19 წლის დავით მუჯირი "ანთალიასფორში" ჩაირიცხა

"საბურთალოს" შემტევი ნახევარმცველი დავით მუჯირი თურქული სუპერლიგის ბინადარ "ანთალიასფორის" 19-წლამდელთა გუნდში ჩაირიცხა და ახალი კლუბის შემადგენლობაში სადებიუტო შეხვედრაც ჩაატარა. თურქეთის 19-წლამდელთა ლიგაში მუჯირის "ანთალიასპორმა" "ოსმანლისფორს" უმასპინძლა და 1:0 დაამარცხა. ქართველმა ფეხბურთელმა 90 წუთი ითამაშა.

მუჯირის ახალმა გუნდმა 5 ტურის შემდეგ 12 ქულა დააგროვა (4 მოგება, 1 მარცხი) და ერთ-ერთი ლიდერია. ამდენივე ქულა დააგროვა "ქონიასფორმა", რომელიც "ანთალიასფორს" ბურთების სხვაობით ჩამორჩება.

19 წლის უმცროსი დავით მუჯირი 35-ე საფეხბურთო სკოლაში ვარჯიშობდა, ბოლოს კი "საბურთალოს" ასაკობრივ გუნდში გახლდათ. "ანთალიასფორის" 19-წლამდელთა გუნდის ლეგიონერი მუჯირების ოჯახის მესამე თაობის ფეხბურთელია. ბაბუამისი, ერთ დროს თბილისის "დინამოს" მცველი - დავით მუჯირი გახლდათ, მამამისი კი საქართველოს ნაკრების ექსნახევარმცველი და ფეხბურთის ფედერაციის ამჟამინდელი გენერალური მდივანი - დავით მუჯირია.

* * *

ყველაზე ხანგრძლივი და უნიკალური დინასტია მეგრელაძეებს აქვთ. ქართული ფეხბურთის "ლორდის" (როგორც ნუგზარ ჯუღელმა "მონათლა"), მერაბ მეგრელაძის ბაბუა და მამა, ილია და ნოდარ მეგრელაძეები ოზურგეთის "მერცხალში" თამაშობდნენ და ორივე თავდამსხმელი გახლდათ. მერაბ მეგრელაძის ვაჟი, გია მეგრელაძე, ქუთაისის "ტორპედოს" ფორვარდი იყო და ერთხელ საქართველოს ნაკრებშიც უთამაშია (ამხანაგურ შეხვედრაში).

2008 წლის მარტში, საქართველოს ჩემპიონატის მე-15 ტურის შეხვედრაში, "ბორჯომის" მაშინდელმა თავდამსხმელმა გია მეგრელაძემ თბილისის "ამერს" ეფექტური ბურთი გაუტანა და "ასიანთა კლუბის" (საქართველოს ჩემპიონატების ბომბარდირები) წევრი გახდა.

ეს უპრეცედენტო ფაქტი იყო - "ასიანთა კლუბში" ერთდროულად მამა-შვილი, გია და მერაბ მეგრელაძეები შევიდნენ. მეგრელაძეებს 1994-95 წლებში ქუთაისის "ტორპედოში" ერთადაც უთამაშიათ.

რაც შეეხება საფეხბურთო დინასტიას, მას გიას ვაჟი, "ტორპედოს" ფორვარდი - უმცროსი მერაბ მეგრელაძე აგრძელებს, რომელიც საქართველოს 19-წლამდელთა ნაკრების წევრობის კანდიდატია.

ყოველდღიური სპორტული გაზეთი "ლელო"

4679
მკითხველის კომენტარები / 0 /
მსგავსი ამბები
რუბრიკის სხვა სიახლეები