10 ფეხბურთელი, რომელიც გვარდიოლამ შეცვალა

პეპ გვარდიოლა დიდი მწვრთნელია და, ალბათ, ამაზე ყველა ვთანხმდებით. დიდი მწვრთნელი კი ის არის, ვის ხელშიც არა მარტო გუნდები, ფეხბურთელებიც (ყველა არა, რა თქმა უნდა) ახალ სიმაღლეებს აღწევენ.

ცხადია, პეპმაც დაამჩნია განსაკუთრებული კვალი ზოგიერთ მოთამაშეს. ეს წერილიც იმ ათ ფეხბურთელს ეხება, რომლებიც გვარდიოლამ აშკარად შეცვალა და საფეხბურთო სამყაროს სრულიად სხვა კუთხით დაანახვა...

დანი ალვეში

დანი ალვეში "ბარსაში" 22 წლისა მივიდა. ის უკვე შემდგარი ფეხბურთელი იყო. ამ დროს მას ბრაზილიის ნაკრებშიც იწვევდნენ. პეპმა მასში თვისებრივად ახალი მონაცემები აღმოაჩინა. უპირველეს ყოვლისა, ვგულისხმობთ იმას, რომ ალვეში უფრო შემტევი სტილის ფეხბურთელი გახდა.

"ბარსელონაში" ბრაზილიელს მართლაც რომ დიდებული კარიერა ჰქონდა - 120 გოლი და საგოლე პასი ყველაფერზე მეტყველებს. გვარდიოლას გარეშე ალვეშმა ძალიან "მოიწყინა" და იოლად ვეღარ შეეგუა "იუვენტუსის" სათამაშო სტილს.

რაჰიმ სტერლინგი

უკვე დიდი ხანია, რაჰიმ სტერლინგი ინგლისის ერთ-ერთ ყველაზე დიდ ტალანტად ითვლება. ის აქამდე ვერ ახერხებდა გაცემული ავანსების გამართლებას. გვარდიოლას პირველი სეზონიც ცუდი იყო სტერლინგისთვის.

ის ყველაზე მეტად იმით გვამახსოვრებდა თავს, რომ ლამის ყოველ მეორე შეხვედრაში ვერ ახერხებდა ცარიელ კარში გოლის გატანას. მიმდინარე სეზონი სულ სხვანაირია რაჰიმისთვის.

ის ახლა პრემიერლიგის ბომბარდირთა შორისაა. "არაფერი განსაკუთრებული, მას უბრალოდ აღარ ეშინია", - ასე ახსნა პეპმა ფეხბურთელის პროგრესი.

ხავიერ მასკერანო

ის "ლივერპულის" ერთ-ერთი ლიდერი იყო, სადაც საყრდენ ნახევარმცველად თამაშობდა. მისი წასვლის შემდეგ წარმოქმნილი ვაკუუმის შევსებას სულ ტყუილად ცდილობდნენ ლუკას ლეივა, რაულ მეირელეში და ალბერტო აკვილანი.

"ბარსელონაში" კი იმ დროს მინდვრის ცენტრში სერხიო ბუსკეტსი მეფობდა. ამის გამო, გვარდიოლამ მასკერანო ცენტრალურ მცველად აქცია. ვფიქრობთ, პეპი არც ამჯერად შემცდარა.

ფილიპ ლამი

"ბაიერნის" ცოცხალი ლეგენდა 29 წლის ასაკში ვერაფრით წარმოიდგენდა, რომ გვარდიოლა მას ამპლუას შეუცვლიდა. არადა, სწორედ ასე მოხდა. მანამდე ფილიპ ლამი მარჯვენა (უფრო ადრე - მარცხენა) ფლანგზე მეფობდა.

პეპს მისი პირველი პასი მოეწონა და საყრდენ ზონაში მიუჩინა ადგილი. ლამს თავი არც ამ პოზიციაზე შეურცხვენია, თუმცა გვარდიოლას ამ გადაწყვეტილებას კრიტიკოსებიც ჰყავდა.

ჟერარდ პიკე

თავის დროზე, სერ ალექს ფერგიუსონი ამ ფეხბურთელმა ათლეტურობით მოხიბლა. არადა, ამის იქით მას ჰქონდა აშკარა სისუსტეები. მაგალითად, იყო ძალიან ნელი და პოზიციასაც ვერ არჩევდა უნაკლოდ.

