2017 წლის 14 მოვლენა: მსოფლიოს, NBA-ს და ევროპის ჩემპიონები

1. მასპინძელია საქართველო...

ბოლო წლებია, სპორტული საქართველო საკუთარ ქვაბში აღარ იხარშება და ხშირად მასპინძლობს საერთაშორისო ტურნირებს. ბუნებრივია, ყველაზე 2015 წლის უეფას სუპერთასის მასპინძლობა იყო, როცა "დინამო არენაზე" ლეო მესი და კომპანია ცოცხლად ვნახეთ.

2017 წელი ამ მხრივ განსაკუთრებული იყო - საქართველომ რამდენიმე ძალზე საინტერესო ტურნირს უმასპინძლა. მაის-ივნისში ჩვენი ქვეყანა ოვალური ბურთის მიმდევართა ყურადღების ცენტრში მოექცა, როცა თბილისსა და ქუთაისში მსოფლიოს 20-წლამდელთა ჩემპიონატს უმასპინძლა რაგბიში.

ტურნირი ახალი ზელანდიის ნაკრებმა მოიგო, ხოლო უმცროსმა "ბორჯღალოსნებმა" პლანეტის 12 საუკეთესო გუნდში მე-10 ადგილი დაიკავეს, მსოფლიოს კი თედო აბჟანდაძის ლელო ვაჩუქეთ, რომელიც წლის საუკეთესო ლელოებში ერთ-ერთი ნომინანტი იყო.

ივლისში საქართველომ 19-წლამდელ ფეხბურთელთა ევროპის ჩემპიონატს უმასპინძლა, რომელიც ინგლისის ნაკრებმა მოიგო. სექტემბერში თბილისში უპრესტიჟულესი ჭადრაკის მსოფლიოს თასი ვიხილეთ, სადაც თვით მსოფლიოს ჩემპიონი მაგნუს კარლსენი გვეწვია.

ჩვენმა ქვეყანამ აგრეთვე მსოფლიოს ახალგაზრდულ ჩემპიონატს უმასპინძლა ვაჟ ხელბურთელთა შორის. ასევე ჩვენთან გაიმართა ევროპის ჩემპიონატი ფარიკაობაში. საქართველომ, აზერბაიჯანთან ერთად, ქალთა ევროპის ჩემპიონატს უმასპინძლა ფრენბურთში...

2. 15 წლის შემდეგ

გარდამავალი სეზონის შემდეგ საქართველოს ჩემპიონატი პირველად ჩატარდა გაზაფხული-შემოდგომის ფორმატით. ვერ ვიტყვით, რომ ამ სიახლემ ჩემპიონატის დონე აამაღლა, მაგრამ ერთი რამ უდავოა - ტურნირის კვანძი მის პიკზე გაიხსნა.

თბილისის "დინამომ" ბოლოსკენ გაანიავა უპირატესობა მდევრებთან და ყველაფერი ბოლო ტურში, ქართულ "კლასიკოში" გადაწყდა. მასპინძლებს ფრეც ჰყოფნიდათ ჩემპიონობისთვის, ქუთაისის "ტორპედოს" კი მხოლოდ მოგება აძლევდა ხელს.

დრამატული დასასრული ვიხილეთ - თორნიკე კაპანაძის გოლით დაწინაურებული "ტორპედო" კინაღამ დაისაჯა ბოლოს, მაგრამ "დინამოს" კაპიტანმა ოთარ კიტეიშვილმა როინ კვასხვაძეს პენალტი ვერ გაუტანა. ასე გახდა საქართველოს ნაკრების 28 წლის გოლკიპერი ჩემპიონატის გმირი.

კახა ჩხეტიანის "ტორპედომ" 15 წლის წინ დაკარგული ჩემპიონის ტიტული დაიბრუნა. 2017 წლის ეროვნული ლიგის საუკეთესო ბომბარდირი 25 გოლით "ლოკომოტივის" ფორვარდი ირაკლი სიხარულიძე გახდა.



3. ისტორიაში პირველი ოქროს დუბლი

პარიზში თავისუფალით სტილით მოჭიდავე ქართველებმა ისტორია დაწერეს - მართალია, საჭიდაო ქვეყნად ვითვლებით, მაგრამ ამ სტილში ერთდროულად მსოფლიოს ორი ჩემპიონი არასოდეს გვყოლია (დამოუკიდებელი საქართველოს ისტორიაში).

