[7 დღის 5 ჰიტი] აბსოლუტური გურამ თუშიშვილი

1. გურამ თუშიშვილი აბსოლუტური ფალავანია
ქართულ ჭიდაობაში საქართველოს 2017 წლის აბსოლუტური ფალავანი გურამ თუშიშვილი გახდა! ჩვენი ქვეყნის ერთ-ერთმა ყველაზე გამორჩეულმა ძიუდოისტმა, რომელიც წლეულს ძიუდოში ევროპის ჩემპიონიც გახდა, როგორც პირად, ისე გუნდურ პირველობებში - ამჯერად ქართულ ჭიდაობაში ისახელა თავი.

2. თორნიკე შენგელია VS გიორგი შერმადინი
დიდი ხნის შესვენების შემდეგ ევროლიგაზე ქართული დუელი შედგა - თორნიკე შენგელიას "ბასკონიამ" გიორგი შერმადინის "უნიკახას" უმასპინძლა და 88:82 დაამარცხა.
ბოლოს ქართველები ევროლიგაზე ერთმანეთის წინააღმდეგ 2013 წელს დადგნენ - გიორგი შერმადინი ("ოლიმპიაკოსი") და ვიქტორ სანიკიძე ("მონტეპასკი"). შესაძლოა სათქმელად უბრალოდ ჟღერდეს, მაგრამ როცა საქმე ევროპის უპირველეს ლიგაში ქართველთა დუელს ეხება, საქმე ნამდვილად სერიოზულადაა.
"ბასკონიას" "უნიკახასთან" წარმატებაში დიდი წვლილი მიუძღვის შენგელიას, რომელმაც 19 წუთში 12 ქულა, 6 მოხსნა, 2 პასი, 2 ჩაჭრა და 1 დაფარება მიითვალა. მან 7-7 ორქულიანიდან და საჯარიმოდან 4-4 ჩააგდო.
გიორგი შერმადინი სასტარტო ხუთეულში იყო, 14 წუთი ითამაშა, 2 ქულა და 3 მოხსნა ჩაიწერა.

3. ოქროს რონალდო
პორტუგალიის ნაკრებისა და მადრიდის "რეალის" ვარსკვლავი, კრიშტიანო რონალდო "ფრანს ფუტბოლის" ვერსიით მსოფლიოს საუკეთესო ფეხბურთელად დასახელდა.
32 წლის კრიშტიანომ "რეალთან" ერთად ჩემპიონთა ლიგა და პრიმერადივიზიონი მოიგო. კრიშტიანოსათვის ესაა მეხუთე ოქროს ბურთი. პორტუგალიელი ამ ჯილდოს მოქმედი მფლობელია. მეორე ადგილზე ლიონელ მესი გავიდა, მესამეზე კი - ნეიმარი.
ოქროს ბურთების რაოდენობით რონალდო მესის გაუთანაბრდა - 5:5.

4. ჩემპიონთა ლიგა: რეალი VS პსჟ
ნიონში ჩემპიონთა და ევროპალიგის პლეი ოფების წილისყრა გაიმართა. ევროპის მთავარ საკლუბო ტურნირში მივიღეთ ორი სუპერწყვილი: "რეალი"-პსჟ, "ჩელსი"-"ბარსელონა". რა შეიძლება დაიწეროს წილისყრის შესახებ? ბევრი, ალბათ, არაფერი, სჯობს რამდენიმე კომენტარს გავეცნოთ:
- ეს წყვილი იმსახურებდა ფინალს. მეტოქე ყოველ წელს უფრო ძლიერი და ძლიერი ხდება, ჩვენი მიზანი კი უცვლელია. "რეალი" ტიტულის დაცვას აპირებს, - რეალის დირექტორის, ემილიო ბუტრაგენიოს სიტყვებიდან ყველაფერი ნათელია.
- თუ გვინდა, რომ მოვიგოთ, 120 პროცენტით უნდა ვიყოთ მზად, - ცხადია, ამას "ბარსელონას" მოწინააღმდეგე ანტონიო კონტე ("ჩელსის" მთავარი მწვრთნელი) იტყოდა...

5. პაატა გურასპაული კალათბურთის ფედერაციის პრეზიდენტია
შეიძლება პოლიტიკური მედიისთვის არჩევნებზე მნიშვნელოვანი თემა არ არსებობდა, მაგრამ მიმაჩნია, რომ სპორტული გაზეთისთვის გაცილებით მნიშვნელოვანია გურამ თუშიშვილის აბსოლუტური ჩემპიონობა, ევროლიგაზე შენგელიასა და შერმადინის დუელი... ეს ხომ სუფთა სპორტული მოვლენებია.
კალათბურთის ფედერაციის პრეზიდენტის არჩევნებს დიდი ვნებათაღელვა მოჰყვა. საბოლოოდ ყველაფერი ისე დასრულდა, რომ არჩევნებამდე ერთი საათის წინ ერთ-ერთმა კანდიდატმა შიო ხეცურიანმა კანდიდატურა მოხსნა.
დარჩა ერთი კანდიდატი, პაატა გურასპაული, რომელმაც პრეზიდენტად არჩევის შემდეგ თქვა:
"სიხარულს ვერ დავარქმევ იმას, რასაც ახლა განვიცდი - მთელი სიცხადით ვიგრძენი ის პასუხისმგებლობა, რაც პრეზიდენტად არჩევის შემდეგ დამეკისრა.
მინდა პირობა დავდო, რომ რასაც აქამდე ვაკეთებდი ქართული კალათბურთისთვის, გზიდან არ გადავუხვევ, გავაკეთებ მაქსიმუმს და იმაზე მეტსაც, რაც შემეძლება.
ჩემი გუნდი საკალათბურთო საზოგადოებაა. ჩვენი კარი ყველასთვის ღიაა, გთხოვთ მოსვენება არ მომცეთ, მოვისმენ ჯანსაღ კრიტიკას, მოსაზრებებს, რომ პროგრამა, რომელიც აქამდე წარმოვადგინე, მაქსიმალურად განვახორციელო."

1982
მკითხველის კომენტარები / 0 /
მსგავსი ამბები
რუბრიკის სხვა სიახლეები