26 მარტი უქმე დღედ! და ეს ისეთი დღე უნდა იყოს, როცა მტრებიც დაზავდებიან!.. ანუ, როგორ მოვუწყოთ ბელარუსს საფეხბურთო ჯოჯოხეთი!..

ტელეწამყვანი და საფეხბურთო მენეჯერი გეგი კიკაბიძე და მისი თანამოაზრეები ბელარუსთან მატჩისთვის გულშემატკივართა ორგანიზების ინიციატივით გამოდიან. ეს ახალგაზრდა კაცი იყო "შევარდენი 1906-ის" აღდგენის ერთ-ერთი ინიციატორი, ახლახან კი "სამტრედიაში" განის ნაკრების ყოფილი მცველი სამუელ ინკუმი ჩამოიყვანა - ფეხბურთელი, რომელსაც მსოფლიოს ჩემპიონატზე უთამაშია.

"ჩვენი კამპანიის მიზანია, საქართველოსა და ბელარუსის მატჩზე ჩვენმა გულშემატკივარმა "დინამო არენა" ღირსეულად, უბადლოდ და ყველსთვის დასამახსოვრებლად ააგუგუნოს. სახელი, სლოგანიც მოფიქრებული გვაქვს - "ერთად ევროპაზე". უახლოეს დღეებში გვსურს აქტივობის დაწყება და ჩვენი სამოქმედო გეგმის შესახებ ყველა გაიგებს. მანამდე, შეხვედრას ვგეგმავთ ფეხბურთის ფედერაციაში და დარწმუნებული ვარ, ეს ინიციატივა მათთვის ძალიან მოსაწონი იქნება. ფეხბურთის წინსვლისთვის ფედერაცია ყველაფერს აკეთებს. თუმცა ჩვენ გვსურს, საკუთარი წვლილიც შევიტანოთ იმაში, რომ ეს დღეები მომავალი თაობებისთისაც დაუვიწყარი იყოს", - ამბობს გეგი კიკაბიძე.

როგორ გეგმავენ კამპანიის წარმართვას და რა დანიშნულება აქვს მას? კიკაბიძეს ამის შესახებ ვკითხეთ: "პასუხი მარტივია, მაგრამ კოლოსალური მუშაობაა გასაწევი და ამას ვიზამთ კიდეც. ჩვენი მიზანია საქართველოს თითოეულ კუთხეს მივაწვდინოთ ხმა, თუ რაოდენ მნიშვნელოვანი მატჩია ჩვენი ქვეყნისთვის. დიდი იმედი მაქვს რომ მატჩებს მხოლოდ სპორტული დატვირთვა არ ექნება - ერს გაერთიანება სჭირდება! ეს ისეთი დღე უნდა იყოს, როცა მტრები ზავს დადებენ, ოპოზიცია ხელისუფლებას ეხუტებოდეს და ყველა რთად უნდა მივიდეთ ტრიბუნებზე, მივუსხდეთ ეკრანებს და ჩვენს ბიჭებს ვუქომაგოთ!".

ახალგაზრდა ტელეწამყვანი და საფეხბურთო მენეჯერი კამპანიის დეტალებზეც გველაპარაკა: "ტალღის ასაგორებლად ყველა რესურსს გამოვიყენებთ: ეს იქნება ტელევიზია, რადიო, პრესა, სოციალური ქსელები თუ თუნდაც სიტყვიერად გავრცელება. გვაქვს ტექნიკური რესურსიც, რაც ასევე ძალიან მნიშვნელოვანია. კამპანიის ფარგლებში გვსურს, გადავიღოთ გულშემატკივრებისთვის სარეკომენდაციო ვიდეოები, თუ რა წესები უნდა დავიცვათ და გავითვალისწინოთ როგორც სტადიონზე მისვლისას, ასევე მანამდეც და მერეც. უნდა გვახსოვდეს, რომ სტადიონი არ არის თეატრი, სადაც ჩუმად და მორიდებით უნდა ვისხდეთ. ბელარუსებს, კარგი გაგებით, საფეხბურთო ჯოჯოხეთი უნდა მოვუწყოთ და სტადიონი სინქრონულად უნდა სკანდირებდეს, ხოლო მატჩის დღეს უნდა მოხდეს ერთი დიდი შეკრება, საიდანაც სტადიონისკენ მსვლელობას მოვაწყობთ".

კიკაბიძის აზრით, უნდა გამოცხადდეს ერთდღიანი დასვენება: "სახელმწიფომ უნდა იზრუნოს იმაზე, რომ გამოაცხადოს ეგრეთ წოდებული "დეი ოფი", ანუ ერთდღიანი ოფიციალური უქმე დღე. ხალხი დილიდან ქუჩაში უნდა იყოს, მთელ ქვეყანაში უნდა იგრძნობოდეს რომ რაღაც დიდი ხდება, ისეთი დიდი, რომელსაც შეუძლია ჩვენი მომავლის შეცვლა! მჯერა ამ სურვილის სისრულეში მოყვანი და ზუსტად ვიცი, 26 მარტს რა გველოდება".

სერგო კორძაია

3190
მკითხველის კომენტარები / 3 /
ალექს
0
დაიწყეთ სამტრედიიდან მეგობარო...კალა ჩართე საქმეში არ დაიშურებს...,,ინკუმის"ჩამოყვანისთვის კი მადლობა სამტრედიელებიდან...
roma
0
ბათუმის სტადიონზე დაგვრთონ შესვლის და ნაკრების თამაშის ყურება დიდ ეკრანზე, დამერწმუნეთ ჩვენ ბიჭებს ძალიან გაუხარდებათ ერთის ნაცვლად ორი სტადიონი რომ შეივსება საქართველოს ნაკრების საგულშემატკივროდ, ბათუმი შეავსებს ახალ სტადიონს და ბიჭებს მივაწვდენთ ხმას დასავლეთიდან და ვაგრძნობინებთ ჩვენს მხარდაჭერას. ღმერთი ჩვენსკენ.
მსგავსი ამბები
რუბრიკის სხვა სიახლეები
;