21-27 აგვისტოს, გადაჭედილ "ბერსიში" კი ეს მოხდა - ქართველმა მოჭიდავეებმა 2 ოქრო და 3 ბრინჯაო მოიპოვეს. თითქმის არსაიდან გაისროლა საჭიდაო სამყაროში ზურაბ იაკობიშვილმა, ვინც 65 კგ წონით კატეგორიაში გახდა მსოფლიოს ჩემპიონი, ხოლო მთელი ტურნირის მშვენება გენო პეტრიაშვილისა და მანამდე დაუმარცხებელი თურქი ტაჰა აკგიულის ორთაბრძოლა იყო. გენო მოერია თურქს და მსოფლიოს ჩემპიონი. უმედლოდ არც ჩვენი ოლიმპიური ჩემპიონი ვლადიმერ ხინჩეგაშვილი (ბრინჯაო) დარჩენილა.

პარიზამდე იყო ნოვი სადი, სადაც ევროპის ჩემპიონატი ჩატარდა და ხინჩეგაშვილი ევროპის ჩემპიონი გახდა. გენომ და ზურამ მაშინ ბრინჯაოს მედლები მოიპოვეს.
ბერძნულ-რომაულ სტილში წელიწადი ჩავაგდეთ - მხოლოდ ერთი ოქრო - ევროპის ჩემპიონი ზურაბ დათუნაშვილი (80 კგ) გახდა.

4. სამი ოქრო რუსეთიდან

ძიუდოისტებმა საერთაშორისო სეზონი სანკტ პეტერბურგის მასტერსით დაასრულეს და ეს დასასრული ტრიუმფული გამოდგა - 3 ოქრო, 1 ვერცხლი, 1 ბრინჯაო და გუნდების არაოფიციალურ ჩათვლაში პირველი ადგილი. ასეთი იყო ქართველთა შედეგი.

გაიბრწყინა ჩვენმა სამმა ლიდერმა ბექა ღვინიაშვილმა (90 კგ), ვარლამ ლიპარტელიანმა (100) და გურამ თუშიშვილმა (100+). ოლიმპიურმა ჩემპიონმა ლაშა შავდათუაშვილმა (73) ვერცხლი, ხოლო ვაჟა მარგველაშვილმა (66) ბრინჯაო მოიპოვეს.

წლის მთავარი ტურნირი, აგვისტოში ბუდაპეშტში ჩატარებული მსოფლიოს ჩემპიონატი, ჩვენთვის ასეთი წარმატებული არ ყოფილა - ლიპარტელიანმა ვერცხლი მოიპოვა, მარგველაშვილმა და უშანგი მარგიანმა - ბრინჯაო.



5. რუსეთი ბეჭებზე

20-23 აპრილს ვარშავამ ძიუდოში ევროპის ჩემპიონატს უმასპინძლა. ეს ტურნირი ჩვენთვის ორი რამით იყო გამორჩეული 100+ კგ წონით კატეგორიაში ქართული ფინალი ვიხილეთ! - გურამ თუშიშვილმა ფინალში ადამ ოქრუაშვილს მოუგო და ევროპის ჩემპიონი გახდა. ინდივიდუალურში იყო კიდევ ერთი მედალი - ბექა ღვინიაშვილის ბრინჯაო.

თუშიშვილი წლეულს ერთ-ერთი გამორჩეული ქართველი სპორტსმენი იყო, მან ტედი რინერთან შეუპოვარი ბრძოლით ძიუდოს მთელი სამყარო აალაპარაკა და უცნაური ჰეთ თრიკიც შეასრულა (ევროპა მოიგო, პეტერბურგის მასტერსი მოიგო და ქართულ ჭიდაობაში - აბსოლუტური ფალავნობა).

ვარშავაში მთავარი ტრიუმფი გუნდურ ჩემპიონატში გველოდა, ირაკლი ცირეკიძის გუნდი ფინალში გავიდა, სადაც რუსეთის ნაკრები დაამარცხა.

6. რეკორდი და ანასტასია

ლაშა ტალახაძე არა მარტო მსოფლიოს ჩემპიონი გახდა, არამედ, მან ახალი მსოფლიოს რეკორდიც დაამყარა. ანაჰაიმში ლაშამ ორი დისციპლინის ჯამში 477 კილოგრამი ასწია, რაც მსოფლიოს ახალი მიღწევაა. მან მეორე ადგილზე გასულ ირანელ საიდ ალიჰოსეინს 23 კილოგრამით აჯობა. ტალახაძემ თავისივე მსოფლიოს რეკორდი გააუმჯობესა 3 კილოგრამით.

ამ ჩემპიონატზე კიდევ ერთი დიდი მოვლენა მოხდა - ქართული სპორტის ისტორიაში პირველი ქალი მსოფლიოს ჩემპიონი გვყავს ძალოსნობაში, ანასტასია გოტფრიდი.

აქვე აღვნიშნავთ 23 წლის შოთა მიშველიძის (62 კგ) ბრინჯაოს მედალს მსოფლიოს ჩემპიონატზე.
აპრილის დასაწყისში ხორვატულ სპლიტში ევროპის ჩემპიონატი გაიმართა და იქაც ლაშა ტალახაძე იყო ტრიუმფატორი.



