61 ქართველი მედლებისთვის! დღეს ევროპის მეორე ოლიმპიადა იწყება 

მეორე ევროპული თამაშების პროგრამა, პირველთან შედარებით, ცოტათი შემჭიდროებული იქნება. უკვე დღეიდან, 21 ივნისიდან 30 ივნისის ჩათვლით ბელარუსის დედაქალაქ მინსკში „ბებერი კონტინენტის“ 4000-მდე სპორტსმენი ერთმანეთს სპორტის 15 სახეობის 23 დისციპლინაში შეეჯიბრება.

ესენია 3X3 კალათბურთი, ქვიშის ფეხბურთი, მშვილდოსნობა, სროლა (პნევმატური-სასტენდო), სამბო, ძიუდო, ჭიდაობა (თავისუფალი, ბერძნულ-რომაული), ველოსპორტი (სამთო, საგზატკეცილო), კარატე, კრივი, კანოე, ტანვარჯიში (სპორტული, რიტმული, აერობიკა, აკრობატიკა, ბატუტი), ბადმინტონი, მაგიდის ჩოგბურთი და მძლეოსნობა. მინსკში მედლების 200 კომპლექტი გათამაშდება. 

ამ სახეობებს 11 სპორტული ბაზა მოემსახურება: „ჩიზოვა-არენა“, სპორტის სასახლე, „მინსკ-არენა“, სროლის ცენტრი, სპორტის სასახლე „ურიჩე“, ოქტომბრის მოედანი და ქუჩა, „ფელკონ-კლაბი“, „სპორტინგ-კლაბი“, სპორტული კომპლექსი „ოლიმპიისკი“, საწყლოსნო კომპლექსი „ზასლალი“. 

ევროპის ოლიმპიურ კომიტეტთა გაერთიანებამ არც ამჯერად უღალატა წინა თამაშებზე დამკვიდრებულ ტრადიციას და პროგრამაში ამჯერადაც შეიტანა არაოლიმპიური სახეობები თუ დისციპლინები: სამბო, ქვიშის ფეხბურთი და ტანვარჯიში. 

ამ სახეობებიდან ოთხი გათანაბრებულია ევროპის ჩემპიონატთან და ამიტომ მათში ევროპის წლევანდელი პირველობები არ გამართულა. ესენია ძიუდო, ბადმინტონი, კანოე და კრივი. ბუნებრივია, დიდი ოლიმპიადის დატვირთვა თამაშებს ამჯერადაც ექნება - ორ სახეობაში პირდაპირ გაიცემა ტოკიოს ოლიმპიადის საგზურები, რამდენიმეში კი სპორტსმენები თუ გუნდები სალიცენზიო რეიტინგში ჩასათვლელ ქულებს მიიღებენ.

ლიცენზიები პირდაპირ გაიცემა სროლაში - სასტენდო თუ პნევმატური იარაღიდან სროლის ცალკეულ დისციპლინებში ჩემპიონები პირდაპირ მიიღებენ ტოკიოს ოლიმპიადის საგზურებს, ხოლო მშვილდოსნობაში სამეულში შესულები დაიბევებენ ამ უფლებას. ძიუდოში, ბადმინტონში, კარატეში, კრივში, მაგიდის ჩოგბურთში, კანოესა და მძლეოსნობაში სარეიტინგო ქულები გაიცემა. 

ქართველები მინსკში

მინსკში საქართველოს ოლიმპიური გუნდი 61 კაცით იქნება წარმოდგენილი, რომლებიც სპორტის 10 სახეობის 13 დისციპლინაში გამოვლენ: სამბო, ძიუდო, ჭიდაობა, ტყვიის სროლა, მშვილდოსნობა, კარატე, კრივი, კანოე, ველოსპორტი და ტანვარჯიში.

მონაწილეთა რაოდენობა წინა თამაშებთან შედარებით ლამის განახევრებულია - ბაქოში 104 სპორტსმენი გვყავდა, რაც ძირითადად ორი მიზეზითაა განპირობებული: პირველი სახეობების ზოგადი ოდენობის შემცირებაა, მეორე - მძლეოსნობაში ვერმოხვედრა. საქმე ისაა, რომ „სპორტის დედოფალი“ თამაშებში ამჯერად ევროპის გუნდური რეიტინგის მიხედვით დაუშვეს ანუ ყველას არ მისცეს გამოსვლის უფლება, ჩვენ კი ამ სიაში ვერ მოვხვდით. არადა, ბაქოში მძლეოსნობაში მრავალრიცხოვანი გუნდი გვყავდა.

ბუნებრივია, არის შემცირების სხვა მიზეზებიც - მაშინ ზოგიერთ სახეობაში უფრო მეტი მონაწილე გვყავდა (თუმცა ახლა ზოგან საპირისპირო ფაქტებიცაა), მაგრამ ძირითად მიზეზად ზემოდასახელებული ორი ფაქტორი იქცა. 

თუმცა მთავარი ხომ ხარისხია და ამჯერად ძალიან ძლიერი გუნდი გვყავს: მის შემადგენლობაში 3 ოლიმპიური და 12 მსოფლიოს ჩემპიონია. ოლიმპიურ ჩემპიონთაგან იასპარეზებენ ტყვიის მსროლელი ნინო სალუქვაძე, ძიუდოისტი ლაშა შავდათუაშვილი და თავისუფალ სტილში მოჭიდავე ვლადიმერ ხინჩეგაშვილი.

მსოფლიოს ჩემპიონთა ამალას შეადგენენ იგივე სალუქვაძე, ხინჩეგაშვილი, ძიუდოისტი გურამ თუშიშვილი, კარატისტი გოგიტა არქანია და სამბისტები: ნინო ოძელაშვილი, ელენე ქებაძე, ვახტანგ ჩიდრაშვილი, გენადი ჩირგაძე, ლევან ნახუცრიშვილი, ბექა ბერულავა, პაატა ღვინიაშვილი და დავით ლორიაშვილი. ბუნებრივია, გაცილებით მეტია ევროპის ჩემპიონების, ევროპისა თუ მსოფლიოს პირველობების მედალოსანთა რაოდენობა. 

როგორც მსოფლიოს ჩემპიონთა სიიდან ჩანს, ძიუდოს ერთ-ერთი ყველაზე ტიტულოვანი გუნდი ჰყავს და მათგან დიდ წარმატებებსაც ველოდებით. უდავოდ, გუნდში ყველაზე ტიტულოვანი მსოფლიოს ხუთგზის ჩემპიონი ჩიდრაშვილია, ვინც ევროპული ტიტულის მეხუთედ მოსაგებად მიდის მინსკში.

ყოველდღიური სპორტული გაზეთი "ლელო"
592
მკითხველის კომენტარები / 0 /
მსგავსი ამბები
რუბრიკის სხვა სიახლეები
;