1/2 ფინალი: დელტა ისტორიულ შედეგს მიუახლოვდა

მგზავრები-დელტა 67:75
14:21, 16:18, 14:15, 23:21

მგზავრები: ბოუი (15ქ, 5მ, 6პ), უილიამსი (9ქ), არმსტრონგი (11ქ), ალავიძე (3ქ), ჯინჭარაძე (6ქ, 10მ), ჩაჩანიძე (6ქ), ქავთარაძე (6ქ), ბეშქენაძე (6ქ), გოგნაძე (3ქ), ყეინაშვილი (2ქ).

დელტა: ფხაკაძე (25ქ, 5მ, 3პ), მეგენეიშვილი (2ქ), ბაქრაძე (7ქ), მაჩალაძე (4ქ), ნოთიჯი (4ქ, 10მ, 8პ), დრამრაითი (4ქ, 5პ), ლობჯანიძე (7ქ), გაფრინდაშვილი (3ქ), ბექაური (14ქ, 10მ), შვეცი (6ქ, 6მ), ჩაჩხიანი.

„დელტა“ ჯერჯერობით პლეი ოფის საუკეთესო გუნდია. ლექსო ლაფანაშვილის გაწვრთნილმა დელტელებმა „მგზავრებს“ ნახევარფინალური სერიის მეორე მატჩიც მოუგეს და პლეი ოფში დაუმარცხებელ სვლას აგრძელებენ. მეოთხედფინალში „დელტამ“ 3:0 სძლია „ოლიმპს“, რეგულარულ ჩემპიონატში მეორე ადგილზე გასულ „მგზავრებს“ კი უკვე 2:0 ამარცხებს.

თუკი სერიის პირველ მატჩში „დელტას“ თავიდან გაუჭირდა და მთელი პირველი ნახევარი აგებდა, მეორეში უპირატესობას თავიდანვე დაეპატრონა. ლაფანაშვილის გაწვრთნილი კალათბურთელები გუნდურად და რაც მთავარია, დაცვაში აგრესიულად, ხოლო შეტევაში შედეგიანად თამაშობდნენ. პირველი პერიოდის შემდეგ „მგზავრები“ 14:21 ჩამორჩა, დიდი შესვენებისთვის კი დელტელთა ლიდერობა 9 ქულამდე გაიზარდა. ამას ისიც დაერთო, რომ „მგზავრების“ ამერიკელმა ლეგიონერმა ჯეიკობ არმსტრონგმა ტრავმა მიიღო და მოედანი დატოვა.

ვითარება არ შეცვლილა არც მესამე პერიოდში. „დელტა“ აგრძელებდა შედეგიანად თავდაცვასა და სწრაფი შეტევებით, ასევე ფარქვეშ პოზიციური თამაშით ქულების მოგროვებას. მისმა უპირატესობამ ორნიშნა ნიშნულს გადააჭარბა. თამაში დელტელთათვის სასურველი სცენარით გაგრძელდა და შეხვედრა ისე დასრულდა, მდგომარეობა არ დაძაბულა. „დელტა“ ლიდერის ამპლუაში იოლად მივიდა ბოლო წამებამდე და საბოლოოდ წინა მატჩის მსგავსად კვლავ 8 ქულით - 75:67 მოიგო.

გამარჯვებულთაგან 25 ქულით საუკეთესო იყო ოთარ ფხაკაძე, რომელმაც 7-დან 7 ორქულიანი ჩააგდო. 14 ქულა და 10 მოხსნა ბექა ბექაურის ანგარიშზეა. „მგზავრებში“ უმეტესი - 15 ქულა ადრიან ბოუიმ მოაგროვა, 11 ქულა კი ტრავმის გამო მოედანზე მხოლოდ 9 წუთით მყოფმა ჯეიკობ არმსტრონგმა მიითვალა.
მეოთხედფინალური სერიის მომდევნო მატჩი 17 მაისს გაიმართება.

ყოველდღიური სპორტული გაზეთი "ლელო"
432
მკითხველის კომენტარები / 0 /
მსგავსი ამბები
რუბრიკის სხვა სიახლეები
;