19 წლის გია ხარაიშვილის დებიუტი საფრანგეთის სარაგბო ელიტაში და ნარიაშვილის ტრავმა

საფრანგეთის სარაგბო ჩემპიონატის ელიტურ, პირველ დივიზიონში რეგულარული გათამაშების დასრულებამდე 11 ტური დარჩა.

ეს საკმარისი რაოდენობაა თამაშებისა, რათა სატურნირო ცხრილში ბევრი რამ რადიკალურად შეიცვალოს. ამჟამად კი პლეი ოფში გასვლის რეალური შანსი ქართველ მორაგბეთა ოთხ გუნდს აქვს. ესენია: „კლერმონი“, „ბორდო“, „სტად ფრანსე“ და „რასინგი“.

დავით ზირაქაშვილის, ვიქტორ კოლელიშვილისა და ბექა კაკაბაძის „კლერმონმა“ სტუმრად ითამაშა ქვეყნის მოქმედ ჩემპიონ „კასტრთან“ და 16:24 დამარცხდა. „ვულკანებმა“ ამ წაგების შედეგად ლიდერობა დაკარგეს და ის „ტულუზს“ დაუთმეს, რომელმაც, თავის მხრივ, საკუთარ მოედანზე დავით ქუბრიაშვილისა და ბექა გიგაშვილის „გრენობლს“ მოუგო - 19:16.

ზირაქაშვილმა თავიდან ბოლომდე ითამაშა, ქუბრიაშვილი ძირითად შემადგენლობაში იყო და გიგაშვილმა ის 49-ე წუთზე შეცვალა. სხვა ქართველ მორაგბეებს არ უთამაშიათ.

„კლერმონი“ ახლა მეორე ადგილზეა. სამ „ქართულ გუნდს“ „ბორდოს“, „სტად ფრანსეს“ და „რასინგს“ ერთმანეთის მიყოლებით მე-5, მე-6 და მე-7 ადგილები უკავიათ. ბექა გორგაძის, ლექსო ყაულაშვილისა და ლაშა ტაბიძის „ბორდომ“ შინ დაამარცხა თამაზ მჭედლიძისა და გიორგი თეთრაშვილის „აჟენი“ - 25:17.
გორგაძეს დისკვალიფიკაცია აქვს, ყაულაშვილი და მჭედლიძე ტრავმირებულნი არიან, ტაბიძე განაცხადში არ იყო, თეთრაშვილი ძირითად შემადგენლობაში იყო და 55-ე წუთზე შეცვალეს.

გიორგი მელიქიძის „სტად ფრანსეს“ გასვლითი მატჩი მამუკა გორგოძის „ტულონთან“ დრამატული გამოდგა. პარიზელები მთელი მატჩის განმავლობაში ანგარიშში წინ იყვნენ. მასპინძლებმა გამარჯვება მეტოქეს ხელიდან ბოლო წამებზე გამოგლიჯეს - 33:30.

გორგოძე ძირითად შემადგენლობაში იყო, ის არბიტრმა 61-ე წუთზე გაასინბინა და ათი წუთის გასვლის შემდეგ მოედანზე აღარ დაბრუნებულა, მელიქიძე სათადარიგოთა შორის იყო, მაგრამ არ უთამაშია. გავრცელდა ინფორმაცია, რომ „ტულონის“ შერკინების კვაჭი ბადრი ალხაზაშვილი გუნდს ტოვებს. მან ორწლიანი კონტრაქტი „ლიონთან“ გააფორმა და მომავალ გუნდს ახალი სეზონიდან შეუერთდება.

პარიზული „რასინგის“ რიგებში კიდევ ერთი ახალგაზრდა ქართველი შერკინების ბურჯი გამოჩნდა. 19 წლის გია ხარაიშვილმა, რომელიც საქართველოს 20-წლამდელთა ნაკრების წევრია, რასინგის ძირითადი გუნდის კვართი პირველად მოირგო. პარიზელები სტუმრად დამარცხდნენ „ლიონთან“ - 11:32. ხარაიშვილი თამაშში 66-ე წუთიდან ჩაერთო, მასთან ერთად მოედანზე შევიდა ვასილ კაკოვინიც. გურამ გოგიჩაშვილი, ამჯერად, განაცხადში არ იყო.

მიხეილ ნარიაშვილის, ლევან ჩილაჩავას, კონსტანტინე მიქაუტაძისა და გელა აფრასიძის „მონპელიე“ სტუმრად „ლა როშელს“ მთელი მატჩის განმავლობაში უგებდა და მხოლოდ მატჩის მიწურულს დათმო უპირატესობა - 25:27. ნარიაშვილი ძირითად შემადგენლობაში იყო და 74-ე წუთზე შეცვალეს. მან მოედანი კოჭლობით დატოვა და ერთ წუთში მასპინძლებმა გამარჯვების მომტანი ლელოც მიითვალეს. ჩილაჩავა მოედანზე 41-ე წუთიდან გამოჩნდა, სხვა ქართველ მორაგბეებს არ უთამაშიათ.

XV ტური
კასტრი-კლერმონი 24:16, ბორდო-აჟენი 25:17, ლა როშელი-მონპელიე 27:25, პერპინიანი-პო 24:30, ლიონი-რასინგი 32:11, ტულუზი-გრენობლი 29:16, ტულონი-სტად ფრანსე 33:30

სატურნირო მდგომარეობა
1. ტულუზი - 54 ქულა, 2. კლერმონი - 52, 3. ლა როშელი - 46, 4. ლიონი - 44, 5. ბორდო - 43, 6. სტად ფრანსე - 42, 7. რასინგი - 40, 8. კასტრი - 37, 9. მონპელიე - 33, 10. ტულონი - 28, 11. პო - 28, 12. გრენობლი - 20, 13. აჟენი - 17, 14. პერპინიანი - 4.

ყოველდღიური სპორტული გაზეთი "ლელო"
969
მკითხველის კომენტარები / 0 /
მსგავსი ამბები
რუბრიკის სხვა სიახლეები
;