14, 16 და 18-წლამდელ მოჭადრაკეთა მსოფლიოს ჩემპიონატი: საპრიზოს შანსი ჯერ კიდევ რჩება 

ერთდღიანი შესვენების შემდეგ ინდურ მუმბაიში გუშინ განახლდა 14, 16 და 18-წლამდელ მოჭადრაკეთა მსოფლიოს ჩემპიონატი, რომელშიც საქართველოს რვა წარმომადგენელი მონაწილეობს.

მე-8 ტურში ჩვენებმა სამი შეხვედრა მოიგეს, ოთხში მეტოქეებს დაუზავდნენ და 18-წლამდელ გოგონებში ელენე კოსტავამ დათმო ორთაბრძოლა.

შეჯიბრების დასრულებამდე სამი ტურით ადრე, მართალია, მეტოქეები საგრძნობი უპირატესობით უსწრებენ, მაგრამ საპრიზო ადგილებზე გასვლის თეორიულ შანსს ქართველთაგან ნიკოლოზ კაჭარავა და ნიკოლოზ პეტრიაშვილი ჯერ კიდევ ინარჩუნებენ.

14-წლამდელებში ნიკოლოზ დარსაძე გუშინ თეთრი ფიგურებით იანის მიერინსს (ლატვია) შეუთანხმდა ყაიმზე და 2.5 ქულით მე-80 ადგილზეა. 7 ქულით მასპინძელი აბინანდხანი მეწინავეობს. გოგონებში მარიამ დოლაკიძემ პრასანსა პრემანატთან (შრი-ლანკა) გაიყო ქულა და 3 ქულით მესამოცეა. 6.5-6.5 ქულით პირველ-მესამე ადგილებს ელინა როებერსი (ჰოლანდია), რავი რაკშიტა (ინდოეთი) და ეკატერინა ნასიროვა (რუსეთი) იყოფენ.

16-წლამდელებში ნიკოლოზ კაჭარავამ თეთრი ფიგურებით პოლონელ მიეჟკო მისს აჯობა და 5.5 ქულით მეხუთე-მეთოთხმეტე ადგილებს ინაწილებს, კოეფიციენტით მე-12 ადგილზეა. 7 ქულით ჰანს ნიემანი (აშშ) მეწინავეობს. 4 ქულით გიგა გოდერძიშვილს 36-ე ადგილი უკავია. ამ ასაკის გოგონებში თბილისელმა იანა ენგიბარიანმა სინდი ჟანი (აშშ) დაამარცხა 4 ქულით მე-40 ადგილზე გადაინაცვლა.

18-წლამდელებში ნიკოლოზ პეტრიაშვილმა შავებით რამაზან ჟალმახანოვთან (ყაზახეთი) ქულა გაიყო. 5 ქულით მე-14 ადგილზეა და ლიდერებს - არიან გოლამსა (ირანი) და პრაგნანდხაას (ინდოეთი) 1.5-1.5 ქულით ჩამორჩება. გიორგი ელაშვილი, რომელმაც გუშინ კამდარ აპარვა (ინდოეთი) დაამარცხა, 3.5 ქულით მხოლოდ 50-ეა. გოგონებში ელენე კოსტავამ ბელენ ბარერასთან (ჩილე) წააგო და 3 ქულით მასაც 50-ე ადგილი უკავია.
დღეს მე-9 ტურის ორთაბრძოლები გაიმართება.

ყოველდღიური სპორტული გაზეთი "ლელო"
142
მკითხველის კომენტარები / 0 /
მსგავსი ამბები
რუბრიკის სხვა სიახლეები
;