გვარდიოლამ კი ჟერარდ პიკესგან ექსტრაკლასის მცველი გამოძერწა. პიკეს პირველი პასი მთელ მსოფლიოშია ცნობილი. ის არ მალავს, რომ ასეთი პასის გაკეთება მას სწორედ პეპმა ასწავლა. გვარდიოლასთვის ის ერთ-ერთ საყვარელ ფეხბურთელად რჩება.

კევინ დე ბრუინი

მას ბევრი მიიჩნევდა ლიონელ მესის შემცვლელად. მას შემდეგ, რაც "მანჩესტერ სიტი" გვარდიოლამ ჩაიბარა, კევინ დე ბრუინი თამაშის მანერით უფრო და უფრო ემსგავსება ჩავი ერნანდესს.

ბელგიელი თანდათან უშინაურდება მინდვრის ცენტრში თამაშს და "მკვლელი" პასების კეთებას. გვარდიოლამ დე ბრუინი გაცილებით მრავალმხრივი ფეხბურთელი გახადა და ეს ფაქტია - ფეხბურთელი, რომელმაც იცის ბრძოლაც, პასიც და გოლიც.

ჩავი ერნანდესი

2008 წლამდე ჩავი ერნანდესი ძალიან კარგი ფეხბურთელი იყო, მაგრამ არ იყო ის, რა სტატუსიც აქვს დღეს. ის იყო ესპანეთის ნაკრების წევრი, მაგრამ იყო შემთხვევები, როცა მას ძირითად შემადგენლობაში მოხვედრაც კი უჭირდა.

ჩავი უკვე 28 წლის იყო, როცა "ბარსელონაში" გვარდიოლა მივიდა. პეპმა მისი ყველა პლუს-მინუსი იცოდა, რადგან მასთან ერთად თამაშობდა კიდეც. გვარდიოლამ ფეხბურთელს მოედანზე სრული თავისუფლება მისცა და დიდებული შედეგიც მიიღო.

ანდრეს ინიესტა

თანამედროვე ფეხბურთის კაშკაშა ვარსკვლავი 23 წლამდე საკუთარი თავის ძიებაში იყო. ის ნახევარდაცვის ყველა პოზიციაზე თამაშობდა და, ასე განსაჯეთ, უკანდაწეულ თავდამსხმელადაც კი.

გვარდიოლამ ანდრეს ინიესტას საბოლოოდ მოუნახა ის ადგილი, სადაც განუმეორებელი წყვილი შექმნა თავის უფრო მეგობარ ჩავისთან ერთად. "ბარსელონას" წარმატებებიც სწორედ ამ ლეგენდარულ დუეტთანაა დაკავშირებული ლიონელ მესისთან ერთად.

სერხიო ბუსკეტსი

ყველასთვის უცნობ ახალგაზრდა ფეხბურთელს გვარდიოლამ უდიდესი ნდობა გამოუცხადა. სერხიო ბუსკეტსმაც ბოლომდე გაამართლა. როგორი საქმეა - ბუსკეტსმა ჯერ ძირითადი შემადგენლობიდან ამოაგდო სეიდუ კეიტა და იაია ტურე, მერე კი მინდვრის ცენტრს არ გააკარა ხავიერ მასკერანო?!

ლიონელ მესი

"ბარსელონაში" გვარდიოლას მისვლის შემდეგ არგენტინელი გაცილებით მრავალფეროვანი ფეხბურთელი გახდა, ვიდრე ადრე იყო. ლიონელ მესი გუნდის უდავო ლიდერი შეიქნა. კი, მესი იყო უკვე შემდგარი ვარსკვლავი, მაგრამ მის თამაშში გაცილებით მეტი მრავალფეროვნება გაჩნდა.

ყოველდღიური სპორტული გაზეთი "ლელო"
3568
მკითხველის კომენტარები / 1 /
სანდრო
1
სავსებით ვეთანხმები თქვენს სტატიაში მოყვანილ ფაქტებს
მსგავსი ამბები
რუბრიკის სხვა სიახლეები
;