7 წლის შემდეგ 'აია' ფინალშია!

* ქუთაისის "აია" ფინალშია, რომელიც 13 მაისს გაიმართება.
* 6 მაისს წინასწარი ფინალი გაიმართება.
* "არმიამ" დიდ ათში ადგილი შეინარჩუნა.

საქართველოს მოქმედი ჩემპიონი გორის "ჯიქი" ტიტულის შენარჩუნებისთვის ბრძოლას განაგრძობს - გასავარდნ ფინალში გორელებმა "ბათუმი" დაამარცხეს. ამასობაში, გაირკვა დიდი ფინალის ერთი მონაწილის ვინაობაც - რამდენიმეწლიანი ამაო მცდელობის შემდეგ, ქუთაისის "აიას" ჩემპიონობამდე ერთი ნაბიჯიღა აშორებს.

ლოკომოტივი-აია 15:20

ლოკომოტივი: (15-9) წიკლაური, გოგოლაშვილი, გაგოშვილი, კავთიძე, შკინინი, აფციაური (ჩიღვინიძე 11), ბეგაძე; (1-8) ქვათაძე, მამუკაშვილი (ხიდეშელი 76), ქართველიშვილი (ცუცქირიძე 41), კოპაძე, გეგია (დარასელია 76), ფოფხაძე, გასვიანი, ამირანაშვილი.
2ლ: ბეგაძე (2). ს, გ: წიკლაური.

სინბინი: გოგოლაშვილი

აია: (15-9) ძნელაძე, ლოსაბერიძე, სიმსივე, ირემაძე (წივწივაძე 61), აბრამიძე (მანაგაძე 54), გობეჯიშვილი, როხვაძე (თუთბერიძე 41); (1-8) სალდაძე, ტორაძე (ერემეიშვილი 56), ხარებავა (რატიაშვილი 41), მ. ბაბუნაშვილი, შალამბერიძე, ხანთაძე, დანგაძე, არეშიძე (მღებრიშვილი 79).
3ლ: ლოსაბერიძე, ბაბუნაშვილი, მანაგაძე. ს, გ: ლოსაბერიძე.

სინბინი: დანგაძე, სალდაძე.

მსაჯი: შოთა თევზაძე

ოდინდელი მეტოქეების ორთაბრძოლა "ავჭალის სარაგბო სტადიონზე" გაიმართა. რეგულარულის გამარჯვებულმა თბილისის "ლოკომოტივმა" ქუთაისის "აიას" უმასპინძლა და 15:20 დამარცხდა.

სტუმართა გუნდს სამი წამყვანი მოთამაშე აკლდა. მგეზავი გიორგი ბაბუნაშვილი და ფულბეკი მირიან მოდებაძე ტრავმირებულნი არიან. მესამეხაზელი არსენ მაჩალიძე კი, 20-წლამდელთა ნაკრებშია მივლინებული. ამდენად, "აიამ" მგეზავად 18 წლის დავით გობეჯიშვილი ათამაშა, რომელსაც ამ პოზიციაზე თამაში არ გასჭირვებია, თუმცა ორჯერ კარში დარტყმა გაუცუდდა და ეს მისია გარემარბად მოთამაშე დავით ლოსაბერიძემ ითავა.

ამ მატჩმა გამოაჩინა, რომ დანაკლისის მიუხედავად, "აია" უკეთესი გუნდია. ერთადერთი კომპონენტი, რაშიც "ლოკომოტივი" მეტოქეს სჯობდა, შერკინება იყო. თუმცა, ისიც პირველ ტაიმში. შესვენების შემდეგ ქუთათურებმა ამ რგოლში თითქმის გაათანაბრეს თამაში და ერთხელ რკინიგზელები დააჯარიმეს კიდეც.

"ლოკომოტივს" დასაწყისშივე სამწუხარო ფაქტი შეემთხვა. მარჯვენა მხარი დაიზიანა მგეზავმა გიორგი აფციაურმა და ის უკვე მე-11 წუთზე შესაცვლელი შეიქნა. ამან, ცხადია, გუნდის თამაშში გარკვეული კორექტივები გამოიწვია.

