All or Nothing: პეპის თავისი თავი არ უყვარს [დასაწყისი წინა ნომერში]

პეპ გვარდიოლა ბევრს მიაჩნია ისეთ მწვრთნელად, რომელსაც საკუთარი თავი იდეალურად მიაჩნია და უყვარს. მის ამგვარ იმიჯს კარგად ამყარებდნენ ზლატან იბრაჰიმოვიჩი და იაია ტურე, რომლებიც საჯაროდ ლანძღავდნენ პეპს პრესაში და აცხადებდნენ, რომ გვარდიოლას უყვარს, როცა მას გენიოსად მიიჩნევენ და გუნდში ასეთი იმიჯი შეიქმნა.

სერიალი სულ სხვა რამეზე ლაპარაკობს. პეპი რამდენიმე სერიაში ეუბნება მოთამაშეებს, რომ ის არ არის იდეალური, რომ შეცდომებს უშვებს, გუნდის წარმატებებში დამსახურება არა მასში, არამედ მოთამაშეებშია. რვიდან არც ერთ სერიაში პეპი არ წამდგარა გუნდის წინაშე გადამეტებული თვითშეფასებით.

"შეგიძლიათ წარმოიდგინოთ ბიჭი, რომელიც ბურთებს არიგებს? თავის მშობლიურ პატარა ქვეყანაში. ის 13 წლის გახდა და აკადემიაში წავიდა. და პირველ გუნდში, თავისი ოცნების გუნდში მრავალი წელი თამაშის შემდეგ, 37 წლის ასაკში მწვრთნელი გახდა. და ოთხი წლის შემდეგ, შეაზანზარა ფეხბურთი. ეს მე ვარ.

მე მაქვს ამგვარი პატივი. მე დავიპყარი პრემიერლიგა, ისევე, როგორც მთლიანად ფეხბურთი. და ხალხმა დაიწყო ლაპარაკი: "პეპის გუნდი", "ო, პეპი, როგორია ის...". ყველა მხრიდან ისმოდა. "ოჰ, როგორი კარგია, პეპი - ტოპია". არა, არა, არა.

ყოველთვის ვამბობდი ერთი და იგივეს - მადლობა თქვენ. რა თქმა უნდა, როცა ჩვენ ვკითხულობთ მედიას და პრესას, ხალხს სჯერა მწვრთნელის. მაგრამ, ბიჭებო, ეს მოგება თქვენ გეკუთვნით, ეს თქვენ გააკეთეთ ყველაფერი. ფეხბურთი, ბიჭებო, თქვენ გეკუთვნით და არა მე", - თქვა გვარდიოლამ ერთ-ერთ კრებაზე.

გვარდიოლა მუდმივად ემადლიერება მოთამაშეებს, რომლებიც მატჩების ბედს გასახდელში გადაწყვეტენ, კეთილგანწყობილია ტურეს მიმართ, რომლის აგენტი მთელი სეზონი აკრიტიკებდა მას. პეპი სერიალში არ მოჩანს იმ ადამიანად, რომელსაც უნდა, რომ მას აღმერთებდნენ და ბრმად ემორჩილებოდნენ, რადგან ისიც შეცდომებს უშვებს და ამას თავად აღიარებს.

"ყველანი შიგნით! ყველანი გასახდელში, მე ვთქვი!" - ყვიროდა პეპი და მოთამაშეებსა და პერსონალს ოთახში ძალით ტენიდა, სანამ ისინი მსაჯებთან კამათობდნენ და "უიგანის" წარმომადგენლებს ეძიძგილავებოდნენ სათასო მატჩის შესვენებაზე. იმ მატჩში ფაბიან დელფი პირველ ტაიმში გააძევეს და ამან ყველა გააცოფა.

"მორჩა, გადავყლაპეთ! არანაირი ლაპარაკი! დალიეთ წყალი, დაისვენეთ, დამშვიდდით!" როცა გვარდიოლამ დაიწყო მეორე ტაიმისთვის 10 ფეხბურთელით სათამაშო ახალი სქემის ახსნა, რომელშიც მცველი სანე უნდა ყოფილიყო, უკვე პეპი გამოვიდა წყობიდან:

"ნუ გაქვთ უკმაყოფილო სახეები, გთხოვთ. ღმერთი არ ვარ! არასაკმარისად კარგი ვარ და ვიცი ეს. ნუ გაქვთ ასეთი სახეები, გთხოვთ. მე არ მინდა ამის დანახვა ჩემს გუნდში. ვცდილობ გავაკეთო უკეთ, სულ ეს არის. რამდენიმე წლის შემდეგ, მწვრთნელები გახდებით და მაშინ აკეთეთ რაც გსურთ, არანაირი პრობლემა.

მაგრამ დღეს, ბიჭებო, მე ვარ აქ ბოსი და ვიღებ გადაწყვეტილებას! არ არის საჭირო უკმაყოფილო სახეები არც ახლა და არც მომავალში! მე თქვენ პირველ დღეს გითხარით, რომ მე იდეალური არ ვარ და ვუშვებ შეცდომებს. შეეცადეთ, დამეხმაროთ".

