2018 წლის საუკეთესო სპორტსმენი. ლაშა ტალახაძის ისტორიული მიღწევები, ოჯახი და კარიერა - გაიცანით სულ სხვანაირი ჩემპიონი

ეს შენი წონაა! - ბეჭზე ხელი დაჰკრა მწვრთნელმა.

- ვიცი. - ისე უპასუხა, შტანგისთვის მზერა არ მოუცილებია.

- აბა, მიდი!

ბიძგი არც დასჭირვებია. ახალგაზრდა გოლიათმა მსუბუქად აირბინა კიბე და ფიცარნაგის კიდესთან პირჯვარი გადაიწერა. „ბორბლებზე“ შემდგარ რკინას რომ მიუახლოვდა, თავისთვის რაღაც ჩაიჩურჩულა და გაირინდა...

წამის გაელვება და, ბამბასავით ატაცებული 220-კილოგრამიანი შტანგა გოლიათის თავზემოთ გაქვავდა - არის მსოფლიოს რეკორდი...

ეს იყო შარშან ამერიკულ ანაჰაიმში, სადაც ლაშა ტალახაძემ მეორედ მოიპოვა მსოფლიოს ჩემპიონობა, თანაც ორი მსოფლიოს რეკორდით - 220 კილო აიტაცა და ორჭიდში 477 კილოს მოუყარა თავი.

საჩხერელი ოლიმპიური ჩემპიონისთვის 2018 წელიც უხვმოსავლიანი აღმოჩნდა. თავმდაბალი, მორწმუნე კაცია და სამებაც სწყალობს:

წლეულს მესამედ გახდა ევროპის ჩემპიონი!

ბუქარესტში სამი ოქროს მედალი დაიმსახურა!

წლეულს მესამედ მოიპოვა მსოფლიოს ჩემპიონობა!

აშხაბადშიც მკერდი სამი ოქროთი დაიმშვენა!

ჩაროზად - მსოფლიოს შვიდი რეკორდი დაამყარა!

წლეულს გაზაფხულზე ევროპა მოიგო, მერე - დაოჯახდა, სეზონი კი მსოფლიოს ჩემპიონობით დააგვირგვინა!

წლეულს ჯერ ეროვნულმა ოლიმპიურმა კომიტეტმა, მერე - სპორტის სამინისტრომ, ბოლოს კი საქართველოს სპორტის ჟურნალისტთა ასოციაციამ აღიარა ქვეყნის საუკეთესო სპორტსმენად!

მოდი თქვი, სამება არ სწყალობსო!

მირკანული ალაფი

მკა გაზაფხულზე დაიწყო:

მარტში ძალოსანთა ევროპის ჩემპიონატი, რომელსაც რუმინეთის დედაქალაქმა უმასპინძლა, საქართველოს ჰიმნით დაიხურა - ქართული ჰანგები ლაშა ტალახაძის პატივსაცემად დაიღვარა დარბაზში.

ვაჟთა მძიმე წონაში რიოს ოლიმპიადის გამარჯვებულმა, მსოფლიოს და ევროპის ორ-ორგზის ჩემპიონმა მეორე ცდაზე 210 კგ იოლად აიტაცა, მესამე მისვლისას კი მსოფლიოს რეკორდის დამყარება განიზრახა, მაგრამ 221-კილოგრამიანი შტანგა ამჯერად გაუჯიუტდა.

რატომღაც შარშან ამერიკაში მსოფლიოს ჩემპიონატზე გამგზავრების წინ მისი ნათქვამი სიტყვები გამახსენდა: „ზოგს შტანგა უსულო ჰგონია, ჩემთვის კი ის სულიერია, უნდა მოარჯულო, დამჯერი გახადო, ძალოსანსა და რკინას შორის ჰარმონია უნდა დამყარდეს, უნდა მოგენდოს, რომ მოძრაობისას სასურველ წონაზე წამოგყვეს, თორემ თუ გაგიჯიუტდა, არაფერი გამოვა“.

