600 მილიონის ამბავი: აზარი, ერიკსენი, მპაბე... როგორია რეალის გეგმები

“რეალს” არსებობის ისტორიაში ერთ-ერთი ყველაზე ცუდი სეზონი ჰქონდა. “სამეფო კლუბმა” წააგო ყველაფერი, რისი წაგებაც კი შეიძლებოდა.

რა თქმა უნდა, ამას “ლოს ბლანკოსის” ხელმძღვანელობა დიდხანს ვერ მოითმენდა და ფლორენტინო პერესი ამ ზაფხულს ძალიან დიდ ფულს დახარჯავს, უპრეცედენტოდ დიდს. როგორც ამბობენ, ლაპარაკია 600 მილიონ ევროზე...

“სანტიაგო ბერნაბეუზე” არაერთი ვარსკვლავის გამოჩენაა სავარაუდო. როგორც ვწერდით, პირველი უკვე გამოჩნდა - “აინტრახტის” სერბი ფორვარდი ლუკა იოვიჩი, რომელშიც “რეალმა” 65 მილიონი ევრო გადაიხადა... 

მაშ ასე, ვინ მოირგებს მადრიდის “რეალის” მაისურას? მივყვეთ თანმიმდევრობით.

ედენ აზარი (ჩელსი)

ბოლო დროს ედენ აზარმა არაერთხელ განაცხადა, რომ “ჩელსის” დატოვება უნდოდა და საბოლოოდ მისი ოცნება სულ მალე ახდება. აზარი უკვე 7 წელია, “ჩელსის” გამოკვეთილი ლიდერი გახლავთ. მას მომავალ ზაფხულს უმთავრდება კონტრაქტი “არისტოკრატებთან” და ამიტომაა შედარებით დაბალი მისი სატრანსფერო ფასი. 110 მილიონი ევრო პლუს 15 მილიონი ბონუსის სახით სულაც არ არის კატასტროფა “რეალისთვის”. 
28 წლის აზარს ყველანაირი შანსი ექნება იმისთვის, რომ მომავალი სეზონიდან “რეალის” ლიდერი იყოს.

კრისტიან ერიქსენი
(ტოტენჰემი)

“რეალს” ძალიან უნდა დანიელი ვარსკვლავის გადაბირება, მაგრამ მოლაპარაკებები სწრაფი ტემპით ვერ მიმდინარეობს. კრისტიან ერიქსენმა უკვე საჯაროდ განაცხადა, რომ “ტოტენჰემიდან” მიდის. “მამლების” პრეზიდენტი დანიელ ლევი 27 წლის ფეხბურთელს 70 მილიონ ევროზე ნაკლებად არ შეელევა. 

მოსალოდნელია, რომ “რეალი” ბოლომდე იბრძოლებს ერიქსენისთვის. “სამეფო კლუბში” ის ძალიან სჭირდებათ, რადგან მასში ხედავენ სწორედ ლუკა მოდრიჩის შემცვლელს. გასული სეზონი ერიქსენმა სასწაულად ვერა, მაგრამ კარგად ჩაატარა - პრემიერლიგის 35 მატჩში გაიტანა 8 გოლი და გააკეთა 12 საგოლე პასი.

ფერლან მენდი (ლიონი)

23 წლის ფრანგი მარცხენა მცველი, ყველა წესისა და კანონის მიხედვით, მალე უნდა გადავიდეს “რეალში”. მისი პროგრესი ბოლო დროს თვალსაჩინოა. ძალიან კარგად ითამაშა ჩემპიონთა ლიგაში. 

გარდა ამისა, ფერლან მენდი სავსებით დამსახურებულად მოხვდა ლიგა 1-ის სეზონის სიმბოლურ ნაკრებში. ასე და ამგვარად, რეგილონსა და მარსელოს ძალიან სერიოზული კონკურენტი გამოუჩნდათ. ეს არის ფეხბურთელი, რომელსაც საუკეთესო წლები ჯერ კიდევ წინ აქვს.

ჟოაო ფელიქსი (ბენფიკა)

ევროპული ფეხბურთის ამომავალი ვარსკვლავის გადაბირება არაერთ გრანდს სურს, მათ შორის, ერთ-ერთი მთავარი ფავორიტი “რეალია”. მადრიდელთა გარდა, 19 წლის ჟოაო ფელიშით დაინტერესებულები არიან “მანჩესტერი” და “ატლეტიკო”. 

თავის მხრივ, ფეხბურთელთან განშორებას არ ჩქარობს “ბენფიკა”. ლისაბონური გრანდის დირექტორი დომინგეშ სოარეშ დე ოლივეირა აცხადებს: 
“ჩვენ ვიცით, რამხელა ტალანტთან გვაქვს საქმე. თუ ვინმე 120 მილიონს არ გადაიხდის, ფეხბურთელს არ გავყიდით. სრული პასუხისმგებლობით ვაცხადებ, რომ ფელიშს 100 მილიონ ევროდაც არ გავყიდით”. 

პოლ პოგბა 
(მანჩესტერ იუნ)

ჯერ კიდევ მარტში პოლ პოგბამ არაორაზროვანი განცხადება გააკეთა. მისი თქმით, ნებისმიერი ფეხბურთელის ოცნებაა, ზინედინ ზიდანის ხელმძღვანელობით ითამაშოს “რეალში”... 

ცნობილია, რომ 26 წლის პოგბა უდიდეს პატივს სცემს ზიდანს, მისი ხელმძღვანელობით ის არ მოდუნდება და ბოლომდე ითამაშებს. ორი აზრი არ არის, ზიდანსაც და ფლორენტინო პერესსაც ძალიან უნდათ პოგბას გადაბირება, მაგრამ აქ არის ერთი ხელის შემშლელი ფაქტორი - ტრანსფერის ღირებულება, რომელიც დაახლოებით 90 მილიონი ევროა.

კილიან მბაპე (პსჟ)

ცოტა ხნის წინ ეს ტრანსფერი უფრო რეალური ჩანდა, ვიდრე ახლა. ზინედინ ზიდანის თქმით, კილიან მბაპე არ ჩქარობს კლუბის შეცვლას. ეს მიუხედავად იმისა, რომ 20 წლის შემტევს კონფლიქტი აქვს ნეიმართან. როგორც ჩანს, კილიანი თავისი მდგომარეობით მაინც კმაყოფილია.

ყოველდღიური სპორტული გაზეთი "ლელო"
536
მკითხველის კომენტარები / 0 /
მსგავსი ამბები
რუბრიკის სხვა სიახლეები
;