98 კენშო და ბრწყინვალე ასპარეზობის პრიზი

30 წლის ლევან გორგაძემ (ტოჩინოშინი) წლის მეორე სუპერტურნირზე (ჰარუ ბაშო) ბრწყინვალედ იასპარეზა.

დასავლეთის სეკივაკეს რანგში მოჭიდავე ქართველმა 15-დან 10 ორთაბრძოლა მოიგო, თანაც, მაღალი კლასის სუმო აჩვენა და სუმოს ასოციაციისგან ბრწყინვალე ასპარეზობის სპეციალური პრიზი დაიმსახურა.

მან ეს პრიზი (შუკუნ-შო) კარიერაში მეორედ მიიღო. პირველად ეს მისთვის ტრიუმფალურ იანვრის ბაშოზე მოხდა, როცა ქართველი ისტორიაში მესამე ევროპელი გახდა, ვინც იაპონიის იმპერატორის თასი მოიგო.

ტოჩინოშინის სასარგებლოდ ისიც მეტყველებს, რომ ბაშოს დაწყებამდე რამდენიმე დღით ადრე მან საკმაოდ სერიოზული ტრავმა მიიღო ვარჯიშზე, მაგრამ ოსაკაში მტკივანი ფეხითაც ბრწყინვალედ იასპარეზა.

ხუთშაბათს, დიდი ჩემპიონი კაკურიუს დამარცხების შემდეგ, ტოჩინოშინმა პარასკევს მოულოდნელად, შოდაისთან დათმო. ამას მოჰყვა გამარჯვება ჩიომარუსთან და დიდებული ბრძოლა კომუსუბი იჩინოჯოსთან, რომელიც ასევე ქართველის გამარჯვებით დასრულდა.

10-5 ბალანსი სამომავლოდ ტოჩინოშინს ჩემპიონის (ოძეკი) რანგის მიღების შესანიშნავ პლაცდარმს აძლევს. ახლა კი ქართველი ნახევარი საფეხურით დაწინაურდება - დასავლეთის ნაცვლად აღმოსავლეთის სეკივაკე გახდება.

ამ ბაშოზე მან 98 კენშო (ბრძოლის მოგებისთვის დაწესებული ფულადი ჯილდო) მოიგო.

მონღოლმა კაკურიუმ ბოლო დღესაც დათმო ერთი ბრძოლა, მაგრამ 13-2 ბალანსით იმპერატორის თასი მოიგო, რაც მის კარიერაში მეოთხედ მოხდა.
სპეციალური პრიზები ტოჩინოშინის გარდა ენდომ (ტექნიკური რიკიში) და კაისეიმ (მებრძოლი სული) მიიღეს.

თეიმურაზ ჯუღელმა (გაგამარუ) ძურიოს დივიზიონი დადებითი ბალანსით დაასრულა - 8-7. ის აღმოსავლეთის მე-5 ნომერია. ვნახოთ, ეყოფა თუ არა მინიმალური დადებითი ბალანსი ქართველს ელიტაში დასაბრუნებლად.

სუმოს ახალი რეიტინგი (ბანძუკე) 30 აპრილს გამოქვეყნდება. მაისის ბაშო კი ტოკიოს "კოკუგიკანში" 13-27 მაისს გაიმართება.

საბოლოო მდგომარეობა
13-2: კაკურიუ (იოკოძუნა);
12-3: ტაკაიასუა (ოძეკი), კაისეი (მაეგაშირა 6);
11-4: იკიოი (მ 14);
10-5: ტოჩინოშინი (სეკივაკე), აბი (მ 7), იუტაკაიამა (მ 11), დაიამამი (მ 16).

ყოველდღიური სპორტული გაზეთი "ლელო"
4119
მკითხველის კომენტარები / 0 /
მსგავსი ამბები
რუბრიკის სხვა სიახლეები
;