22 წელი 'მეთოფედ'... ეპოქის დასასრული

სეზონის დასრულების შემდეგ არსენ ვენგერი "არსენალის" მწვრთნელი აღარ იქნება. მას უთხრეს, რომ უნდა წასულიყო, მიუხედავად კონტრაქტით დარჩენილი კიდევ ერთი წელიწადისა.

არადა, ეს კონტრაქტი ვენგერმა გააფორმა 2017 წლის ზაფხულში, როცა ასევე ახლოს იყო გადაყენებასთან. "მადლობა ყველაფრისთვის, მაგრამ წასვლის დროა", - ამგვარი შინაარსის ბანერები წინა სეზონის ბოლოს მრავლად იყო "ემირეითსის" ტრიბუნებზე...

...ბოლო პერიოდში არსენ ვენგერს უკიდურესად დაეძაბა ურთიერთობა "არსენალის" ამერიკელ მფლობელ სტენ კროენკესთან. თუმცა ამასაც ჰქონდა არგუმენტირებული მიზეზი - ზედიზედ მეორე სეზონია "მეთოფეები" ჩემპიონთა ლიგის მიღმა რჩებიან, რაც სოლიდურ ფინანსურ დანაკარგებს უკავშირდება.

არადა, ვენგერი ვერ დაიწუწუნებს შემადგენლობის გამო, რომელიც ყოველთვის ვარსკვლავური იყო - ისეთი, ჩემპიონობისთვის რეალური ბრძოლაც რომ შეეძლო...

დიახ, მას უთხრეს, რომ წასვლის დრო დადგა და კონტრაქტის გაწყვეტის სანაცვლოდ 11 მილიონი ფუნტიც აღუთქვეს. ამით წერტილი დაესვა 22-წლიან ეპოქას, სადაც იყო გამარჯვებებიც, იმედგაცრუებებიც... თუმცა ეს ჩვეულებრივი ამბავია ფეხბურთისთვის.

ასე იყო თუ ისე, ვენგერმა მართლაც დაუვიწყარი ეპოქა შექმნა "არსენალში" და ამას აღიარებს ყველა, ვისთანაც ის მეგობრობდა ამ წლების განმავლობაში, და ისინიც, ვისთანაც არა ერთხელ ყოფილა "ცივი ომის" მდგომარეობაში (მაგალითად, სერ ალექს ფერგიუსონთან), ჟოზე მოურინიოსთან კი ფიზიკური შეხებაც გვახსოვს...

"მიუხედავად იმისა, რომ ჩვენ არ გვქონდა თბილი ურთიერთობები, მე მას ყოველთვის დიდ პატივს ვცემდი. ის დარჩება ისტორიაში", - თქვა მოურინიომ.
ალექს ფერგიუსონი: "ის ერთ-ერთი უდიდესი მწვრთნელია ინგლისური ფეხბურთის ისტორიაში, თავისი პროფესიონალიზმით და ნიჭით. არსენი ჩემი მეგობარია. ჩემთვის უდიდესი პატივი იყო, ვყოფილიყავი მისი კოლეგა და მეტოქე".

ბობ უილსონი, "არსენალის" ლეგენდარული მეკარე: "ის არ არის მხოლოდ ერთ-ერთი უდიდესი მწვრთნელი ინგლისური ფეხბურთის ისტორიაში, ის არის მწვრთნელი, რომელმაც შეცვალა ფეხბურთის სახე ამ ქვეყანაში".

პეპ გვარდიოლა: "ის დიდი ადამიანია. პრემიერლიგა თუნდაც იმიტომაა ასეთი, რაც მან გააკეთა ამ წლების განმავლობაში თავისი ახალი ხედვით, იდეებით... ყოველთვის დიდი სიამოვნება იყო ჩემთვის მასთან მეტოქეობა. იმედი მაქვს, ის დარჩება ფეხბურთში, ოღონდ, სხვა მისიით".

