12UP: ხუთი ამბავი NBA-დან

ჩატარდა 2017-18 წლების სეზონის პირველი მატჩები. ვებგვერდ 12UP-ის მიმომხილველებმა გამოარჩიეს 5 მნიშვნელოვანი ფაქტორი, რომელიც ცხადად გამოჩნდა ჩემპიონატის სტარტის შემდეგ.

5. დასავლეთში უსაფრთხოდ არავინაა

უკვე სტარტამდე აშკარად ჩანდა, რომ დასავლეთ კონფერენციაში დიდი კონკურენცია იქნებოდა. მხოლოდ "გოლდენ სტეიტის" პოზიციები მოჩანდა მყარად. მაგრამ, სასტარტო მატჩმა დაამტკიცა, რომ ამ გუნდს სულაც არ აქვს გარანტირებული პირველი ადგილი რეგულარულ ჩემპიონატში და როგორც მინიმუმ, "ჰიუსტონი" მას სერიოზულ კონკურენციას გაუწევს.

4. ერთმა ტრავმამ შეიძლება ყველაფერს ხაზი გადაუსვას

გორდონ ჰეივორდის ტრავმამ შოკში ჩააგდო მთელი NBA. ფორვარდმა მხოლოდ ხუთი წუთი ჩაატარა "ბოსტონის" რიგებში სადებიუტო მატჩში. არადა, ჰეივორდი ახალი მწვერვალების დაპყრობას აპირებდა "სელტიქსში" და უნდოდა ეს გუნდი აღმოსავლეთში უძლიერესად ექცია. მაგრამ, ტრავმამ ყველაფერი შეცვალა. ეს არის ნაღვლიანი შეხსენება იმისა, რომ, ტალანტის მიუხედავად, ერთმა დანაკარგმა, შესაძლოა, სულ თავდაყირა დააყენოს გუნდის შანსები სეზონში.

3. ჰიუსტონს შემადგენლობის არანორმალური სიღრმე აქვს

სეზონებს შორის შესვენებისას, პოპულარული იყო აზრი იმის შესახებ, რომ "ჰიუსტონს" არ აქვს ხარისხიანი სათადარიგოთა სკამი და მხოლოდ კრის პოლისა და ჯეიმს ჰარდენის იმედად უნდა იყოს. მაგრამ, ამ გუნდმა ორი მატჩის ჩატარება მოასწრო და გამოჩნდა, რომ ერიკ გორდონმა მნიშვნელოვნად მოუმატა შარშანდელ სეზონთან შედარებით, ლუკ მბა ა მუტე და პი ჯეი ტაკერი კი უფრო კარგი დამცველები გახდნენ. "ჰიუსტონის" სათადარიგოთა სკამის გაუმჯობესება - რეალური ფაქტია.

2. გოლდენ სტეიტს არ შეუძლია დრეიმონდ გრინის გარეშე წარმატება

მას შემდეგ, რაც დრეიმონდ გრინმა სეზონის სასტარტო მატჩში "ჰიუსტონის" წინააღმდეგ მუხლის ტრავმის გამო მოედანი დატოვა, "უორიორზის" თამაში მთლიანად აირია. გუნდი ისევე გამოიყურებოდა, როგორც 2016 წლის ფინალური სერიის იმ მონაკვეთში, როცა "გოლდენ სტეიტი" 3:1 უპირატესობას ანიავებდა. მაშინ გრინმა დისკვალიფიკაცია მიიღო და "კლივლენდმა" შეძლო სერიაში გარდატეხის შეტანა. ჩემპიონის მოთამაშეთა უდიდესი ნიჭის მიუხედავად, დრეიმონდ გრინი "უორიორზის" წარმატების განუყოფელი ნაწილია.

1. ლებრონ ჯეიმსი ჯერ ისევ მეფეა

ლებრონ ჯეიმსის სტატისტიკა სეზონის პირველ მატჩში: 29 ქულა, 16 მოხსნა და 9 პასი. მას ისევ არ აქვს რეგრესი და ისევ გამოიყურება, როგორც MVP-ის პრიზის ძირითადი პრეტენდენტი. ლებრონი უარს ეუბნება დაბერებას თითქოს კვლავ 20 წლისაა. აღმოსავლეთი კონფერენციის გუნდები უნდა მოემზადონ იმისთვის, რომ "მეფე" ისევ ყველას გააწბილებს პლეი ოფში და თავის მორიგ ფინალში გავა.

ყოველდღიური სპორტული გაზეთი "ლელო"

1148
მკითხველის კომენტარები / 0 /
მსგავსი ამბები
რუბრიკის სხვა სიახლეები