2012 წლის შემდეგ: პირველი ქართველი NBA-ს დრაფტზე - გოგა ბითაძე

გოგა ბითაძემ ოფიციალურად შეიტანა NBA-ს ოფისში განაცხადი 2019 წლის დრაფტში მონაწილეობასთან დაკავშირებით. ამ ინფორმაციას ქართველი კალათბურთელის სერბ აგენტ მიშკო რაზნატოვიჩზე დაყრდნობით ამერიკის სპორტული საინფორმაციო მონსტრი ESPN ავრცელებს.

ბითაძემ იგივე გააკეთა შარშან ამ დროს, თუმცა მოგვიანებით განაცხადი გამოიტანა და დრაფტში მონაწილეობა წლით გადადო. ამ ერთ წელიწადში ქართველმა ცენტრმა ევროლიგის ვარსკვლავად ჩამოყალიბება მოასწრო. ის სერბულმა "მეგა ბემაქსმა" მონტერნეგრულ "ბუდუჩნოსტში" გაანათხოვრა, სადაც ბითაძემ შთამბეჭდავად ითამაშა და არამარტო ევროპა, მსოფლიო აალაპარაკა. თავად ESPN-ის სადრაფტო რეიტინგში ბითაძე მსოფლიოში მე-19 ადგილზეა, რაც საკმაოდ მაღალი საფეხურია.

სტატიაში ESPN-ის ჟურნალისტი ხაზს უსვამს, რომ საერთო სარგებლიანობით ბითაძე ევროლიგის ისტორიაში საუკეთესო კალათბურთლია თინეიჯერებს შორის. შარშან ლუკა დონჩიჩსაც არ ჰქონია საერთო შედეგიანობის ისეთი მაღალი ინდექსი, როგორც ეს მიმიდნარე სეზონში გოგას აქვს. ბითაძე 24 წუთში ევროლიგაში საშუალოდ 12.1 ქულა, 6.4 მოხსნას და 2.3 დაფარებას ასრულებდა. პერიმეტრსშიგნიდან მისი სროლების 60 პროცენტი აღწევდა მიზანს, რაც ძალიან მაღალი მაჩვენებელია.

ნბა-ს 2019 წლის დრაფტი 20 ივნისს გაიმართება და ამ დღეს შევიტყობთ, თუ რომელ ნომრად და ვინ აიყვანს ქართველ ამომავალ ვარსკვლავს.

შეგახსენებთ, რომ 1998 წელს პირველი ქართველი, რომელიც დრაფტზე აირჩიეს ვლადიმერ სტეფანია იყო. 2002 წელს ნიკოლოზ ცქიტიშვილი "დენვერმა" მე-5 ნომრად აირჩია, მომდევნო წელს, 2003-ში ზაზა ფაჩულია - "ორლანდომ" აიყვანა, ხოლო 2004-ში ვიქტორ სანიკიძე - "ატლანტა ჰოქსმა" და უმალ "სან ანტონიო სპურსს" დაუთმო. 

ბოლო ქართველი, რომელმაც დრაფტზე წამოაყენა კანდიდატურა და NBA-ში ითამაშა კიდეც თორნიკე სენგელია გახლდათ - 2012 წელს იგი მეორე წრეში "ფილადელფიამ" აიყვანა და იმავე საღამოს გამოცხადდა შენგელიას "ბრუკლინში" გადასვლის ამბავი.

ყოველდღიური სპორტული გაზეთი "ლელო"
3608
მკითხველის კომენტარები / 0 /
მსგავსი ამბები
რუბრიკის სხვა სიახლეები
;