პირველ ტაიმში "აია" სათამაშო უპირატესობას ფლობდა. თუმცა, ქუთაისელი მორაგბეების მიერ დაშვებული შეცდომა რკინიგზელებმა კარგად გამოიყენეს და მეტოქეს ანგარიშში დაწინაურების საშუალება არ მისცეს. მეტიც, პირველი ტაიმი ფრედ - 5:5 დასრულდა. ანგარიში მე-17 წუთზე "აიამ" გახსნა. დერეფნიდან აგორებული მოლით ბურთი ლელოში ლოსაბერიძემ შეიტანა.

გარდასახვა გობეჯიშვილმა დაარტყა და ააცილა - 5:0. "ლოკომოტივმა" საპასუხო ლელო 9 წუთში მიითვალა. რკინიგზელებმა "აიას" "მიჰბაძეს", დერეფნიდან მოლი ააგორეს. მასში დროულად ჩაერთო ცხრა ნომერი გიორგი ბეგაძე, რომელმაც ბურთი ჩათვლის მოედანში დაამიწა. ბექა წიკლაურმა გარდასახვა ვერ გაიტანა - 5:5.

შესვენების შემდეგ პირველი 20 წუთი ისევ "აია" დომინირებდა. ქუთათურებმა 59-ე წუთისთვის 12 ქულით დაწინაურება შეძლეს. 43-ე წუთზე საჯარიმო ლოსაბერიძემ გაიტანა. ხუთ წუთში "აიას" მრავალფაზიანი შეტევა მეორეხაზელმა მიხეილ ბაბუნაშვილმა მიძალებით ლელოთი დაასრულა, ლოსაბერიძემ კი გარდასახა - 15:5.

"ლოკომოტივმა" ორ წუთში ყოველივე ამას საჯარიმოთი უპასუხა - 8:15. 59-ე წუთზე კი, "აიას" უკანახაზელებმა ხელდახელ გაითამაშეს კომბინაცია და შეცვლაზე შესულმა თორნიკე მანაგაძემ ლელოში შეაღწია. ლოსაბერიძემ ვერ გარდასახა - 20:8.

ამის შემდეგ ინიციატივა მთლიანად მასპინძლებმა აიღეს ხელში. თუმცა, მხოლოდ ანგარიშის შემცირება შეძლეს. 71-ე წუთზე "ლოკომოტივის" მორკინალებმა მარჯვენა ფრთაზე ხანგრძლივი შტურმი მოუწყვეს მეტოქეს.

ბოლოს ბურთი მარცხნივ გაათამაშეს. ლელოდან ხუთ მეტრში წარმოქმნილი რაკიდან ბურთი ბეგაძემ აიტაცა, ცრუ მანევრით აჩვენა, რომ ბურთს უფრო მარცხნივ, ხაზის მოთამაშეებს აძლევდა და თვითონვე შეუტია. გარდასახვა წიკლაურმა გაიტანა - 15:20.

დარჩენილ დროში "ლოკომოტივს" არაერთხელ ჰქონდა შანსი თუნდაც ანგარიში გაეთანაბრებინა, მაგრამ "აია" თავდადებით იცავდა საკუთარი ლელოს მისადგომებს და ფინალში დამსახურებულად გავიდა.

ჯიქი-ბათუმი 25:19

ჯიქი: (15-9) კიკნაძე (გოგოლიძე 52), სამხარაძე, დევსურაშვილი, ჯინჯიხაძე, სვანიძე (ბიწაძე 75), მ. ნინიძე, კლდიაშვილი (ნადირაძე 77); (1-8) ორაგველიძე (სუთიძე 76), ჭყოიძე (მაჭარაშვილი 76), პატარაია (ფსუტური 66), გოგოლიძე, ტრაპაიძე, შენგელია, მჭედლიშვილი, სუხაშვილი (დიდებულიძე 62)
3ლ: სვანიძე, შენგელია (2). 2ს, 2გ: ნინიძე.

ბათუმი: (15-9) კობახიძე, მიმინოშვილი (ბოთა 50), გოგიტიძე, ტორაძე (ტრაპაიძე 50), ურჯუკაშვილი, ხმალაძე, თუთბერიძე (ნინიძე 79); (1-8) ერისთავი (კვანტიძე 69), მამრიკიშვილი, დონაძე (გოგისვანიძე 62), მიქავა, ქოიავა, კორტავა (თედორაძე 75), ფუტკარაძე, ბუჯიაშვილი.
2ლ: ქოიავა, გოგიტიძე. 3ს: კობახიძე

მსაჯი: ნიკა ამაშუკელი

ქვეყნის მოქმედმა ჩემპიონმა გორის "ჯიქმა" გასავარდნ ფინალში შინ მიიღო ბათუმი და 25:19 სძლია მას. მასპინძლები მეტოქეზე ბევრად სწრაფად ირჯებოდნენ და ტაქტიკურ გადაწყვეტილებებსაც უკეთ იღებდნენ. "ჯიქი" შეუპოვარი, ბოლომდე მებრძოლი გუნდია და ეს ამ მატჩშიც არაერთხელ დაამტკიცა.