ანტონიო კონტე: "ეს 22 წელიწადი იყო ფანტასტიკური არამარტო პრემიერლიგისთვის, არამედ, ზოგადად, ფეხბურთისთვის. ვენგერის გავლენა ფეხბურთზე, მისი მიღწევები ძალიან შთამბეჭდავია და ის უდიდეს პატივისცემას იმსახურებს".


...არსენ ვენგერი 1949 წლის 22 ოქტომბერს სტრასბურგში დაიბადა. ახალგაზრდულ წლებში ნაკლებად ცნობილ, სამოყვარულო გუნდებში თამაშობდა, შესაბამისად, ჰქონდა არაფრით გამორჩეული კარიერა, რასაც ვერ ვიტყვით სამწვრთნელო მიღწევებზე...

"არსენალში" ის 1996 წელს, იაპონური "ნაგოია გრამპუსიდან" მივიდა. მანამდე, 10 წლის განმავლობაში, მუშაობდა "ნანსისა" და "მონაკოში". ამ უკანასკნელს 1987/88 წლების სეზონში ჩემპიონობაც მოაგებინა.

"არსენალი" კი 3-ჯერ (1997/98, 2001/02, 2003/04) აიყვანა პრემიერლიგის მწვერვალზე, 7-ჯერ მოაგებინა ასოციაციის თასი (სულ "არსენალმა" 13-ჯერ დაისაკუთრა ეს ჯილდო) და ამ მიღწევით ინგლისში მომუშავე მწვრთნელებს შორის რეკორდსმენია. ამას გარდა, ვენგერის ხელში "არსენალმა" მოიგო თასების მფლობელთა თასი (1993/94) და ითამაშა ჩემპიონთა ლიგის ფინალში (2005/06).

ვიეირა, ანჩელოტი, ტუხელი...

ახლა მთავარი კითხვა ასე ჟღერს - ვინ შეცვლის ვენგერს? რომელიმე დიდი ფიგურა, თუ "მომავლის" მწვრთნელი? პატრიკ ვიეირა, კარლო ანჩელოტი, თომას ტუხელი, მასიმილიანო ალეგრი, იოახიმ ლიოვი, ბრენდან როჯერსი, მიკელ არტეტა, ლუის ენრიკე, იულიან ნაგელსმანი...

სია საკმაოდ შთამბეჭდავია. ამათგან, ჯერ მხოლოდ ვიეირამ (MLშ-ის კლუბ "ნიუ იორკ სიტიში" მუშაობს, რომელიც აღმოსავლეთ კონფერენციაში 7 ტურის შემდეგ დაუმარცხებლად ლიდერობს) დააფიქსირა ღიად, რომ ერთ დღესაც "არსენალის" მწვრთნელი გახდება. დადგა თუ არა ეს "დღე", ჯერჯერობით უცნობია.

ჩამოთვლილთაგან, ამჟამად უმუშევრები არიან ანჩელოტი, ლუის ენრიკე და ტუხელი. ამ უკანასკნელის მომავალს ბოლო პერიოდში პსჟ-ს უკავშირებენ და ზოგიერთი ცნობით, ფარული შეთანხმებაც მიღწეულია.

რაც შეეხება ანჩელოტის, მისთვის პრემიერლიგა ნაცნობი გარემოა - 2009/10 წლების სეზონში "ჩელსიმ" მისი თავკაცობით ჩემპიონობაც მოიგო და ასოციაციის თასიც.

ერთი სიტყვით, არჩევანი არის და ვნახოთ, რა გადაწყვეტილებას მიიღებს ლონდონური გრანდის ხელმძღვანელობა. საინტერესოა მოსალოდნელი საკადრო ცვლილებებიც, თუმცა ამაზე ჯერ ნაადრევია მსჯელობა, ვიდრე ახალი მწვრთნელი არ დანიშნულა...

ყოველდღიური სპორტული გაზეთი "ლელო"
979
მკითხველის კომენტარები / 0 /
მსგავსი ამბები
რუბრიკის სხვა სიახლეები
;