[7 დღის 5 ჰიტი] უელსი, წიგნი ფანტასტიკის ჟანრიდან

რუბრიკა "7 დღის 5 ჰიტის" დაბადების დღიდან შევთანხმდით, რომ ხუთი მნიშვნელოვანი ამბავი არც ქრონოლოგიურად იქნებოდა დალაგებული და არც ხარისხობრივად. არც ამჯერად ვაპირებთ რაიმე ნიშნით ჰიტების გამორევას. ეს ლოგიკური არ იქნებოდა, რადგან ზოგისთვის რაგბის ნაკრების თამაშია მთავარი მოვლენა, ზოგისთვის კალათბურთის ნაკრები, ზოგისთვის ფეხბურთი და ზოგისთვის პეტანკი.

1. დავიწყოთ უელსი-საქართველოს სარაგბო მატჩით. სიმართლე გითხრათ, პირველად ბრიტანეთის შემადგენელი ნაწილის, უელსის არსებობა რომ შევიტყვე, თვალწინ წარმომიდგა ჩემს თაროზე მდუმარედ მდგომი წიგნი "დროის მანქანა", ავტორი ჰერბერტ უელსი.

ამ კაცის დაწერილი ფანტასტიკური ნაწარმოებები იცით, რითი გამოირჩევა? - კითხვისას გიჩნდება შთაბეჭდილება, თითქოს ფანტასტიკური სამყაროს მკვიდრი ხარ.

ასეთი შთაბეჭდილება დამრჩა უელსისა და საქართველოს ნაკრებების მატჩისას. მაშინ, როდესაც პირველად გავიგე ვალიელების ქვეყნის არსებობის შესახებ, ნამდვილად არ ვიცოდი, რა იყო რაგბი და არც საქართველოს ნაკრები არსებობდა. უელსი კი მაშინაც და დღესაც მსოფლიოს რაგბიში ელიასავითაა - ამინდს ქმნის.

ჰოდა, ასეთ გუნდთან თანაბრად თამაში 90-იან წლებში ფანტასტიკის სფეროდან იყო. დღეს საქართველოსა და უელსის თანაბრად ბრძოლა არც ჰერბერტ უელსის წიგნების სიუჟეტია, არც მიუნჰაუზენის თავგადასავლები - რეალობაა, გაზეთებში ყოველგვარი გაფორმების გარეშე იწერება, რომ საქართველოს გამარჯვების თუ არა, ფრის მიღწევის შანსი ჰქონდა.

ბოლო წუთებზე, როდესაც საქართველო მეტოქის ჩათვლის ხაზთან სამიოდე მეტრში იყო, უელსელებმა გაძევებული ბურჯის ნაცვლად გარემარბი შემოიყვანეს, რის გამოც ოფიციალური წესებით ქართველებს შერკინებაში მიწოლის უფლება არ ჰქონდათ და ბურთი აუტზე გადააგდეს. რომ მისწოლოდნენ...

მოკლედ, ღირსეულად, 7 ქულის სხვაობით დავმარცხდით - 6:13.

2. კვირის ჰიტი მხოლოდ თამაში ან გოლი როდია. შეიძლება უბრალო გამოძახილიც იქცეს ჰიტად.

გამოძახილები კი, იცოცხლეთ, მრავლად იყო. ქართველები ხომ ვწერდით და ვწერდით ექვს ერში ჩვენი მიღების სამართლიანობაზე, უელსი-საქართველოს მატჩის შემდეგ მსოფლიოს სარაგბო თუ არასარაგბო საიტებმა პირი შეკრეს: ასეთი თამაშით საქართველომ ექვსი ერის კარზე კი არ დააკაკუნა - წიხლი ჰკრაო.

თუ აკვირდებოდით, მატჩის მსვლელობისას არბიტრი ცდილობდა მაქსიმალურად ყურადღებით ყოფილიყო და საქართველოს ნაკრები იოტისოდენადაც არ დაჩაგრულიყო. ასეთი მიდგომა აქამდე ნამდვილად არ შეგვინიშნავს. ნუთუ, ქართველებისთვის ყურადღების მიქცევა არბიტრს რაგბის საერთაშორისო ორგანიზაციამ დაავალა?

