2 ოვერტაიმი და სუპერსანახაობა 'ტორონტომ' მოიგო [VIDEO]

კავაი ლეონარდმა 36 ქულა დააგროვა, მათ შორის, რვა მეორე ოვერტაიმში, "ტორონტომ" 118:112 დაამარცხა "მილუოკი" და შეამცირა სხვაობა აღმოსავლეთი კონფერენციის ფინალურ სერიაში.

კანადურ კლუბს შეეძლო აქამდე არ მიეყვანა საქმე, მაგრამ ძირითადი დროის ბოლოს, პასკალ სიაკამმა ორიდან ორი საჯარიმო ააცილა და საჭირო გახდა დამატებითი დროის თამაში.

სიაკამმა დანაშაული მეორე ოვერტაიმში გამოისყიდა, როცა ბოლო წუთზე ბრუკ ლოპესს დაუფარა. ეს ბურთი რომ ჩავარდნილიყო, ანგარიში გათანაბრდებოდა და მესამე ოვერტაიმი დგებოდა დღის წესრიგში.

ლეონარდმა თავისი 36 ქულა 52 წუთში დააგროვა. ეს სათამაშო დრო მისი კარიერის რეკორდია, არადა, "ტორონტოს" ლიდერი მთელი მატჩის განმავლობაში ფეხს იტკიებდა.

"მილუოკის" ლიდერმა იანის ანტენტოკუნმპომ 16-დან მხოლოდ ხუთი ტყორცნა მოათავსა კალათში და სულ რაღაც 12 ქულას დასჯერდა. სამაგიეროდ, მის ანგარიშზე 23 მოხსნა მოდის. სტუმრების სასტარტო მოთამაშეებს თამაში არ წაუვიდათ. მათგან ყველაზე შედეგიანი ბრუკ ლოპესი იყო 16 ქულით. რომ არა სათადარიგოების - ჯორჯი ჰილისა და მალკოლმ ბროგდონის ჯამური 44 ქულა, "ბაქსს" მატჩში განადგურება არ აცდებოდა.

ისე კი, "ტორონტო" თითქმის სულ წინ იყო. "მილუოკი" ერთხელ სტარტზე დაწინაურდა, როცა გახსნა ანგარიში და მეორედ ეს გააკეთა მეორე ოვერტაიმის დასაწყისში. ეს იყო და ეს. ასე რომ, "ტორონტომ" სრულად დაიმსახურა ეს გამარჯვება.

ცალკე უნდა აღინიშნოს მარკ გასოლის სტატისტიკა. ესპანელმა პირველ ორ მატჩში რვა ქულა აიღო, ახლა კი 16 ქულა, 12 მოხსნა, შვიდი პასი და ხუთი დაფარება ჰქონდა, არადა, ხუთი პერსონალურით ითამაშა მეოთხედ მეოთხედის ნაწილი და ორი ოვერტაიმი.

"მილუოკიმ" პირველად წააგო ამ პლეი ოფში გასვლითი შეხვედრა.

აღმოსავლეთი
ტორონტო-მილუოკი 118:112 (2ო)
30:21, 28:30, 19:24, 19:21, 7:7, 15:9
ტ: ლეონარდი (36+9 მოხსნა+5 პასი), სიაკამი (25+11 მოხსნა), მ. გასოლი (16+12 მოხსნა+7 პასი+5 დაფარება), ლაური (11+5 პასი), გრინი (3+6 პასი) - სასტარტო; პაუელი (19), იბაკა (5+6 მოხსნა), ვანვლიტი (3+6 პასი).
მ: ლოპესი (16+6 მოხსნა), ანტენტოკუნმპო (12+23 მოხსნა+7 პასი+4 დაფარება), ბლედსოუ (11+5 პასი+3 ჩაჭრა), მიროტიჩი (10+3 ჩაჭრა), მიდლტონი (9+9 მოხსნა) - სასტარტო; ჰილი (24+7 მოხსნა), ბროგდონი (20, კონაუტონი (8), ილიასოვა (2).
სერია: 1-2

409
მკითხველის კომენტარები / 0 /
მსგავსი ამბები
რუბრიკის სხვა სიახლეები
;