ვერ დაეხმარნენ: "სიტიმ" 0:1 წააგო და თასიდან გავარდა. პეპი არავის ადანაშაულებდა: "მე ვერაფერში ვუსაყვედურებ მოთამაშეებს. ისინი კარგად თამაშობდნენ. ვიღებთ ამ წაგებას".

სერიალიდან ისე ჩანს, "ლივერპულთან" ჩემპიონთა ლიგის მეოთხედფინალების წინ, პეპი და მისი შტაბი გრძნობდა, რომ ყველაფერი შეიძლება ცუდად დამთავრებულიყო. ასისტენტებთან მარტო დარჩენილმა გვარდიოლამ აღიარა, რომ პრობლემები იქნებოდა.

"მათი თავდამსხმელები ძლიერები არიან. მეშინია მათი. ძალიან სახიფათონი არიან. მაქვს წინათგრძნობა, რომ სალაჰი მეცხრე ნომრად ითამაშებს, ფირმინო კი ფლანგებზე გადავა. ჩვენი ფლანგის მცველი ვერ დაკეტავს მათ მოთამაშეს".

"მე გეუბნებოდი, რომ მათ უჭირთ თავისუფალი სივრცის გარეშე, როგორც "კრისტალ პალასთან" მატჩში. მაგრამ ჩვენ ბევრს ვრისკავთ, - უპასუხა ანალიტიკოსმა კარლეს პლაშარტმა. - გადავხედე ჩვენს გუშინდელ მატჩს და როცა იქ მივედით და წავაგეთ, ისინი სულ სხვა დონეზე თამაშობდნენ".

"კრისტალ პალასთან" მატჩის წინ, პეპმა შეაქო კიდეც პლანშარტი მთელი გუნდის წინაშე და სცადა ეჩვენებინა არა თავისი, არამედ მთელი შტაბის მწვრთნელების მნიშვნელობა.

"თქვენ იცნობთ მას? ეს ბიჭი ჩემთან არის მთელი კარიერის განმავლობაში, ჯერ კიდევ მეოთხე დივიზიონიდან. სამი თუ ოთხი დღის წინ, მან მითხრა და მე მისი ძალიან მჯერა:

ვოუ, "კრისტალ პალასი". "კრისტალ პალასთან" მატჩი ოთხი დღის შემდეგაა, მაგრამ იცოდეთ, ეს იქნება ძალიან ხისტი ბრძოლა. ეს არის ტოპ-გუნდი ზაჰასთან, ბენტეკესთან, ლოფტუს-ჩიკთან, თაუნსენდთან და კაბაისთან ერთად. ძალიან ორგანიზებული. ხვალ ჩართეთ ტელევიზორი, ნახეთ მათი თამაში "არსენალთან" და დაიწყეთ ფიქრი ნათქვამზე".

საგულისხმოა, რომ სწორედ "კრისტალ" პალასმა" შეწყვიტა "სიტის" მოგებათა სერია.

პეპისთვის რეკორდებიც მნიშვნელოვანია

"სიტი" სერიოზულად განიხილავდა ჩემპიონობის გაფორმებას "მანჩესტერ იუნაიტედთან" დერბიში. გვარდიოლამ მატჩის წინა გარჩევაზე თხოვა ფეხბურთელებს - მიეწვიათ თავიანთი ნათესავები და მეგობრები სტადიონზე, ხოლო კლუბის ხელმძღვანელობა განიხილავდა, როგორ ჩაეტარებინათ ზეიმი, რა ექნათ მოედანზე გამოცვენილი მაყურებლებისთვის, რადგან არ შეიძლებოდა "ლივერპულთან" ჩემპიონთა ლიგის განმეორებითი მატჩის წინ მოედნის გაფუჭება. მაგრამ "სიტიმ" წააგო და ზეიმის ნაცვლად, გასახდელში ფეხბურთელებმა ერთმანეთში კამათი დაიწყეს. ტურემ თქვა, რომ ძირითადის ფეხბურთელებმა ფიზიკურად დათმეს, დელფი მას შეეკამათა, ვიღაც ჩაერია ამ კამათში და საკუთარ ვერსიას წარმოადგენდა. ჩაერია პეპი.

"ახლა არ არის კამათის დრო. ბიჭებო, სტოპ, გაჩუმდით! იაია, ფაბი, ხმა ჩაიგდეთ ბიჭებო! გთხოვთ. ყველაზე ცუდი ამ სიტუაციაში - ერთმანეთის დადანაშაულებაა.

თუ თქვენ რამეს არ თანხმდებით, მაშინ უკმაყოფილება გამოხატეთ ჩემს გადაწყვეტილებებზე. ეს სეზონი დაუჯერებელია, და, რა თქმა უნდა, ეს მტკივნეულია.

