7-კაცა რაგბი. კოლომიეში ტოკიოს საგზურისთვის  

საქართველოს შვიდკაცა რაგბის ნაკრები 2020 წლის ზაფხულის ოლიმპიური თამაშების შესარჩევი ტურნირისთვის ემზადება და მარტყოფის რაგბის ბაზაზე ერთკვირიან შეკრებას დღეს დაასრულებს.

ჩვენმა გუნდმა ევროპის გრან-პრის პირველ, მოსკოვის ეტაპზე მე-10 ადგილი დაიკავა. ვინაიდან, ოლიმპიურ თამაშებში ინგლისი და უელსი ერთიანი გუნდით, დიდი ბრიტანეთის სახელით გამოდის, საქართველო 9 ნაკრებს შორის მოხვდა და ტოკიოს ზაფხულის თამაშების საგზურისთვის 13-14 ივლისს საფრანგეთში, კოლომიეში იბრძოლებს.

გუნდთან ერთადა შეკრებაზე იმყოფებოდა სამხრეთაფრიკელი ფიზმომზადების მწვრთნელი გრაჰამ ბენზი, რომელსაც ადრე გერმანიისა და კენიის შვიდკაცა რაგბის ნაკრებებში უმუშავია. ჩვენს გუნდს კი, სამხრეთაფრიკული შეკრებისას ეხმარებოდა.

„საწვრთნელ შეკრებაზე 19 მორაგბე გვყავს და კონკურენცია საკმაოდ მაღალია. ბენზიმ იცის რა თემაზე უნდა ავარჯიშოს ბიჭები. გვქონდა კონტაქტური ვარჯიშებიც, რაც ტრავმის ალბათობას ზრდის, მაგრამ სხვანაირად ვერ გავიზრდებით. მოსკოვის ტურნირმა დაგვანახვა, თუ რა სისწრაფეებზე მოგვიწევს თამაში და მზადებაც შესაბამისია“. - თქვა ნაკრების მთავრმა მწვრთნელმა ზაზა ლეჟავამ.

ოლიმპიადის შესარჩევ ეტაპზე საქართველო C ჯგუფში ინგლისის, გერმანიისა და ლიტვის ნაკრებებთან ითამაშებს. შეგახსენებთ, რომ ოლიმპიადის საგზურს ტურნირის გამარჯვებული იღებს, ხოლო მეორე-მესამე გუნდები რეპეშაჟში გადაინაცვლებენ.

საქართველოს ნაკრები
გიორგი ჭუაძე (აკადემია), ნიკოლოზ გიგაური (არმაზი), ნიკო აფციაური (ლოკომოტივი), სანდრო მამამთავრიშვილი (ლელო), დაჩი კოპაძე (ლოკომოტივი), ნიკა სუხაშვილი (მეტალურგი), ლაშა ლომიძე (აია), ირაკლი სვანიძე (ჯიქი), სანდრო სვანიძე (არმაზი), იოანე ხელაია (ლოკომოტივი), ლადო მიმინოშვილი (ბათუმი), დავით თაბუკაშვილი (ხარები), რამაზ ხარაზიშვილი (იუნკერები), რევაზ ხარაზიშვილი (იუნკერები), გიორგი ბაბუნაშვილი (აია), იაგო ხაბულიანი (აია), ანზორ სიჭინავა (ბათუმი), ბექა წიკლაური (ლოკომოტივი), ბონდო ლომიძე (იუნკერები).

ყოველდღიური სპორტული გაზეთი "ლელო"
331
მკითხველის კომენტარები / 0 /
მსგავსი ამბები
რუბრიკის სხვა სიახლეები
;