2019 წლის მსოფლიოს თასზე ბორჯღალოსნების კალენდარი ცნობილია

დღეს, ტოკიოში, 2019 წლის მსოფლიოს თასის ორგანიზატორებმა გათამაშების კალენდარი გამოაქვეყნეს. ცნობილი გახდა დღეები და სტადიონები, სადაც საქართველოს ნაკრები ჯგუფური ტურნირის მატჩებს გამართავს.

შეგახსენებთ, რომ საქართველოს ნაკრები D ჯგუფში ავსტრალიის, უელსისა და ფიჯის ნაკრებებთან მოხვდა. "ბორჯღალოსნების" კიდევ ერთი მეტოქე, რომელიც ჯგუფში მეხუთე ნომერი იქნება, მოგვიანებით, კანადისა და ურუგვაის ნაკრებებს შორის დაპირისპირებაში გაირკვევა.

იაპონიაში ბორჯღალოსნები პირველ თამაშს 23 სექტემბერს, ტოიოტა სითიში, 45-ათასიან "ტოიოტა სთედიუმზე" უელსთან გამართავენ და ის ადგილობრივი დროით 19:15 საათზე დაიწყება (სხვაობა 5 საათი).

29 სექტემბერს საქართველო ტოიოტა სითის ჩრდილო აღმოსავლეთით, ქალაქ კუმაგაიაში, 24-ათასიან "კუმაგაია რაგბი სთედიუმზე" კანადა-ურუგვაის წყვილში გამარჯვებულს შეხვდება. თამაში ადგილობრივი დროით 14:15 საათზე დაიწყება.

14:15 საათზე იწყება მესამე მატჩიც, რომელშიც ბორჯღალოსნები ფიჯის 3 ოქტომბერს შეხვდებიან. თამაში ქვეყნის ყველაზე დიდი, მთავარ კუნძულ ჰონსიუს აღმოსავლეთით, ზღვისპირა ქალაქ ოსაკაში, "ჰანასონო სთედიუმზე" ჩატარდება, რომელიც 30 ათას მაყურებელს იტევს.

ჯგუფურ ეტაპს 11 ოქტომბერს, შიზუოკას პრეფექტურაში, "შიზუოკა სთედიუმზე" (50 889 მაყურებელი) ავსტრალიასთან მატჩით დავასრულებთ. თამაში 19:15 საათზე იწყება.

იაპონიაში გასამართავ მსოფლიოს ჩემპიონატს 12 ქალაქი უმასპინძლებს. ესენია: ტოკიო, საპორო, კამიაში, კუმაგაია, იოკოჰამა, შიძუოკა, ტოიოტა სითი, ოსაკა, კობე, ფუკუოკა, კუმამოტო და ოიტა.

მსოფლიოს თასი 2019
A ჯგუფი: ირლანდია, შოტლანდია, იაპონია, ევროპა1, პლეი ოფი
B ჯგუფი: ახალი ზელანდია, სამხრეთ აფრიკა, იტალია, აფრიკა1, რეპეშაჟი
C ჯგუფი: ინგლისი, საფრანგეთი, არგენტინა, აშშ, ტონგა
D ჯგუფი: ავსტრალია, უელსი, საქართველო, ფიჯი, კანადა/ურუგვაი

Sportall.ge

1604
მკითხველის კომენტარები / 0 /
მსგავსი ამბები
რუბრიკის სხვა სიახლეები