ეს დერბი, მატჩი შინ "იუნაიტედთან". და ჩვენ შეგვეძლო გაგვეფორმებინა ჩემპიონობა, ჩვენ ამისთვის ვემზადებოდით. მაგრამ ეს ის მომენტია, როცა მინდა გუნდი ვნახო. ეს ნორმალურია, რომ წაგებისას ფიქრობთ, რომ არასაკმარისად იმუშავეთ.

"ჩვენ არ დავრბოდით". ეს სრული ნაგავია, ბიჭებო. ეს არ არის მთავარი, თუმცა მესმის, რაზეც კამათობთ. ფეხბურთი მაღალ დონეზე ძალიან რთულია და ჩვენ ვცდილობთ ავაშენოთ რაღაც კარგი. თქვენ აკეთებთ ამას. მაგრამ, ახლა, არ გაუშვათ ხელიდან ეს ბიჭებო! არ ჩამოუშვათ ხელები ბოლოში "ლივერპულთან" და "მანჩესტერ იუნაიტედთან" წაგების გამო. ნუ გადაუსვამთ ყველაფერს ხაზს, რაც აქამდე გააკეთეთ. ბოლო მიძალებაა საჭირო, ბიჭებო და ერთად ყოფნა. ეს არის ტესტი ნამდვილი მამაკაცებისთვის და ნამდვილი ფეხურთელებისთვის, პროფესიონალებისთვის", - თქვა გვარდიოლამ.

მოგვიანებით, "სიტი" გავარდა ჩემპიონთა ლიგაზე "ლივერპულისგან", მაგრამ დაამარცხა "ტოტენჰემი" და ჩემპიონობის გასაფორმებლად ელოდებოდა თამაშს "სუონსისთან". მაგრამ "მანჩესტერ იუნაიტედმა" მოულოდნელად წააგო და ჩემპიონობას გვარდიოლა გოლფის თამაშისას შეხვდა, ფეხბურთელები - შვებულებაზე. რამდენიმე მოთამაშე გამარჯვებას ახლობლებთან ერთად პაბში აღნიშნავდა, ვიღაც სახლში, კოლექტიური ზეიმი კი ბაზაზე დილით გაიმართა. მხოლოდ "ოქრო" გვარდიოლას არ აწყობდა.

"იღბლიანი ვარ, რომ მოვიგე რვა ჩემპიონობა. ზოგიერთი სეზონის ბოლო მატჩში, ზოგიერთი - ხუთი-შვიდი მატჩით ადრე. და ვიცი, რაც ემართებათ მოთამაშეებს. ჩემი გამოცდილებით, ხდება კატასტროფა. ვერ შევძელი დამერწმუნებინა მოთამაშეები - ყოფილიყვნენ კონცენტრირებულები. და ეს არაფერს ცვლიდა, უბრალოდ, სეზონი მთავრდებოდა. იპოვნეთ თქვენთვის რაღაც, რაც გაიძულებთ თქვათ: "ოქეი, შევეცდები მოვინდომო". ჩემი წინადადებაა: მოდით, გავაკეთოთ ეს, რათა შევიდეთ ისტორიაში. ტიტული მოგებულია და ეს სამუდამოდ ჩვენთან დარჩება".

გვარდიოლამ მოთამაშეებისთვის მოამზადა სპეციალური რეკორდების ცხრილი - გოლები, ქულები, ბურთების სხვაობა და სხვა მაჩვენებლები. "მაშ ასე, ჩვენ გვაქვს 87 ქულა, რეკორდია - 95. მოვიგებთ ხუთ მატჩს და გავაკეთებთ იმას, რაც ლიგის ისტრიაში არავის გაუკეთებია. ყველაფერი თქვენს ხელშია. ამან შეიძლება აღმაფრენა მოგცეთ. მე არ ვაპირებ მოვითხოვო ეს თქვენგან". მაგრამ, პეპი ითხოვდა და ყოველთვის ახსენებდა იმას, რომ ყველა მატჩის მოგებაა საჭირო.

სეზონის ბოლო მატჩში "სიტიმ" მოიგო, როცა ბოლო წამებზე გაუტანა "საუთჰემპტონს" და დაამყარა რეკორდი ქულების (100), მოგებებისა (32) და გოლების (106) რაოდენობით. გასახდელში იყო ზეიმი, თითქოს "სიტიმ" კიდევ ერთი ტიტული აიღო.

"მე არ შემიძლია იმის თქმა, რომ ჩვენ საუკეთესო გუნდი ვართ ინგლისური ფეხბურთის ისტორიაში, რადგან ეს არასწორია. მაგრამ ყველა მაჩვენებლით, ციფრებით და სტატისტიკით - ჩვენ საუკეთესოები ვართ. და ეს მართალია", - თქვა მატჩის შემდეგ გვარდიოლამ.

ყოველდღიური სპორტული გაზეთი "ლელო"
861
მკითხველის კომენტარები / 0 /
მსგავსი ამბები
რუბრიკის სხვა სიახლეები
;