40 წელიწადში ერთხელ... REUTERS: ტოკიოს ოლიმპიადის ორგანიზატორები ყველაზე უარესისთვის ემზადებიან

40 წელიწადში ზაფხულის ოლიმპიადას რაღაც პრობლემა უჩნდება...


1940 წელს, ტოკიოს ოლიმპიადა გაუქმდა მეორე მსოფლიო ომის გამო...


1980 წელს, მოსკოვის ოლიმპიადას ბევრმა ქვეყანამ გამოუცხადა ბოიკოტი...


2020 წელს კი ოლიმპიადა შეიძლება არ ჩატარდეს კორონავირუსის გამო...

ტოკიოს 2020 წლის ოლიმპიადის ორგანიზატორები სწავლობენ კორონავირუსის გამო თამაშების გადატანის შესაძლებლობას.

სააგენტო „როიტერი“ ორ დამოუკიდებელ წყაროზე დაყრდნობით წერს, რომ ოლიმპიადის საორგანიზაციო კომიტეტს კონტაქტი აქვს ამ თემაზე დაინტერესებულ პირებთან.

ამასთან, იაპონიის მთავრობა ამტკიცებს, რომ ოლიმპიადა დათქმულ ვადებში გაიმართება, ზოგიერთი კი დარწმუნებულია, რომ ქვეყანა, უბრალოდ, მზად არ არის თამაშების გადატანისთვის. უფრო ადრე, იაპონიის პრემიერმინისტრმა სინძო აბემ განაცხადა, რომ ოლიმპიადისთვის მომზადება 12 მილიარდი დოლარი დაჯდა და კიდევ 3 მილიარდი ქვეყანამ შეიძლება დაკარგოს სპონსორული გარიგებების ჩაშლის გამო.

„ჩვენ გვთხოვეს თამაშების გადატანის შემთხვევაში, მოვლენათა სიმულაციის ჩატარება. შევიმუშავეთ რამდენიმე ალტერნატიული სცენარი იმ ვადებზე დამოკიდებულებით, რომლითაც შეიძლება გადაიტანონ ოლიმპიადა“, - თქვა ერთ-ერთმა წყარომ.

იმავე წყაროს სიტყვებით, მარტის ბოლოს თამაშების საორგანიზაციო კომიტეტი შეიკრიბება, რათა განიხილოს ყველა ეს სცენარი, ისევე როგორც, ოლიმპიადის ჩატარება დათქმულ დროში, ოღონდ მაყურებლების გარეშე.

მეორე წყარო, რომელიც დაახლოებულია „ტოკიო 2020-ის“ საორგანიზაციო კომიტეტთან, იტყობინება თამაშების გადადების შესახებ ერთი ან ორი წლით.

„როიტერი“ ასევე დაუკავშირდა ოლიმპიადის სპონსორებს, მათ შორის, უმსხვილეს კორპორაციებს - Toyota-ს, Panasonic-სა და Japan Airlines-ს, რომლებიც ერთ აზრზე არიან - თამაშების გადატანა კოლოსალურ ფინანსურ ზარალს გამოიწვევს. ამიტომაც, ისინი ოლიმპიადისთვის მზადებას დაგეგმილი გრაფიკით აგრძელებენ.

n n n

ამასობაში, ოლიმპიური ცეცხლი საბერძნეთიდან იაპონიაში ჩაიტანეს და კორონავირუსის საფრთხის მიუხედავად, მის სანახავად და სამახსოვრო ფოტოს გადასაღებად ათასობით ადამიანი მივიდა. ოლიმპიური ჩირაღდნის ესტაფეტა ფუკუსიმას პრეფექტურიდან მთელს ქვეყანაში 26 მარტიდან დაიწყება.

როგორც ბრიტანული გაზეთი „გარდიანი“ წერს, 50 ათასი იაპონელი შეიკრიბა ცერემონიის „ცოცხლად“ სანახავად. ქალაქ სენდაის რკინგიზის სადგურზე ჩირაღდანთან ფოტოს გადაღების მსურველთა რიგი 500 მეტრზე გაიწელა.

ორგანიზატორები ცდილობდნენ შეემცირებინათ მნახველთა რიცხვი, მაგრამ მსურველთა ნაკადი პანდემიის დროს სოციალური დისტანციის დაცვის ვალდებულებამაც ვერ შეაჩერა.

n n n

საერთაშორისო ოლიმპიური კომიტეტის პრეზიდენტმა თომას ბახმა განაცხადა, რომ მისი ორგანიზაცია სხვადასხვა სცენარს განიხილავს კორონავირუსის პანდემიის პირობებში ტოკიოს ოლიმპიადის ჩატარებასთან დაკავშირებით, მაგრამ 2020 წლის თამაშების გაუქმების ვარიანტი არ განიხილება.

„გაუქმება არ დგას დღის წესრიგში. ვისწრაფით თამაშების წარმატებით ჩატარებისკენ. არ ვიცით, როგორი იქნება სიტუაცია. რა თქმა უნდა, განვიხილავთ სხვადასხვა სცენარს, მაგრამ სხვა სპორტული ორგანიზაციებისგან ან პროფესიული ლიგებისგან იმით განვსხვავდებით, რომ თამაშებამდე კიდევ ოთხთვენახევარი გვრჩება.

ეს კრიზისი იმის გამო არის უნიკალური და რთული, რომ ყველანი სრულ გაურკვევლობაში ვართ. დღეს ვერავინ იტყვის, რა მოხდება ხვალ, ერთი თვის შემდეგ, აღარაფერს ვამბობ იმაზე, რა შეიძლება მოხდეს ოთხი თვის შემდეგ“, - განაცხადა ბახმა „ნიუ იორკ თაიმსისთვის“ მიცემულ ინტერვიუში.

