38 წლის შემდეგ: თბილისის 'დინამო' და  'ფეიენოორდი' ისევ ნახევარფინალში!.. 

თბილისის “დინამოს” 15-წლამდელთა გუნდი, 100-პროცენტიანი შედეგითა და გოლგაუშვებლად, ვიტალი დარასელიას თასის გათამაშების ნახევარფინალშია, სადაც როტერდამის “ფეიენოორდს” შეხვდება... 

ძველ გულშემატკივარს უთუოდ გაახსენდება 1981 წელს გამართული ორმატჩიანი დუელი და თასების თასის მაშინდელი ნახევარფინალი, რომლის მოგების შემდეგაც თბილისის “დინამომ” ფინალში აღმოსავლეთგერმანული “კარლ ცაისი” დაამარცხა და პრესტიჟული ევროპული ჯილდო დაიმსახურა. ნახევარფინალში გავიდა საქართველოს ფეხბურთის ფედერაციის აკადემიის გუნდიც...

ბრაგა-დინამო (კ) 6:1
გოლები: 1:0 ფალე (6), 2:0 ფალე (7), 3:0 ა. ფერეირა (21), 4:0 ფალე (24) 5:0 ჟ. ფერეირა (42), 6:0 ჟ. ფერეირა (60) 6:1 პოლიშჩუკი (62)

ტურნირის მესამე დღე საინტერესო თამაშითა და მიმდინარე ტურნირის აქამდე ყველაზე უხვგოლიანი მატჩით გაიხსნა. პორტუგალიური “ბრაგა”, რომელმაც “ფეიენოორდთან” 0:5 დათმო, კიევის “დინამოს” წინააღმდეგ სათამაშოდ მოტივირებული გავიდა. 
პლეი ოფში მოხვედრის შანსების შესანარჩუნებლად პორტუგალიელ ბიჭებს მხოლოდ დიდი ანგარიშით გამარჯვება აძლევდათ ხელს, რაც მათ მოახერხეს და მეტოქეს ერთის წილ 6 გოლი გაუტანეს. აღსანიშნავია მიგელ ფალეს ჰეთ-თრიკი.

სფფ აკად.-ფეიენოორდი 0:0
სფფ აკადემია: ხარატიშვილი, აბჟანდაძე, ზოსიაშვილი, პირტახია, რურუა, გ. მამაგეიშვილი, ო. მამაგეიშვილი, ლაბაძე (70. ჭეიშვილი), ფუტკარაძე (46. წულუკიძე), სორდია (46. ხიმშიაშვილი), გოჩიაშვილი (46. ღურწკაია)

მეორე მატჩში როტერდამის “ფეიენოორდი” სფფ-ის აკადემიას შეხვდა. ამ მატჩის შედეგზე იყო დამოკიდებული, როგორ განაწილდებოდა ადგილები B ჯგუფში. პირველი ტაიმი საშუალო რიტმში და ორმხრივ იერიშებში გაილია. ერთ მომენტში აკადემიის ფეხბურთელებს ანგარიშის გახსნაც შეეძლოთ, თუმცა ბურთი როტერდამელთა კარის ხარიხას მოხვდა... 

მატჩის ხასიათი არც მეორე ტაიმში შეცვლილა და საბოლოოდ, უგოლოდ დასრულდა. ეს კი იმას ნიშნავდა, რომ 5 ქულით ჯგუფში პირველი ადგილი “სფფ აკადემიამ” დაიკავა, ხოლო მეორეზე 4 ქულით “ფეიენოორდი გავიდა. ამდენივე ქულა დააგროვა “ბრაგამ”, თუმცა ტურნირის რეგლამენტის მიხედვით, ურთიერთშეხვედრებში უპირატესობის შედეგად ჯგუფში მეორე ადგილი ჰოლანდიელებმა დაიკავეს.

ვულვზი-ციურიხი 1:2
გოლები: 0:1 შესი (22), 0:2 სებეკი (35), 1:2 მაკლეოდი (54)

შვეიცარიელებმა პირველ ტაიმში ორჯერ აიღეს ინგლისელთა კარი. მეორე ნახევარში ინგლისელებმა მხოლოდ ერთი საპასუხო გოლი გაიტანეს, არადა, ცდას არ აკლებდნენ, რომ მეტოქისთვის გამარჯვება ხელიდან გამოეგლიჯათ. 

საბოლოოდ, 3 ქულა “ციურიხს” დარჩა და ჯგუფში მეორე ადგილიც რომ რგებოდა, საამისოდ თბილისის “დინამოს” დიდი ანგარიშით უნდა დაემარცხებინა იტალიური “ემპოლი”...

დინამო (თბ)-ემპოლი 1:0
გოლი: 1:0 შიოლაშვილი (15)
დინამო: ბერუაშვილი, გაფრინდაშვილი (26. გოგებაშვილი), ხვადაგიანი, ჩხეტიანი (49. როსივერი), გეგიაძე, იობაშვილი (36. ხუტიაშვილი), შიოლაშვილი, კობახიძე, ბაგრატიონი, ლაცაბიძე (69. გაგნიძე), ჯანაშია (49. გოგოტიშვილი)

ჯგუფური ეტაპისა და დღის ბოლო შეხვედრაში თბილისის “დინამომ” “ემპოლის” მინიმალური ანგარიშით აჯობა და 100-პროცენტიანი შედეგით პირველი ადგილი დაიკავა. მატჩი მასპინძელთა უპირატესობით დაიწყო და ასეც დასრულდა. ანგარიში მე-15 წუთზე დავით შიოლაშვილმა ულამაზესი დარტყმით გახსნა. 

იტალიელები გააქტიურდნენ, მაგრამ - უშედეგოდ. მეტოქე ვერაფრით ახერხებდა დინამოელთა დაცვითი ბარიერების გადალახვას. მეორე ტაიმიც პირველის დარად გაგრძელდა, ორივე გუნდი უტევდა, მაგრამ განსაკუთრებულ ხიფათამდე საქმე აღარ მისულა. 

მაშ ასე - შაბათს, 20 აპრილს, “დინამო” ნახევარფინალში “ფეიენოორდს” შეხვდება. მეორე ნახევარფინალში ერთმანეთს “ემპოლი” და სფფ-ის აკადემიის გუნდი დაუპირისპირდებიან.

ყოველდღიური სპორტული გაზეთი "ლელო"
906
მკითხველის კომენტარები / 0 /
მსგავსი ამბები
რუბრიკის სხვა სიახლეები
;