7. თეოდორა ისტორიაში შევიდა

თბილისმა 12-17 ივნისს ფარიკაობაში ევროპის ჩემპიონატს უმასპინძლა, რომელშიც ისტორია დაწერა ქართველმა ხმლით მოფარიკავე თეოდორა კახიანმა, ვინც პირველი ქართველი ევროპის ჩემპიონია. ფინალში მან იტალიელ როსელა გრეგორიოს 15:8 აჯობა.

ამ ტურნირზე კიდევ ერთი მედალი მოვიპოვეთ - ხმლით მოფარიკავე ვაჟებში სანდრო ბაზაძე მესამე ადგილზე გავიდა და ბრინჯაოს მედალი მიიღო. 24 წლის ბაზაძე ამჟამად მსოფლიო რეიტინგში 82 ქულით მე-18 ადგილზეა. ევროპის ჩემპიონატზე ერთდროულად ორი მედალიც ისტორიაში პირველად მოვიპოვეთ.

8. საუკეთესო სეზონი ბოლო 17 წელიწადში

საერთო შეფასებით, ბოლო 17 წელიწადია, სამოყვარულო კრივში ასეთი წარმატებისთვის არ მიგვიღწევია, ახალგაზრდულ ასპარეზზე ჩვენმა მოკრივეებმა გაგვახარეს, თუმცა მთავარი მიღწევა მსოფლიოს ჩემპიონატის მედალია.

2009 წლის მერე პირველად, საქართველოს მსოფლიოს ჩემპიონატზე მედალი არ ღირსებია და აი, ოთარ ერანოსიანმა მხოლოდ ნახევარფინალური ორთაბრძოლა დათმო და ბრინჯაოს მედალი მოიპოვა.

ერანოსიანი 60 კილოგრამ წონით კატეგორიაში ასპარეზობს, მსოფლიოს ჩემპიონატი კი გერმანულ ჰამბურგში ჩატარდა. 22-წლამდელებში ევროპის ჩემპიონი გვყავს - ესკერხან მადიევი, ახალგაზრდულში - სახილ ალახვერდიევი.

9. მსოფლიოს ჩემპიონი ფაჩულია

NBA-ს ჩემპიონებს ამერიკაში ხშირად მსოფლიოს ჩემპიონებს უწოდებენ და არის ამაში ლოგიკაც - ასოციაციაში ხომ პლანეტის საუკეთესო კალათბურთელები საუკეთესო გუნდებში თამაშობენ.

აი, სწორედ ასეთი მსოფლიოს ჩემპიონი გახდა ქართველი კალათბურთელი და თან, ამ ყველაფერში თავისი არცთუ ისე მცირე წვლილი მიუძღვის - ზაზა ფაჩულია, "გოლდენ სტეიტის" სასტარტო ცენტრფორვარდი, გუნდთან ერთად ასოციაციის ჩემპიონი გახდა.

"უორიორსმა" "კლივლენდს" 4:1 მოუგო და ზაზამ ხუთივე შეხვედრაში ითამაშა. ასე მიიღო პირველმა ქართველმა NBA-ს საჩემპიონო ბეჭედი. ზაზამ კარგი ასპარეზობით "გოლდენ სტეიტისგან" კიდევ ერთი, 1-წლიანი კონტრაქტი დაიმსახურა და საჩემპიონო ბეჭდის კიდევ ერთი შანსიც.



10. იყო ლიტვა, მაგრამ არ იყო პლეი ოფი

საქართველოს საკალათბურთო ნაკრებმა ევრობასკეტზე იასპარეზა. "აღთქმულ მიწაზე" ჩვენი გუნდის გამოსვლა შედეგის თვალსაზრისით არ იყო დამაკმაყოფილებელი - გუნდი ჯგუფში ჩარჩა, თუმცა იყო გაბრწყინებებიც - 31 აგვისტოს საკალათბურთო სამყარო მხოლოდ ჩვენზე ლაპარაკობდა, რადგან ილიას ზუროსის გუნდმა სენსაციურად დაამარცხა ლიტვა - 79:77.

სამწუხაროდ, ამას შესაბამისი გაგრძელება არ მოჰყოლია, რადგან ჩვენმა გუნდმა მხოლოდ ერთი შეხვედრა მოიგო - ოვერტაიმში მასპინძელი, ისრაელის ნაკრები დაამარცხა. ორი გამარჯვება კი საკმარისი არ აღმოჩნდა ჯგუფიდან გასასვლელად. საბოლოოდ, საქართველოს ნაკრებმა ევროპის ჩემპიონატზე მე-17 ადგილი დაიკავა.

ჯგუფში ჩარჩენის მიუხედავად, ზუროსის მუშაობა დადებითად შეფასდა და მას კონტრაქტი კიდევ 2 წლით გაუხანგრძლივდა, ხოლო ამ თაობის გუნდმა ალბათ, ბოლო ევრობასკეტი ითამაშა, რადგან ნაკრებში თაობათა ცვლა მიმდინარეობს.