საინტერესოა გერმანელი ჩინოვნიკის კიდევ ერთი კომენტარი: „არ შეიძლება ასე უბრალოდ ოლიმპიადის სხვა დროისთვის გადატანა. ეს არ არის საფეხბურთო მატჩი, რომელიც უახლოეს შაბათს უნდა გაიმართოს. - ეს ძალიან რთული პროცესია, რომელსაც ძალიან წონადი არგუმენტებით უნდა მივუდგეთ. 24 საათისა და კვირაში შვიდი დღის განმავლობაში ვაანალიზებთ ყველა შესაძლებლობას. თამაშების გადატანა დაამსხვრევს 206 ქვეყნის 11 ათასი სპორტმენისა და ლტოლვილთა გუნდის ოცნებას“.

n n n

პარალელურად, სულ უფრო ხშირად გაისმის ტოკიოს ოლიმპიადის გადადების მოთხოვნები. ამერიკის შეერთებული შტატების ცურვის ფედერაციას სურს, რომ ოლიმპიური თამაშები გადაიტანონ. ფედერაციის აღმასრულებელმა დირექტორმა ტიმ ჰინჩიმ წერილი მიწერა საერთაშორისო ოლიმპიურ კომიტეტს, რომელშიც აღნიშნა, რომ ამერიკელი სპორტსმენები კორონავირუსის პანდემიის გამო სათანადოდ ვერ ემზადებიან თამაშებისთვის და მოუწოდებს კომიტეტს - ერთი წლით გადაავადოს ტოკიოს ოლიმპიადა.

„ოლიმპიადამდე რამდენიმე თვით ადრე ყველამ გადაიტანა დაუჯერებელი სტრესი, რაც კითხვის ნიშნის ქვეშ აყენებს ყველა სპორტსმენისთვის თანაბარი პირობების ფაქტორს. ჩვენი სპორტსმენები უდიდესი ზეწოლის ქვეშ არიან, განიცდიან სტრესს, მათი ფსიქიკური ჯანმრთელობა და კარგი განწყობა კი მთავარ პრიორიტეტებს შორის უნდა იყოს.

არ არსებობს იდეალური პასუხები და ასეთ სიტუაციაში გადაწყვეტილების მიღება რთულია, მაგრამ საკითხის ამგვარი გადაჭრა წინ გადადგმული ნაბიჯი იქნება და საშუალებას მისცემს სპორტსმენებს - მოემზადონ 2021 წლის უსაფრთხო და წარმატებული ოლიმპიური თამაშებისთვის“, - წერია წერილში.

იგივე განცხადებით გამოვიდა აშშ-ის მძლეოსნობის ფედერაცია. მასში წერია, რომ ადამიანების ჯანმრთელობა მთავარი პრიორიტეტია, ამიტომაც თხოვნით მიმართა საერთაშორისო ოლიმპიურ კომიტეტს - გადადოს ზაფხულში დანიშნული ოლიმპიური თამაშები.

გარდა ამისა, ნორვეგიის ეროვნულმა ოლიმპიურმა კომიტეტმა წერილით მიმართა საერთაშორისო ოლიმპიურ კომიტეტს, რომელშიც შეშფოთება გამოთქვა კორონავირუსის პანდემიის ფონზე ტოკიოს ოლიმპიადის ჩატარებასთან დაკავშირებით.

„ნორვეგიასა და მსოფლიოს უმეტეს ქვეყნებში კორონავირუსთან დაკავშირებული გადაუწყვეტელი სიტუაციის გამო, არამიზანშეწონილად და არასასურველად მიგვაჩნია ნორვეგიელი სპორტსმენების გაგზავნა ტოკიოში, ვიდრე მსოფლიო საზოგადოება არ გადაწყვეტს ამ პრობლებას.

შეშფოთება უკავშირდება არა მხოლოდ იმას, თუ როგორ შეიძლება განვითარდეს ზაფხულამდე კორონავირუსთან დაკავშირებული სიტუაცია ტოკიოში, არამედ გლობალურ სურათს, რომელიც გამოყენებული უნდა იყოს იმ გადაწყვეტილების საფუძვლად, რომელსაც მიიღებს საერთაშორისო ოლიმპიური კომიტეტი.

ჯანმრთელობა და უსაფრთხოება ყველაფერზე წინ დგას და აღნიშნულ სიტუაციაში სპორტსმენთა აზრი უმნიშვნელოვანესი უნდა იყოს“, - წერია განცხადებაში.

n n n

იაპონიის ფინანსთა მინისტრს ტარო ასუს მიაჩნია, რომ ტოკიოს 2020 წლის ოლიმპიური თამაშები დაწყევლილია. სახელმწიფო ჩინოვნიკის აზრით, ყოველ 40 წელიწადში ზაფხულის ოლიმპიადას რაღაც პრობლემა უჩნდება.

1940 წელს, ტოკიოს ოლიმპიადა გაუქმდა მეორე მსოფლიო ომის გამო. 1980 წელს, მოსკოვის ოლიმპიადას ბევრმა ქვეყანამ გამოუცხადა ბოიკოტი. 2020 წელს კი ოლიმპიადა შეიძლება არ ჩატარდეს კორონავირუსის გამო.

„ეს პრობლემა თავს იჩენს ყოველი 40 წლის შემდეგ. ეს ოლიმპიადა დაწყევლილია. და ეს ფაქტია“, - განაცხადა ასუმ.

2020 წლის ზაფხულის თამაშები 2020 წლის 24 ივლისიდან 9 აგვისტომდე გაიმართება.

356
მკითხველის კომენტარები / 0 /
რუბრიკის სხვა სიახლეები
;