ნეტავ, რატომ გაუჯიუტდა, - რატომღაც გამკენწლა გულში, მაგრამ მალე ყველაფერი ჩვეულ კალაპოტში ჩადგა: ქართველმა გოლიათმა მეორე ცდაზე 247 კილო აკრა (მესამე ცდა აღარც გამოუყენებია) და როგორც ამ მოძრაობაში, ისე ორჭიდში (457 კგ) პირველობა არავის დაუთმო. საერთოდ კი ამ შეჯიბრებაზე ოლიმპიური ჩემპიონ გიორგი ასანიძის შეგირდებმა 10 ოქროს, 3 ვერცხლისა და 2 ბრინჯაოს მედალი მოიხვეჭეს, ორჭიდში კი 4 ჩვენებური გახდა ჩემპიონი, რაც წარმოუდგენელი შედეგი იყო.

- ვარჯიშებისა და ასპარეზობისას წონას მწვრთნელები განსაზღვრავენ, რადგან მათ უკეთ იციან, რა ტაქტიკით იმოქმედონ, - მითხრა რუმინეთიდან დაბრუნებულმა ჩემპიონმა. - შეჯიბრებისას ბევრი რამ უნდა გათვალო და გაითვალისწინო, მარტო საკუთარი შესაძლებლობები არ კმარა. სპორტსმენს კი საამისოდ არ სცალია - იგი ასაწევ წონაზეა ორიენტირებული და კონცენტრირებული. ამიტომ მწვრთნელები განსაზღვრავენ, რომელ ცდაზე რა წონაზე მიხვიდე, როდის უნდა გარისკო. ბუქარესტში ატაცისას მესამე ცდისთვის მწვრთნელები არ მირჩევდნენ 221 კილოს შეკვეთას. ვიცოდი, რომ ნოემბრიდან ახალი წონები შემოდიოდა, ამიტომ ვიფიქრე,  სამივე დისციპლინაში მსოფლიოს მიღწევები - ჩემიცა და სხვებისაც,  გამეუმჯობესებინა. არ დავუჯერე მწვრთნელებს და დავისაჯე კიდეც - წონა ვერ დავძლიე. ფეხის წინა კუნთის ტრავმა პირველობამდე ვერ მოვიშუშე და იმან შემიშალა ხელი. ჩემი შეცდომა მაშინვე ვაღიარე და მწვრთნელებს იქვე მოვუბოდიშე. შევპირდი  - არასოდეს გავჯიუტდები-მეთქი. მეტიც, აკვრისას მეორე ცდის შემდეგ ჩემპიონობა რომ მოვიპოვე, მესამე ცდა აღარც გამომიყენებია...

საქართველო მსოფლიოზე მძიმეა

ევროპაზე განუხორციელებელი მიზნები ლაშა ტალახაძეს, მართალია, არავისთვის გაუმხელია, მაგრამ შინაგანად მაინც აწუხებდა. დროსა და მომენტს, საბაბსაც, ეძებდა ოცნების ასასრულებლად.

ეს საბაბიც მალე გამოჩნდა: ევროპის ჩემპიონატის შემდეგ დაინიშნა, ზაფხულში ქორწილი გადაიხადა და ახალშერთული მეუღლისთვის საჩუქარი ხომ უნდა ეძღვნა (არა, დაბადების დღეზე ნაფეშქაშევ მანქანას არ ვგულისხმობ). ორიოდე თვეში თბილისმა საქართველოს ჩემპიონატს უმასპინძლა და ლაშამაც სურვილი აქ აისრულა...

მსოფლიომდე თვე-ნახევრით ადრე ძველი წონებით გაიმართა ქვეყნის პირველობა. ლაშამ მძიმეწონოსანთა (+105 კილოში) მესამე ცდაზე 264 კილოგრამი აკრა, რაც კილოგრამით აღემატება 2004 წელს ათენში ირანელი ჰოსეინ რეზა ზადეს მიერ დამყარებულ მსოფლიოს რეკორდს (ატაცშიც პირველობა ტალახაძეს ეკუთვნის - 220 კგ). ორჭიდში 478 კილოგრამი მოაგროვა, რაც, ასევე, კილოგრამით მეტია მისსავე 2017 წლის მსოფლიო მიღწევაზე.

