[4xVIDEO] TOP5. კლოპის მონსტრი, ბაიერნის მეორე ტაიმი, უკბილო ინტერი, მილანის ბოლო წამი...

  • მოჰამედ სალაჰს საგოლე პასი მეკარე ალისონ ბეკერმა გაუკეთა

"ლივერპულმა" 2:0 მოუგო "მანჩესტერ იუნაიტედს" და უკვე 16 ქულით უსწრებს "მდევარს". თუ გავითვალისწინებთ, რომ იურგენ კლოპის "მონსტრს" ერთი თამაში რეზერვში აქვს, ეს სხვაობა პოტენციურად მეტიც შეიძლება იყოს.

ამ გრაფიკით თუ წავა, "წითლები" შეიძლება თებერვლის ბოლოს გამოცხადდნენ ჩემპიონებად. აღსანიშნავია მეორე გოლი, რომელიც მოჰამედ სალაჰმა თამაშის მიწურულს... მეკარე ალისონ ბეკერის პასით გაიტანა.

სხვათა შორის, "ლივერპულის" კარის დარაჯი ამ კლუბის პირველი მეკარეა პეპე რეინას (2010, "სანდერლენდთან") შემდეგ, ვინც საგოლე გადაცემა მიითვალა.

კიდევ რამდენიმე ფაქტი:

* 2011 წლის შემდეგ "ლივერპულმა" პირველად შეძლო "მანჩესტერ იუნაიტედისთვის" ზედიზედ 2 საშინაო მატჩის მოგება.

* "ლივერპულმა" პრემიერლიგის ბოლო 31 მატჩიდან 30 მოიგო (1 ფრე).

* "არსენალის" (2001/02) შემდეგ "ლივერპული" გახდა პრემიერლიგის პირველი გუნდი, ვინც ჩემპიონატის საწყისი 22 ტურიდან ყველაში გაიტანა მინიმუმ ერთი გოლი მაინც ("არსენალი" იმ სეზონში ჩემპიონი გახდა).

* 2006 წლის დეკემბრის შემდეგ პირველად მოხდა, რომ "ლივერპულმა" ზედიზედ 7 მატჩში არ გაუშვა გოლი.

დრამატულ ბრძოლაში "მილანმა" ზედიზედ მეორე თამაში მოიგო - 3:2. გამარჯვების გოლი დამატებულ წუთებზე გავიდა. მართალია, ზლატან იბრაჰიმოვიჩს არ გაუტანია, მაგრამ ნერვები კი მოუშალა "უდინეზეს" დაცვას.

არადა, ამ "უდინეზემ" მაგრად იომა და ქულა რომ აეღო, დიდი უსამართლობაც არ იქნებოდა, მაგრამ უფრო ძლიერმა და კლასიანმა გაიმარჯვა. მთავარი როლი კი ამ საქმეში "როსონერის" ხორვატი შემტევის, ანტე რებიჩის დუბლმა ითამაშა.

"ინტერმა" ძალიან უკბილოდ ითამაშა და ერთ-ერთ აუტსაიდერ "ლეჩესთან" სტუმრად ფრეს დასჯერდა - 1:1. ვეჭვობთ, ჩემპიონატის ფინიშზე "ნერაძურიმ" ამ დაკარგული ქულების გამო ძალიან არ ინანოს...

მიუხედავად უსერიოზულესი საკადრო პრობლემებისა, "რომამ" გენუაში 3:1 დაამარცხა "ჯენოა", მაქსიმალურად გამოიყენა რა მეტოქის ბრიყვული შეცდომები და თავის მეკარის პაუ ლოპესის საუკეთესო გარჯა.

მიუნხენის "ბაიერნმა" ერთი საფეხურით მაღლა აიწია და "ლაიპციგის" უახლოესი მდევარი გახდა. ამ გუნდებსა და, აგრეთვე, მათ ფორვარდებს - რობერტ ლევანდოვსკისა და ტიმო ვერნერს შორის დიდი ბრძოლაა მოსალოდნელი ჩემპიონობისთვისა და საუკეთესო ბომბარდირის პრიზისთვის.

"ბაიერნი" ბერლინს სტუმრობდა და საინტერესო იყო, რამდენად მოასწრო საზარდულზე ოპერაციის შემდეგ აღდგენა ლევანდოვსკიმ. პოლონელმა რამდენიმე კარგი შანი ვერ გამოიყენა, მაგრამ პენალტით მაინც გაიტანა და თავისი წვლილი შეიტანა დამსახურებულ მოგებაში.

ლევანდოვსკი გაუთანაბრდა გოლებით ვერნერს, რომელმაც წინა დღეს დუბლი შეასრულა. "ლაიპციგმა" ცუდი პირველი ტაიმის შემდეგ მეორეში ნახევარში აჯობა "უნიონს". მართალია, ბერლინელებმა ჩამორჩენის შემდეგ, ისევ კარგად შეუტიეს, მაგრამ "ლაიპციგი" არ აპირებდა სამი ქულით დათმობას და მესამე გოლიც გაიტანა, რითაც ბუნდესლიგის ახალი რეკორდი დაამყარა - ზედიზედ ცხრა მატჩში გააქვს მინიმუმ სამი გოლი.

2080
მკითხველის კომენტარები / 0 /
მსგავსი ამბები
რუბრიკის სხვა სიახლეები
;