17-წლამდელ ხელბურთელ გოგონათა ჩემპიონატი - ვის შეხვდება ბრინჯაო?

დასასრულს მიუახლოვდა საქართველოს 17-წლამდელ ხელბურთელ გოგონათა 2018-2019 წლების ჩემპიონატი, რომელშიც საპრიზო ადგილებისთვის ცხრა გუნდი იბრძვის.

უკვე გაირკვა ჩემპიონის ვინაობა - გუშინ 2018 წლის მესამეადგილოსანმა ფოთის „ოქროს ვერძმა“ (ნინი ჯგერენაია, ლანა გოგია, ციცინო ბჟალავა, ნინო რურუა, ნინო გრიგოლია, ნინა ვართანიანი, ალისია კუპრიევა, არიანა კარბაია, ანა კობახია, ხათუნა გოგუა, ლიკა ხურცილავა, მწვრთნელები - გელა ჟვანია, დარეჯან გეფერიძე, თემურ ჭანტურია) ძალების დაუძაბავად აჯობა თბილისის „მამულს“ 21:9 და შეჯიბრების დამთავრებამდე 2 ტურით ადრე სხვებისთვის მიუწვდომელი აღმოჩნდა. 

წინა დღეს გახდა ცნობილი ვერცხლის მედლის მფლობელთა ვინაობა - შარშანდელმა ჩემპიონმა „აჭარამ“ 34 ქულა მოაგროვა და უახლოეს მდევარს 6 ქულით გაუსწრო. უმოტივაციოდ დარჩენილმა ზღვისპირელებმა 22-ე ტურში სათანადო მეტოქეობა ვერ გაუწიეს თბილისის „პეგასს“ და შვიდბურთიანი სხვაობით დამარცხდნენ. 

ტურის ცენტრალურ მატჩში ერთმანეთს დაუპირისპირდნენ შარშანდელი ვერცხლის პრიზიორი თბილისის „ქარიშხალა“ და „სამტრედია“. ეს ორი გუნდი ბრინჯაოს მედლებს ეცილება ერთმანეთს. დაძაბული შეხვედრა დედაქლაქელებმა 27:20 მოიგეს. ამის მიუხედავად, მესამე ადგილის ბედი ჯერ კიდევ გაურკვეველია: „სამტრედიას“ კონკურენტთან შედარებით თამაშით და ქულით მეტი აქვს. ჩემპიონატის ბოლომდე ორ მატჩს გამართავს „პეგასა“ და „ყვარელთან“, „ქარიშხალა“ კი ბოლო ორი დღის განმავლობაში „წყალტუბოსთან“, „ბათუმსა“ და „აჭარასთან“ გაარკვევს ურთიერთობას. მესამე ადგილის შანსი რჩებოდა „ყვარელსაც“, მაგრამ გუშინ „ბათუმთან“ მარცხით ეს შესაძლებლობა ხელიდან გაუშვა. 

- ჩემპიონობის მოპოვებამ ძალიან გაგვახარა. მადლობა გოგონებსა და მწვრთნელებს, რომლებმაც ოქროს მედლების მოსაპოვებლად არაფერი დაიშურეს. ეს გამარჯვება ორმაგად დასაფასებელია, რადგან წლევანდელი ჩემპიონატი, შარშანდელთან შედარებით, უფრო მაღალი დონისაა, - გვითხრა დარეჯან გეფერიძემ. - პირველობის მონაწილე გოგონებმა ერთი წლის განმავლობაში კარგი საშეჯიბრო გამოცდილება შეიძინეს და კონკურენტებთან მატჩებიც ბევრად დაძაბულად წარიმართა.

2018 წელს „ოქროს ვერძმა“ მესამე ადგილი დაიკავა. მართალია, თავიდანვე საჩემპიონო გუნდი გვყავდა, მაგრამ ტრავმებმა შეგვიშალა ხელი. საქართველოს ნაკრების წევრი, ჩვენი ლიდერი ნინი ჯგერენაია თითქმის მთელი სეზონის განმავლობაში გვაკლდა. წლეულს იგი კარგ ფორმაშია. თანაგუნდელებიც მხარს უბამენ. ბევრი პერსპექტიული მოთამაშე გვყავს, სამი მათგანი - ჯგერენაია, ლანა გოგია და ციცი ბჟალავა საქართველოს 17-წლამდელთა ნაკრების წევრები არიან. ამ გუნდს სათავეში უდგას „ოქროს ვერძის“ გამოცდილი მწვრთნელი გელა ჟვანია და დარწმუნებული ვარ, საქართველოს ნაკრები წლევანდელ ევროპის ჩემპიონატში წარმატებით ითამაშებს. 

ჩვიდმეტწლამდელების გარდა, სხვა ასაკის ხელბურთელებშიც გვაქვს წარმატებები: ქალთა ჩემპიონატში რეგულარული სეზონის დასრულების შემდეგ ფინალურ ოთხეულში ვართ და 21-23 მაისს პლეი ოფში მედლებისთვის ვიბრძოლებთ. 15-წლამდელმა გოგონებმა და 17-წლამდელმა ვაჟებმა ჩემპიონატები მეხუთე ადგილებით დაასრულეს, ხოლო 15-წლამდელი ბიჭები დასკვნითი ეტაპის წინ ოთხეულში არიან და საპრიზო ადგილების რეალურ შანსს ინარჩუნებენ. 

შედეგები, ალბათ, ბევრად უკეთესი გვექნებოდა, მაგრამ ნორმალური სავარჯიშო პირობები არ გვაქვს: ჩვენი დარბაზის რემონტს საშველი არ დაადგა - ისევ კალათბურთის დარბაზს ვართ შეკდლებული, სადაც მხოლოდ ერთი თვის წინ დროებით კარები დაგვიდგეს. თორემ მანამდე ამ სიამოვნებასაც მოკლებული ვიყავით. იმედია, მალე ჩვენს დარბაზსაც ეშველება და ფოთელი ხელბურთელებიც უფრო მაღალი მაჩვენებლებისთვის იბრძოლებენ.

6 მაისი. ბათუმი-ყვარელი 17:15, აჭარა-პეგასი 13:20, ქარიშხალა-სამტრედია 27:20, ყვარელი-წყალტუბო 26:22, პეგასი-ბათუმი 21:11, ფოთი-მამული 21:9. 

თ მ ფ წ ბ ქ
ფოთი 22 20 1 1 413:272 41
აჭარა 22 17 0 5 453:328 34
სამტრედია 22 13 2 7 387:342 28
ქარიშხალა 21 13 1 7 506:424 27
ყვარელი 22 11 2 9 415:371 24
პეგასი 22 11 2 9 402:362 24
ბათუმი 23 4 1 18 274:406 9
წყალტუბო 22 3 1 18 273:441 7
მამული 22 2 0 20 332:509 4
7 მაისი. ყვარელი-ფოთი, წყალტუბო-ქარიშხალა, სამტრედია-პეგასი, მამული-აჭარა, ქარიშხალა-ბათუმი
8 მაისი. მამული- წყალტუბო, აჭარა-ქარიშხალა, სამტრედია-ყვარელი, ფოთი-პეგასი

ყოველდღიური სპორტული გაზეთი "ლელო"
291
მკითხველის კომენტარები / 0 /
მსგავსი ამბები
რუბრიკის სხვა სიახლეები
;