- ყველა ადამიანს აქვს შესაძლებლობების ზღვარი, ლაშას შემთხვევაში ეს ზღვარი მსოფლიო რეკორდებზე გადის, - მითხრა გიორგი ასანიძემ. - ჩვენი მიზანია, ასტრონომიულ წონას - ორჭიდის ჯამში 500 კილოს მივუახლოვდეთ და ავწიოთ, რაც აქამდე არავის უოცნებია. 478 კილოგრამი წარმოუდგენელი შედეგია, თუმცა მას  უფრო მეტი შეუძლია და სწორი მუშაობით ჩვენ მივაღწევთ ახალ სიმაღლეებს. ქართული ძალოსნობა სამგზის ოლიმპიური ჩემპიონის - კახი კახიაშვილის ხელმძღვანელობით აღმავლობის გზაზეა და ყველაფერს გავაკეთებთ, რომ ეს პროცესი გაღრმავდეს...

ლაშა ტალახაძემ, მართლაც, ზღაპრული მაჩვენებლებით დაასრულა საქართველოს ჩემპიონატი, ოღონდ საქმე ის არის, რომ ქართველი გოლიათის ნაჩვენები შედეგები მსოფლიოს რეკორდებად არ ჩაითვალა, რადგან ჩვენი ჩემპიონატი ძალოსნობის საერთაშორისო ფედერაციის კალენდარში არ შედის და შეჯიბრებას უცხოელი მსაჯები არ ემსახურებოდნენ. თუმცა საამაყოა, რომ ახალი წონების შემოღებამდე დამყარებული საქართველოს ეს რეკორდები მსოფლიოსას აღემატება და ასეთად დარჩება მარად.

გოლიათებს საფიქრალი გაუჩინა

არავის ეეჭვებოდა, რომ ლაშა ტალახაძე აშხაბადში მსოფლიოს ჩემპიონობას მესამედ მოიპოვებდა. ძალოსნობის ქომაგები მხოლოდ იმაზე ბჭობდნენ, ქართველი სპორტსმენი ტურნირზე რამდენ რეკორდს დაამყარებდა. ლაშამ, მართლაც,  ყოველგვარ მოლოდინს გადააჭარბა - უძლიერეს ათლეტთა ფორუმზე ქართველი გოლიათის, აცხადებული მითოლოგიური ამირანის მიერ მსოფლიოს შვიდი რეკორდით მოხვეჭილი სამი ოქროს მედალი და თურქმენეთის დედაქალაქის სპორტის სასახლეში აჟღერებული საქართველოს ჰიმნი სეზონის ფეირვერკული დაგვირგვინება იყო.

„წლეულს საქართველოს ძალოსანთა გუნდი გახდა ევროპის ჩემპიონი, მსოფლიოს ჩემპიონატის მესამე პრიზიორი, ახალგაზრდებში მსოფლიოს ჩემპიონი. უკვე გვაქვს ჯილდოების რეკორდული რაოდენობა - საერთაშორისო ასპარეზზე მოპოვებული  სხვადასხვა სინჯის 77 მედალი. ამ წარმატებებში ლომის წილი ლაშა ტალახაძეს მიუძღვის, რომელიც მსოფლიოს ჩემპიონატზე, როგორც ყოველთვის, შეუდარებელი გახლდათ.

ძალოსნობის საერთაშორისო ფედერაციამ წონითი კატეგორიების შეცვლასთან დაკავშირებით ახალი სარეკორდო სტანდარტები დააწესა. მძიმე წონისთვის (+109): ატაცში - 210, აკვრაში - 250, ორჭიდში - 453 კილოგრამი. ჩვენმა გმირმა აშხაბადში უკვე მეორე ცდიდან შეუტია მსოფლიოს: სტარტზე 207 კილოგრამი აიტაცა, მერე - 212 კილო, რაც პირველი ახალი მიღწევა იყო - სტანდარტზე 2 კილოგრამით მეტი. რამდენიმე წუთში ლაშამ თავისივე რეკორდი 5 კილოგრამით გააუმჯობესა. ამ დისციპლინაში ვერცხლის პრიზიორ გორ მინასიანს (სომხეთი) 12 კილოგრამით აჯობა“, - ჩემთან საუბრისას აღნიშნა ამას წინათ კახი კახიაშვილმა.