პირველ ტაიმში მასპინძლების მცირე უპირატესობა აღინიშნა, რაც ანგარიშშიც აისახა - 11:6. ბათუმელებმა მხოლოდ ორი საჯარიმოს გატანა შეძლეს. გორელებმა ასევე ორით უპასუხეს და ზედ ლელოც მიაყოლეს, რომელიც დიდოსტატურად იყო გათამაშებული.

"ჯიქი" მარცხენა ფრთიდან უტევდა. მორკინალების მიძალებით მეტოქეს უკან დაახევინა და თამაშის წესის დარღვევაც აიძულა. მატჩის არბიტრმა უპირატესობა აღნიშნა. მგეზავმა მამუკა ნინიძემ ბურთი ფეხით საპირისპირო, მარჯვენა ფრთაზე გადაკიდა, სადაც გარემარბი ირაკლი სვანიძე უმეთვალყუროდ იყო მიტოვებული. გარდასახვა ნინიძემ დაარტყა, მაგრამ არაზუსტად.

ხუთქულიანი უპირატესობა, ცხადია, მასპინძლებს დამშვიდების საშუალებას არ აძლევდა. ამიტომ, შესვენებიდან მობრუნებულებმა მეტოქეს გაორკეცებული ენერგიით შეუტიეს. 47-ე წუთზე "ჯიქმა" ჯერ მოლი ააგორა, მერე რაკიდან მორკინალები რამდენჯერმე მიეძალნენ, ბოლოს კი, გუნდის კაპიტანმა გურამ შენგელიამ ლელო ზედ ძელთან გაიტანა. ნინიძე, გარდასახვა არ გასჭირვებია. 18:6.

"ბათუმს" მდგომარეობის გამოსასწორებლად 30 წუთზე მეტი ჰქონდა. ზღვისპირელებმა მარცხის საფრთხე რომ იგრძნეს, ტემპს უმატეს. ფულბეკმა ბახვა კობახიძემ მალევე საჯარიმოთი ოდნავ შეამცირა ანგარიშში სხვაობა - 9:18. მე-60 წუთზე კი, თავი "ბათუმის" მეორეხაზელმა სანდრო ქოიავამ გამოიჩინა. კობახიძემ გარდასახვიდანაც ზუსტად დაარტყა და ანგარიშში სხვაობა ოთხ ქულამდე დავიდა - 14:18.

წინ კიდევ 20 წუთი იყო და, ცხადია, სტუმრებს მატჩის მოგებაც შეეძლოთ, მაგრამ გორელთა რიგებში ისევ შესანიშნავად გაისარჯა კაპიტანი. 73-ე წუთზე შენგელიამ ბურთი მეტოქის ლელოდან ათ მეტრში დანიშნული შერკინებიდან აიტაცა, მოკლე ფრთაზე შეუტია, გზად ხელის კვრით ორი მეტოქე მოიცილა და მეორე ლელო მიითვალა. ნინიძემ გარდასახა - 25:14.

"ბათუმი" დანებებას არ აპირებდა და მატჩის ბოლო წუთები შეტევაში გაატარა. ბოლო წუთზე შუამარბმა გიორგი გოგიტიძემ ლელოც გაიტანა, მაგრამ გამარჯვების მოსაპოვებლად ეს საკმარისი არ იყო. "ბათუმი" ასპარეზობას გამოეთიშა. "ჯიქი" კი, 6 მაისს თბილისში, "ლოკომოტივს" დაუპირისპირდება წინასწარ ფინალში. აქ გამარჯვებული დიდ ფინალში "აიას" წინააღმდეგ ითამაშებს.

გადასასვლელი პლეი ოფი

ყოჩები-არმია 17:56
6 მაისი

წინასწარი ფინალი
ლოკომოტივი-ჯიქი

ყოველდღიური სპორტული გაზეთი "ლელო"
1083
მკითხველის კომენტარები / 0 /
მსგავსი ამბები
რუბრიკის სხვა სიახლეები
;