26 წამი სირენამდე: ზაზა ფაჩულიას 2 ქულა და "დეტროიტმა" "მაიამი" დაამარცხა [VIDEO]

ზაზა ფაჩულიას დაბრუნების შემდეგ "დეტროიტ პისტონსმა" მეორე მატჩი გამართა და მეორედ მოიგო.

მიჩიგანელებმა ამჯერადაც ფლორიდელებს სძლიეს - "მაიამი ჰიტიც" "ორლანდოს" გზას გაუყენეს. "ჰიტთან" მატჩიც დაძაბული გამოდგა და გამარჯვებულის ბედი ბოლო წამებზე გადაწყდა.

აი, ვინ არის ზაზა ფაჩულია: 8-მატჩიანი უქმობის მერე დაბრუნდა და \'დეტროიტს\' მოაგებინა [VIDEO]

სასიხარულოა, რომ გამარჯვების ორქულიანი ზაზას ანგარიშზე იყო: საფინალო სირენამდე 26 წამით ადრე ზაზას ზუსტ ტყორცნას "დეტროიტის" 3 ქულით დაწინაურება მოჰყვა - 94:91. ეს უკვე გამარჯვებას ნიშნავდა. საბოლოოდ 98:93 "პისტონსის" სასარგებლოდ.

საინტერესოა, რომ ფაჩულიას ამ მატჩში მხოლოდ ორი ქულა ჰქონდა, თუმცა ეს ის შემთხვევაა, როცა ერთი ორქულიანი პირველ მეოთხედში ჩაგდებულ სამ სამქულიანზე ფასეულია.

ზაზას სრული მონაგარი ასეთი იყო: 28 წუთი, 2 ქულა (3-დან 1 ორქულიანი), 9 მოხსნა, 2 პასი, 2 ჩაჭრა.

28 წუთი ზაზასთვის სარეკორდო მაჩვენებელია - "დეტრიტში" გადასვლის შემდეგ მას ამდენი ერთხელაც არ უთამაშია. წუთების გაზრდას ხელი სასტარტო ცენტრის ანდრე დრამონდის ტრავმამ შეუწყო (7 წუთი ითამაშა). იგი ჯონსონთან შეჯახების შემდეგ დაშავდა და თამაშის გაგრძელება ვეღარ შეძლო. რა დრო დასჭირდება ტრავმის მოშუშებისთვის, ჯერ არ გარკვეულა.

"დეტროიტში" ყველაზე მეტი, 32 ქულა ბლეიქ გრიფინს ჰქონდა, ხოლო "მაიამიში" დუეინ უეიდი გამოირჩა.

"პისტონსს" 20 მოგება, 24 წაგება აქვს და აღმოსავლეთის კონფერენციაში მე-9 ადგილზეა.

2208
მკითხველის კომენტარები / 0 /
მსგავსი ამბები
რუბრიკის სხვა სიახლეები
;