ლაშამ აკვრაში პირველსავე ცდაზე 245 კილოგრამი თავისუფლად დაიმორჩილა და ორჭიდში 462 კილოს მოუყარა თავი - მსოფლიოს სტანდარტზე ცხრა კილოგრამით მეტს და მესამე მსოფლიოს რეკორდი მიითვალა. მომდევნო ორი ცდისას კი 4 რეკორდს გამოჰკრა ხელი - ორს აკვრასა (252 და 257 კგ) და ამდენივეს ორჭიდში (469 და 474 კგ).

საგულისხმოა, რომ მას შემდეგ, რაც ქართველმა გოლიათმა მეორე ცდაზე 252-კილოგრამიანი შტანგა აკრა, მწვრთნელებმა ჰკითხეს, მესამე მისვლისთვის რამდენი შევუკვეთოთო. რამდენიც გინდათ, მზად ვარ, ავწევო, უპასუხა. მერე - 260 იყოსო, დაამატა. ნაკრების მთავარმა მწვრთნელმა ძალების დაზოგვისკენ მოუწოდა და 257 კილო შეუკვეთა, რომელიც ოლიმპიურმა ჩემპიონმა ბუმბულივით აიტაცა.

- თქვენც იცით, რომ ბუნებით აზარტული პიროვნება ვარ, არ მინდა, შეჯიბრებას სილამაზე და ჟინი დავუკარგო, მაგრამ ზოგჯერ პრაგმატულობასაც ვუწევ ანგარიშს. ეს უკვე გამოცდილებამ მასწავლა, - გამენდო გიორგი ასანიძე. - მართალია, ლაშას 264 კილო დაძლეული ჰქონდა და მისი პოტენციალის პატრონი უფრო დიდ წონაზეც არის მიმსვლელი, მაგრამ ყველაფერს თავისი დრო და მნიშვნელობა აქვს. თურქმენეთის დედაქალაქში დროისა და სიტუაციის შესაფერისად რეალური და ობიექტური გადაწყვეტილება მივიღეთ. ვფიქრობ, რომ მსოფლიოს ჩემპიონატი ტალახაძის მიერ დაძლეულმა 257-მა კილოგრამმა და შვიდმა რეკორდმაც დაამშვენა, რასაც გულშემატკივრები მქუხარე ოვაციით შეხვდნენ...

ძალოსნობის საერთაშორისო ფედერაციამ თავის ვებგვერდზე აშხაბადში ქართველი სპორტსმენის გამოსვლას ტრიუმფალური უწოდა. მართლაც, ტალახაძემ პირველსავე ტურნირზე ახალ მძიმე წონით კატეგორიაში (+109 კგ) ისეთ სიმაღლეზე ასწია მაჩვენებლების თამასა, რომ პლანეტის უძლიერეს მამაკაცებს საფიქრალი გაუჩინა. თავად განსაჯეთ: რიოს ოლიმპიადის ვერცხლის პრიზიორი გორ მინასიანი, რომელიც მსოფლიოზეც მეორე იყო, ორჭიდში ჩვენებურს 24 კილოგრამით ჩამორჩა.

„ვფიქრობ, აკვრაში მეტიც შემიძლია. ჩემი მაქსიმუმი ხომ 264 კილო იყო, მაგრამ ამჯერად უფრო მნიშვნელოვნად გამარჯვება მივიჩნიე. მეტს ვივარჯიშებ და ახლო მომავალში 264 კილოგრამსაც შემოგთავაზებთ“, - თქვა აშხაბადში  გულშემატკივრების გარემოცვაში მყოფმა ტალახაძემ, რომელიც ფოტოების გადაღებასა და მაისურებზე ავტოგრაფების ჩამორიგებაში არავის დაზარდა.

- ლაშა, რაც შენს გამოსვლებს ვუყურებ, ვხედავ, რომ ასფურცელასავით დღიდან დღემდე იზრდები. საერთაშორისო სარბიელზე ნაჩვენები შედეგებიც ამას მოწმობს. თავად რას გრძნობ?