11. დიდები მიდიან

ბოლო წლების ორმა ქართველმა ტოპსპორტსმენმა მამუკა გორგოძემ (რაგბი) და ზაზა ფაჩულიამ (კალათბურთი), რამდენიმეთვიანი შუალედით ეროვნული ნაკრებიდან წასვლის შესახებ განაცხადეს.

გორგოძეც და ფაჩულიაც მიიჩნევენ, რომ მათ თავიანთი წვილილი უკვე შეიტანეს საქართველოს ნაკრებში და ახლა ახალგაზრდებისთვის ასპარეზის დათმობის დროა. ზაზა ფაჩულიამ ეროვნულ გუნდში 75 მატჩი ითამაშა, მამუკა გორგოძემ - 71 კეპი და 26 ლელო მიითვალა.



12. ფინალი და თითქმის ტოპ-50

თანამედროვე საჩოგბურთო ელიტის ზღურბლზე ერთი სპორტსმენი გვყავს - ნიკოლოზ ბასილაშვილი, რომელიც წლეულს ძალიან ახლოს იყო ტოპ-50-ში მოხვედრასთან - ივნისში 25 წლის ქართველი მსოფლიოს 51-ე ჩოგანი იყო, ხოლო წელიწადი 59-ე პოზიციაზე დაასრულა.

13-19 თებერვალს წარმატებით იასპარეზა მემფისის (აშშ) 642-ათასიან ტურნირში, სადაც ოთხი მეტოქე ჩამოიცილა გზიდან, მათ შორის იმ დროისთვის მსოფლიოს მე-20 ჩოგანი ივო კარლოვიჩი და ფინალში გავიდა. ფინალში ბასილაშვილი ამერიკელ რაიან ჰარისონთან დამარცხდა.

სეზონში ქართველის ანგარიშზე კიდევ 3 ნახევარფინალია. წლეულს ნიკამ როლან გაროსის 1/16 ფინალში ითამაშა, რაც დიდ სლემებზე მისთვის საუკეთესო მიღწევაა კარიერაში.

13. პირველი ევროპის ჩემპიონი

საჭადრაკო ქვეყანა ნამდვილად ვართ, მით უფრო ქალთა ჭადრაკში, მაგრამ ნანა ძაგნიძე პირველი ქართველი მოჭადრაკეა, რომელიც ევროპის ჩემპიონი გახდა (ინდივიდუალურში). ძაგნიძემ ლატვიის დედაქალაქ რიგაში იმარჯვა. აქვე აუცილებლად უნდა გავიხსენოთ, რომ ჭადრაკში ევროპის ჩემპიონატების ისტორია 2000 წლიდან იწყება.

ევროპის გუნდურ ჩემპიონატზე საქართველოს ქალთა ნაკრებმა მე-2 ადგილი დაიკავა რუსეთის შემდეგ.

14. ჩვენი კაცი ნიჩბოსნობაში

ზაზა ნადირაძემ სპორტის სამყაროს თავი რიოს ოლიმპიადაზე გააცნო, როცა ერთადგილიანი კანოეთი ოლიმპიადაზე მეხუთე ადგილზე გავიდა. წლეულს 23 წლის ნიჩბოსანმა კიდევ უფრო კარგად იასპარეზა და ჩეხეთში მსოფლიოს ჩემპიონატზე ვერცხლის მედალი მოიპოვა.

200-მეტრიან დისტანციაზე მან წინ მხოლოდ ბელარუსი არტიომ კოზირი გაუშვა. ევროპის ჩემპიონატზე პლოვდივში ზაზა მესამე იყო. მოკლედ, მცხეთელი სპორტსმენი საქართველოს ნიჩბოსნობის ისტორიას წერს...



4212
მკითხველის კომენტარები / 1 /
არჩილ
0
შობა-ახალწელს ვულოცავ სრულიად საქართველოს და ჩვენს სასიქადულო და საამაყო სპორტსმენებს. კიდევ ბევრჯერ გაეხარებინოთ გულშემატკივრების გულები. რედაქციას კი ვთხოვ, რომ გამართულად წეროს, თორემ რჩება შთაბეჭდილება, რომ ქართული ენის არამცოდნე წერს ამ სტატიებს. მაგალითად: თითქმის არსაიდან გაისროლა საჭიდაო სამყაროში ზურაბ იაკობაშვილმა, ვინც 65 კგ კატეგორიაში გახდა მსოფლიო ჩემპიონი. "ვინც" არასწორია და უნდა იყოს რომელიც გახდა მსოფლიო ჩემპიონი.
მსგავსი ამბები
რუბრიკის სხვა სიახლეები
;