2 მოგება და 3 მარცხი - 15-წლამდელთა ტალინური მონაგარი

2 მოგებითა და 3 მარცხით დაასრულა ევროპის ლიგის პირველი წრე საქართველოს 15-წლამდელთა ნაკრებმა.

ალექსი ჯაფარიძისა და დიმიტრი ჟაკობოვის გაწვრთნილმა გუნდმა ესტონეთში გამართული წრის ბოლო მატჩში მასპინძელი, ტალინის "კალევი" 49:41 დაამარცხა. ქართველებმა პირველი პერიოდი 4:12 წააგეს, თუმცა თამაში მალევე გამოასწორეს და 8 ქულის სხვაობით გაიმარჯვეს. 10-10 ქულით ლუკა ლიკლიკაძე და შალვა ჭეიშვილი გამოირჩნენ, ხოლო ლუკა ხუციშვილმა 8 ქულა დააგროვა.

ერთი დღით ადრე იყო ორი მატჩი, ბელარუსის "მინსკთან" და პოლონურ "პომერანიასთან". პოლონელებთან შეხვედრა ქართველებმა ბრძოლაში - 38:45 დათმეს.
9 ქულით ბომბარდირი ოთარ სულაკაური გახდა, ხოლო შალვა ჭეიშვილმა და ლუკა ხუციშვილმა 7-7 ქულა მიითვალეს.

ბელარუსებთან შეხვედრაში ალექსი ჯაფარიძის გაწვრთნილმა გუნდმა 54:44 გაიმარჯვა. ჩვენს ნაკრებს 12 ქულითა და 7 ჩაჭრით ლუკა ლიკლიკაძემ ულიდერა. 12 ქულა და 6 მოხსნა დააგროვა შალვა ჭეიშვილმა. 8 ქულა ლაშა მესხის ანგარიშზეა.

ქართველმა 15-წლამდელებმა ევროპის ახალგაზრდული ლიგა ბალტიისპირელებთან მატჩებით დაიწყეს: პირველი შეხვედრა ლატვიურ "რიგასთან" 46:50 დათმეს, მეორე მატჩში კი უკრაინის ნაკრებს შეხვდნენ და დამატებით დროში - 53:60 დამარცხდნენ.

უკრაინასთანაც შალვა ჭეიშვილმა იყოჩაღა - 12 ქულით ბომბარდირი გახდა, 10-10 ქულა ლუკა ლიკლიკაძისა და ლაშა მესხის ანგარიშზეა. 

რაც შეეხება "რიგასთან" დაპირისპირებას, ჩვენი გუნდი დაძაბულ ბრძოლაში - 46:50 დამარცხდა. ქართველებმა ვერ შეაჩერეს ლატვიელთა ორი კალათბურთელი - რიჩარდს კლანსკისი და დავიდს გრინბერგსი. ორივემ 22-22 ქულა მოაგროვა. საქართველოს ნაკრებში 16 ქულით ლუკა სუხიშვილი გამოირჩა. 10 ქულა ჩაიწერა საბა მურღულიამ.

აი, საქართველოს 15-წლამდელთა ნაკრების შემადგენლობაც: ლუკა ლიკლიკაძე, კოსტანტინე სუხიშვილი, საბა მურღულია, ლუკა დოლიძე, ლაშა მესხი, ნუგზარ ბოჭორიშვილი, გიორგი მოსიაშვილი, ლუკა ხუციშვილი, ელგუჯა ხვედელიძე, ოთო სულაკაური, გიორგი კუჭუხიძე, შალვა ჭეიშვილი.

ევროპის ლიგის მეორე წრეს ლატვიის ქალაქი კანდავა - 11-14 იანვარს უმასპინძლებს.

20 ოქტომბერი
რიგა-საქართველო 50:46

20 ოქტომბერი
საქართველო-უკრაინა 53:60 დ.დ.

21 ოქტომბერი
პომერანია-საქართველო 45:38

21 ოქტომბერი
მინსკი-საქართელო 44:54

22 ოქტომბერი
საქართველო-კალევი 49:41

ყოველდღიური სპორტული გაზეთი "ლელო"

784
მკითხველის კომენტარები / 0 /
რუბრიკის სხვა სიახლეები