BleacherReport: NBA-ს დრაფტზე ბითაძეს "სან ანტონიო" მე-19 ნომრად აირჩევს

დრაფტისწინა ვარაუდები ამერიკელ ჟურნალისტებს კარგად ეხერხებათ. წვრილი თუ მსხვილი გამოცემები საკუთარ ვერსიებს თამამად აქვეყნებენ. ჩვენთვის კი გაცილებით ფასეულია იმ საიტების პუბლიკაციები, რომლებსაც ამერიკაში "სიტყვა ეთქმით". ასეთთა შორისაა Bleacherreport, რომლის ჟურნალისტმა დევიდ კენიონმა პერსპექტიული კალათბურთელები დრაფტის პირველ წრეში კლუბებში გადაანაწილა.

ქართველი გოგა ბითაძე ტოპ-20-ში მოხვდა. დევიდ კენიონის მოსაზრებით მას "სან ანტონიო სპურსი" მე-19 ნომრედ აირჩევს. თუ მართლაც ასე მოხდა, ეს პირველი შემთხვევა არ იქნება, როცა დრაფტის შემდეგ "სან ანტონიოში" ქართველი კალათბურთელი მოხვდება.

2012 წლის შემდეგ: პირველი ქართველი NBA-ს დრაფტზე - გოგა ბითაძე

2004 წელს ვიქტორ სანიკიძე მეორე წრეში "ატლანტამ" აირჩია, თუმცა იმავე საღამოს "სპურსმა" გაცვლა-გამოცვლის შედეგად ვიქტორი სათავისოდ დაიბევა. დასანანია, რომ ქართველმა ფორვარდმა ტრავმების გამო ვერ მოახერხა ტეხასელების შემადგენლობაში მოხვედრა. იგი ერთ წელს, ისევე როგორც გუნდის რიგითი წევრი, ოპერაციის შემდეგ რეაბილიტაციას სან ანტონიოში გადიოდა.

გუნდის მწვრთნელი გრეგ პოპოვიჩი გუნდური კალათბურთის მომხრეა. ამ საქმეში კი ევროპელი კალათბურთელები ამერიკელებს სჯობიან და ამიტომაცაა სადღეისოდ "სპურსში" ბევრი ევროპელი. თუ პოპოვიჩმა გადაწყვიტა, რომ გოგა ბითაძე სჭირდება, მას სათანადო დროსაც დაუთმობს, ხოლო თუ გამოცდილების მისაღებად ევროპაში გაუშვებს, სჯობს "სან ანტონიოს" ნაცვლად რომელიმე აუტსაიდერმა გუნდმა აირჩიოს.

როდესაც ესა თუ ის კლუბი მაღალ მიზნებს ისახავს, მწვრთნელები ხშირ შემთხვევაში ვერ ბედავენ ახალგაზრდების დატვირთვას. სწორედ ასეთ სიტუაციაში აღმოჩნდა თორნიკე შენგელია და ამიტომაც გადაწყვიტა კარიერის ევროპაში გაგრძელება.

დაველოდოთ მოვლენების განვითარებას. შეგახსენებთ, რომ NBA-ს დრაფტი 20 ივნისსაა.

2779
მკითხველის კომენტარები / 0 /
მსგავსი ამბები
რუბრიკის სხვა სიახლეები
;