- აბა, რა გითხრათ. ჩვეულებრივი სპორტსმენის ცხოვრებით ვცხოვრობ: დილით საუზმე, მერე - ვარჯიში, სადილი, ისევ ვარჯიში, საღამოს აქტიური დასვენება და ძილი. მწვრთნელების ყველა მითითებას ვასრულებ. არ მიყვარს რეჟიმის დარღვევა, ისედაც მთელი დღე რკინასთან შეჭიდებულს ან რისი თავი უნდა გქონდეს. სამაგიეროდ, გარჯის ნაყოფს რომ იმკი, გიხარია. ძალოსნებს ყურადღებას არ გვაკლებენ ბატონი კახი კახიაშვილი და  გიორგი ასანიძე. ქართული ძალოსნობის ლეგენდების ჩვენდამი ასეთი დამოკიდებულება, რა თქმა უნდა, უდიდესი პატივიცაა და მოტივაციაც, ხოლო მათი შედეგები - ორიენტირი და სტიმული. ჩემს პირად მწვრთნელ ავთანდილ გახოკიძეზე ხომ აღარაფერს ვამბობ. ყველა ამ სიკეთეს ახლა ოჯახური იდილიაც დაემატა და...

- ყველა ტურნირზე ყოველი ცდისას შტანგასთან მისვლამდე და წონის დაძლევის შემდეგ პირჯვარს იწერ...

- მორწმუნე ადამიანი ვარ. მწამს და მჯერა, რომ საერთაშორისო ფიცარნაგებზე ჩემს გამარჯვებებში უფლის ნებაც ურევია.

მთელ საქართველოს ეკუთვნისო.

- ლაშა, ზემოთ მოტივაცია ახსენე. წლეულს მსოფლიოს დაპყრობაში დაქორწინებაც ხომ არ დაგეხმარა?

- ცხადია, ამ წარმატებებში ანუკისაც მიუძღვის უდიდესი წვლილი.

- როგორ გაიცანით ერთმანეთი?

- ფეისბუკით... თუმცა თავად უკეთ გიამბობთ ამის შესახებ. მე უფრო რკინასთან ჭიდილი მეხერხება...

- ჩვენს გაცნობას რომანტიკულს არა, უფრო საოცარს დავარქმევ, - მითხრა დიდი ჩემპიონის მეუღლემ - სენაკელმა ასულმა ანა დემურიამ. - მეგობრის ფეისბუკზე ვუნახივარ და დამიმეგობრა. სოციალური ქსელით კარგა ხანს კი ვეხმაურებოდით ერთმანეთს, მაგრამ ამას სერიოზულ ურთიერთობას ვერ დავარქმევ. ალბათ, უფლის ნება იყო, კურიოზულ სიტუაციაში რომ გავიცანი. ბათუმში ვისვენებდი ახლობლებთან  ერთად. ერთ დღეს სასტუმროს კარებში შევეჩეხეთ ერთმანეთს.

- ამ ხელა კაცს როგორ გასცდებოდი?

- (იცინის). გზა რომ დამითმო, მაშინღა ავხედე. ჩვენი მზერა ერთმანეთს რომ შეეჩეხა, ეგრევე მკითხა, შენ ხომ ანა ხარო. ეს იყო ჩვენი ეგრეთ წოდებული ლაივშეხვედრა. მას შემდეგ დავმეგობრდით. თანდათან ეს ყველაფერი უფრო ინტიმურ ურთიერთობაში გადაიზარდა და ოჯახის შექმნაც გადავწყვიტეთ. წლეულს აპრილს ნიშნობა გვქონდა, ზაფხულში კი ქორწილი გადავიხადეთ!

- ამბობენ, სპორტსმენის ცოლობა ძნელიაო.

- ჩვენ არა მარტო მეუღლეები, არამედ მეგობრებიც ვართ. ვიცი, რამდენს ვარჯიშობს, სულ დატვირთულია,. თავისუფალი დრო თითქმის არ რჩება. ყველაინაირ სიამოვნებაზე უარს ამბობს. თქვენ წარმოიდგინეთ, ქორწილამდე სამი დღით ადრე ჩამოვიდა საწვრთნელი შეკრებიდან, ქორწილის მესამე დღეს კი ისევ დუშეთში იყო. სხვაგვარად ასეთი წარმატება წარმოუდგენელია. ისიც კარგად მესმის, რომ ლაშა მარტო ოჯახს კი არა, მთელ საქართველოს ეკუთვნის, ამიტომ ყოველნაირად ვცდილობ, ხელი შევუწყო და შტანგაზე დამატებით ტვირთად არ ვექცე. თუმცა თავად არის მომეტებულად მზრუნველი, ამასთანავე, ზედმეტად მორიდებული, ღვთის მოშიში და მოყვარული, რწმენა ძალასა და ენერგიას მატებს. თავისუფალ დროს რომ გამონახავს, უნდა რომ ოჯახთან ერთად იყოს. მით უმეტეს ახლა, როცა მატებას ველოდებით. გაისად თებერვლის მიწურულს უფალი გვაჩუქებს პატარას.

