26-ე საერთაშორისო საჭადრაკო ფესტივალი საამიროებში- ჯობავას 6-დან 6 ქულა

არაბთა გაერთიანებული საამიროების დედაქალაქში გრძელდება ტრადიციული 26-ე საერთაშორისო საჭადრაკო ფესტივალი, რომლის გამარჯვებულიც 13.000 დოლარით დაჯილდოვდება. მეორე-მეხუთეადგილოსნებს, შესაბამისად, 7.500-5.500-3.500 და 2.000 დოლარი გადაეცემათ. 

შეჯიბრებაში წარმატებით თამაშობს ქართველი დიდოსტატი ბაადურ ჯობავა. იგი ტურნირებში კარგა ხანია, არ გამოჩენილა. აბუ-დაბის მასტერსის განვლილ ხუთ ტურში მან ზედიზედ სძლია მერი ენ გომესს (ინდოეთი), ჟანდოს აგმანოვს (ყაზახეთი), იი ქსიუის (ჩინეთი), ალექსანდრ ინჯიჩსა (სერბეთი) და მასპინძელ სალეჰ სალეხს.

ხუთდღიანი პაექრობების შემდეგ ტურნირზე ერთდღიანი შესვენება გამოცხადდა, მაგრამ სურვილისამებრ ამ დღეს ელვისებურ ჭადრაკში სხვადასხვა ქვეყნის 174 წარმომადგენელი ჩაება. გათამაშდა 11 ტური. ბაადურ ჯობავამ შვიდი შეხვედრა მოიგო და ოთხი პარტია ყაიმით დაასრულა, მოაგროვა 9 ქულა და მეორე ადგილი დაიკავა.

მართალია, ამდენივე ქულას მოუყარეს თავი ინდოელმა პრაგნანდხაამ და რუსმა დანიილ იუფამ, მაგრამ უარესი დამატებითი მაჩვენებლებით მათ, შესაბამისად, მესამე-მეოთხე ადგილები გაიყვეს. მთავარი პრიზი ირანელმა დიდოსტატმა პარჰამ მაგსუდლუმ დაიმსახურა, რომელმაც კონკურენტებს ნახევარ-ნახევარი ქულით აჯობა - მეოთხე ტურში იუფასთან დამარცხდა, ხოლო ფინიშზე ჯობავას დაუზავდა. 

გუშინ ძირითადი ტურნირი განახლდა. ჯობავამ თეთრი ფიგურებით მოუგო მაგსუდლუს, რომელიც მას ნახევარი ქულით ჩამორჩებოდა, და ექვსი შესაძლებლობიდან უდანაკარგოდ მეწინავეობს.

მე-6 ტურში ოთხქულიანთა პაექრობები ასე დასრულდა: ნი ჰუა (ჩინეთი) - ამინ ტაბატაბაე (ირანი) 1:0, მურალი კარტიკეიანი (ინდოეთი) - ანდრეი ვოლოკიტინი (უკრაინა) 1:0, ბარტოშ სოცკო (პოლონეთი) - მანუელ პეტროსიანი (სომხეთი) 1:0, ნოდირბეკ იაკუბოევი (უზბეკეთ) - ალექსანდრ ინჯიჩი (სერბეთი) 1:0, მუსტაფა იილმაზი (3.5) - ალექსეი ალექსანდროვი (ბელარუსი) 0.5:0.5.

ამდენად, ექვსი ტურის შემდეგ ბაადურ ჯობავა ოთხ მეტოქეს (ნი ჰუას, კარტიკეიანს, სოცკოსა და იაკუბოევს) თითო ქულით უსწრებს. 11 მოჭადრაკეს 4.5-4.5 ქულა აქვს. დიდოსტატმა ლუკა პაიჭაძემ, რომელსაც ხუთი ტურის შემდეგ 3 ქულა ჰქონდა, გუშინ შავი ფიგურებით ინდოელ ქალთა დიდოსტატ სვამინათან სოუმიას სძლია. 

დღეს მე-7 ტურში ლიდერები ასე დაწყვილდნენ: ნი ჰუა - ჯობავა, კარტიკეიანი - სოცკო, ესიპენკო - იაკუბოევი. პაიჭაძე თეთრებით ანდრეი ვოლოკიტინს (უკრაინა) გაუწევს მეტოქეობას. 

ყოველდღიური სპორტული გაზეთი "ლელო"
390
მკითხველის კომენტარები / 0 /
მსგავსი ამბები
რუბრიკის სხვა სიახლეები
;