილება აქვს, ვიდრე თავის დროზე ჰქონდა ზინედინ ზიდანს, მაგრამ ზიდანს ჰქონდა ის, რაც ვერასოდეს ექნება ლოპეტეგის - უდიდესი ქარიზმა და ავტორიტეტი!

დიახ, ლოპეტეგის სწორედ ავტორიტეტი აკლია. ჩვენ ვნახეთ, რას სჩადის "რეალის" ერთ-ერთ ბოლო ვარჯიშზე სერხიო რამოსი. ის აშკარად "აბულინგებს" ერთ-ერთ ახალგაზრდა თანაგუნდელს. ასეთ რამეს ზიდანის დროს ვინ გაბედავდა?!

როცა ტახტი თავისუფალია...

"რეალის" თამაშში აღარ ჩანს ძველებური ჟინი. ერთი შეხედვით, ძალიან ძნელია გამოიცნო, თუ რატომ ხდება ეს, მაგრამ თუ კარგად დავაკვირდებით, მიზეზის პოვნა ნამდვილად არ გაგვიჭირდება.

ამ ფაქტს შეიძლება ყველამ თავისებური ახსნა მოუძებნოს, მაგრამ უეჭველი გვგონია - მას შემდეგ, რაც კრიშტიანო რონალდო წავიდა, "რეალში" "მეფის ტახტი" გათავისუფლდა. დღეს სწორედ ამ ტახტისათვის ბრძოლა მიმდინარეობს და სერხიო რამოსის გამოხდომაც ამის დადასტურებაა. მას მეფობა სურს. ლუკა მოდრიჩს ამის ამბიცია არ აქვს, მაგრამ ის თავისი თამაშით იმსახურებს ამას, ისევე, როგორც მარსელოს.

ისეთი შთაბეჭდილება იქმნება, რომ მარსელო და მოდრიჩი სწორედაც რომ არაჯანსაღ კლიმატს გაურბიან "რეალიდან". ერთს "იუვენტუსში" უნდა გადასვლა, მეორეს - "ინტერში".

სირცხვილია!

ზოგადად, ევროპულ გრანდებს ახლა საუკეთესო დროება არ უდგათ, მაგრამ ფაქტია ისიც, რომ "რეალის" დაცვაში რაღაც სასწაული ხდება. არადა, "სამეფო კლუბმა" ყველა უკანახაზელი შეინარჩუნა.

ამ შემთხვევაში საქმე გვაქვს მწვრთნელის კომპეტენციასთან. არსებობს ვარაუდი, რომ "რეალის" მცველები უკმაყოფილოები არიან ლოპეტეგის მუშაობით. რა თქმა უნდა, შეთქმულების თეორია ნაკლებად სარწმუნო რამაა, მაგრამ ფაქტია ისიც, რომ ასეთი დაცვა რომელიმე საშუალო დონის გუნდსაც კი არ ჰყავს.
რა დამართეს ამ დაცვას "ლევანტესა" და "პლზენის" შემტევებმა, ყველამ ნახა. იოლი გამოსაცნობია, რა იქნება თუნდაც ლიონელ მესის გარეშე მოთამაშე "ბარსელონასთან".

ყველა აჭრილია

ფაქტია, ამ ბოლო დროს "რეალში" ყველა მაგრად აიჭრა. სულ ცინცხალი ამბავია: მარსელომ ჟურნალისტებს შეუტია. მისი თქმით, "რეალი" კარგად კი თამაშობს, მაგრამ ამას ჟურნალისტები ვერ ხვდებიან, რადგან საერთოდ არ იციან ფეხბურთი...

მარსელო დიდებული ფეხბურთელი რომაა, ამას წყალი არ გაუვა, მაგრამ ფაქტია ისიც, რომ მედიასთან კამათს ხეირი არასოდეს არცერთი გუნდისთვის არ მოუტანია და ესეც "რეალის" ამჟამინდელი უმწეობის ერთ-ერთი მთავარი გამოვლინებაა.

ვინ სჭირდება რეალს?

...ოღონდაც არა - ანტონიო კონტე! ეს საფეხბურთო წესრიგის შეცვლის მცდელობა იქნება. მწვრთნელი, რომელსაც "სტემფორდ ბრიჯი" დაცვითი ფეხბურთის ერთგულების გამო დაატოვებინეს, "სანტიაგო ბერნაბეუზე" როგორ გაძლებს?

აგერ არის ზიდანის მაგალითი. "რეალმა" მწვრთნელი ისევ თავისი წიაღიდან უნდა იპოვოს: სანტიაგო სოლარი ან გუტი. ორივე თავისებურად ლეგენდაა და ორივეს უდიდესი ავტორიტეტი აქვს.

1155
მკითხველის კომენტარები / 0 /
მსგავსი ამბები
რუბრიკის სხვა სიახლეები
;