- ოჯახურ საქმეებში გეხმარება?

- ყოველმხრივ ცდილობს. ასე რომ, ტრაბახად თუ არ ჩამითვლით, ლაშა ოჯახურ  საქმეებშიც ჩემპიონია. უფლის მადლობელი ვარ, რომ ასეთი მეუღლე და მეგობარი მარგუნა. ისეთ ოჯახშია აღზრდილი, სხვაგვარი ვერც წარმომიდგენია.

- ერთხელ ლაშას ვკითხე, დედათქვენი შენს შეჯიბრებებს თუ უყურებს-მეთქი. მისგან ვიცი, ასპარეზობის მსვლელობისას ხატებთან დგას და ლოცულობსო, მითხრა. შენ თუ უყურებ მის გამოსვლებს?

- გათხოვებამდე ვახერხებდი, თუმცა ემოციური ვარ და ძალიან განვიცდი ფიცარნაგზე ლაშას ყოველ მოძრაობას. ახლა ვეღარ ვუყურებ - პატარას ვუფრთხილდები. 

- ვიცი, რომ ქართული კერძები - ხინკალი, მწვადი, ხაშლამა უყვარს. მეგრულ მენიუსთან როგორ არის?

- ელარჯი მოსწონს გამორჩეულად... მეც რომ კარგად გამომდის! ეტყობა, გენების დამსახურებაა.

- მეგრულს თუ ასწავლი?

- (იცინის). რაც სჭირდებოდა, ქორწილამდე მოუსწრია...

- ლაშა, საახალწლოდ რას აპირებ? - ახლა ისევ ჩემპიონს მივუბრუნდი.

- ტრადიციად გვაქვს, რომ ყოველ ახალ წელს საჩხერეში ოჯახის წევრები ერთად ვიკრიბებით. წლეულსაც ასე იქნება. 31 დეკემბერს ვრთავთ ნაძვისხეს, ამჯერად ანუკიც დაგვეხმარება. ღამის 12 საათისთვის სუფრასთან მამაჩემის დაყენებული ციცქა-ცოლიკაურის სუფთა წვენით გავაცილებთ 2018-ს, რომელიც ჩემთვის უბედნიერესი იყო და დავლოცავთ ახალი წლის შემობრძანებას. მჯერა, რომ 2019 არა მარტო ჩვენი ოჯახისთვის, არამედ მთელი საქათველოსთვის ფეხბედნიერი იქნება. ამიტომ ვისარგებლებ შემთხვევით და ჩვენს სპორტსმენებს, სრულიად საქართველოს წინასწარ მივულოცავ დამდეგ შობა-ახალ წელს და წარმატებებს ვუსურვებ...

ღმერთმა დაგლოცოთ და გაგაძლიეროთ!

მრავაჟამიერ!

ყოველდღიური სპორტული გაზეთი "ლელო"
1730
მკითხველის კომენტარები / 2 /
ჯიჯი
0
ლაშა მაგარი ბიჭი ხარ, შენ საქართველო მსოფლიოს აჩვენე, როგორც ძლიერი ადამიანების ქვეყანა. ვფიქრობ ოლიმპიადაზე ორჭიდში 500 კგ. დააფიქსირებ და მსოფლიოს გააოცებ.
გიზოგ
0
ლაშა უფალმა დაგლოცოს და კიდევ უფრო გაგაძლიეროს. ახალ წელს გილოცავ შენს დიდი ოჯახთან ერთ, გაიხარე და გამრავლდი.
მსგავსი ამბები
რუბრიკის სხვა სიახლეები
;