არ გამოვრიცხავთ, თუმცა სამწუხარო ის არის, რომ მხოლოდ ამა თუ იმ გუნდის კარგი თამაში და რაგბის მსოფლიო ორგანიზაციის მხარდაჭერა არ არის საკმარისი ექვს ერში შესაბიჯებლად. იქ ექვს სარაგბო ქვეყანას თავისი ბიზნესი აქვს, თავისი გათვლები და ერთმაც რომ თქვას - სათამაშოდ ცხრა მთას იქით, კავკასიაში ვერ ჩავალო, შესაძლოა, საქართველო არც მიიღონ...

3. ბოლო ქართველები, რომელთაც ჩემპიონთა ლიგის პლეი ოფის სტადიაზე გააღწიეს, ლევან კობიაშვილი და კახა კალაძე იყვნენ. ახლა ერთი ფეხბურთის ფედერაციის პრეზიდენტი და პარლამენტარია, მეორე კი - ქალაქის მერი.

2008 წლის პლეი ოფში კალაძის "მილანი" მერვედფინალში "არსენალთან" დამარცხდა, კობიაშვილის "შალკე" კი "პორტუს" გასცდა, მაგრამ მეოთხედფინალში "ბარსელონასთან" ორივე მატჩში 0:1 დამარცხდა.

21 ნოემბერს ჩემპიონთა ლიგაზე ნეაპოლში ფრე რომ დაფიქსირებულიყო, ან "შახტარს" მოეგო, 10-წლიანი პაუზის შემდეგ ქართველ ფეხბურთელს ჩემპიონთა ლიგის პლეი ოფის ეტაპზე ვიხილავდით. თუმცა უკრაინელებმა იტალიაში 0:3 დათმეს. ამის მიუხედავად, დავით ხოჭოლავას "შახტარს" მიზნამდე მაინც მხოლოდ ქულა რჩება - ჯგუფური ეტაპის ბოლო ტურში დათოს თანაგუნდელები კიდევ უფრო მრისხანე "სიტის" დაუხვდებიან.

ამ კვირაში ისტორიული ფაქტი ვერ დავაფიქსირეთ, დაველოდოთ ბოლო ტურს...

4. პოლონურ ბუდგოშჩში 23-წლამდელ ბერძენ-რომაელთა მსოფლიოს ჩემპიონატის მეორე დღე ჩვენი ნაკრებისთვის წარმატებული აღმოჩნდა:

4-დან სამი მოჭიდავე ფინალში გავიდა, რომელთაგანაც ერთმა მოიგო და მსოფლიოს ჩემპიონიც გახდა - ევროპისა და ოლიმპიადის ბრინჯაოს პრიზიორი შმაგი ბოლქვაძე (66), ხოლო ორი დამარცხდა და ვერცხლის მედლებს დასჯერდნენ: მსოფლიოს პრიზიორი უფროსებში ლაშა გობაძე (80) და ზვიად პატარიძე (130).

გახსოვთ, ეს შმაგი რომელი შმაგია? - ოლიმპიადაზე ბრინჯაოს მედალი რომ მოიპოვა. აი, ვისი იმედი უნდა გვქონდეს!

5. საქართველოს კალათბურთელთა ნაკრები ისტორიის ახალ ეტაპზე რომ გადადის, მე-9 გვერდზე წაიკითხავთ. დიდი საკადრო პრობლემების მიუხედავად, ილიას ზუროსი თავისი შეგირდებით გერმანიაში იმედიანად ჩავიდა.

ვისურვოთ, ყველაფერი ისე წარმართულიყოს, რომ მომავალ კვირას მთავარ ჰიტად საქართველოს კალათბურთელთა ნაკრების თამაშები შეგვერჩიოს.

ყოველდღიური სპორტული გაზეთი "ლელო"
2745
მკითხველის კომენტარები / 0 /
მსგავსი ამბები
რუბრიკის სხვა სიახლეები