calciomercato: რომა ჩაკვეტაძეს პეროტის შემცვლელად მოიაზრებს

იტალიურმა გამოცემა calciomercato- გიორგი ჩაკვეტაძეს წერილი მიუძღვნა და საქართველოს ნაკრებისა და "გენტის" შემტევი ნახევარმცველის სავარაუდო ტრანსფერზე საკუთარი ვერსია შემოგვთავაზა...

 

 "მისი სახელი უკვე ნიშნავს ისტორიას, რადგან 1999 წელს დაბადებული შემტევი ნახევარმცველი გიორგი ჩაკვეტაძე ერთა ლიგის ახალი გათამაშების პირველი ოფიციალური გოლის ავტორი გახდა მატჩში, რომელშიც საქართველოს ნაკრებმა ყაზახეთი დაამარცხა. ახალმა ტურნირმა და მანამდე კიდევ რამდენიმე ფაქტორმა მის პოპულარობას ხელი შეუწყო და რამდენიმე ევროპული კლუბის ყურადღებას მიიპყრო: თავდაპირველად "დორტმუნდი" და "ბაიერნი", ცოტა ხნის წინ კი "ბარსელონა" და "რომა" დაინტერესდნენ. "ბარსელონას" დამკვირვებლებმა აღნიშნეს მისი კარგი საშემსრულებლო ოსტატოტობა, როცა  ანდორის წინააღმდეგ ითამაშა და საქართველოს ნაკრებში პირადი საგოლე მონაგარი 4-მდე გაზარდა", - წერს calciomercato.

მერე იტალიური გამოცემა 19 წლის ქართველის მოკლე საფეხბურთო ისტორიას ჰყვება: "ჩაკვეტაძე თბილისის "დინამოში" გაიზარდა, სადაც დებიუტი 17 წლისას ჰქონდა, 2016 წლის ზაფხულში მან "გენტში" 1,5 მილიონი ევროს საფასურად  გადაინაცვლა, რომელმაც ბევრად მდიდარ კლუბებთან კონკურენცია მოიგო. პირველ სეზონში, რომელიც მისთვის ბელგიურ ფეხბურთან ადაპტირების პერიოდი იყო, 10 შეხვედრაში 1 გოლი გაიტანა. წელს კი ქართველი გუნდისთვის მნიშვნელოვანი ფიგურა გახდა და თავისი სტატისტიკა მნიშვნელოვნად გააუმჯობესა: ბელგიის ჩემპიონატის პირველი 15 ტურის შემდეგ უკვე 4 გოლი და 2 საგოლე გადაცემა აქვს აქტივში. ეს ციფრები მეტყველებს იმაზე, რომ ახალგაზრდა ტალანტი "აფეთქდა".

იტალიური გამოცემა ჩაკვეტაძეს აღმოსავლეთ ევროპის გამორჩეულ ტალანტად აფასებს: "ჩაკვეტაძე მარცხენაფლანგელია, რომელიც უკეთესია თავდასხმის ფაზაში. მისი გამოყენება განსაკუთრებით ეფექტურია 4-3-3 განლაგებაში. მომავალში ქართველის ფიზიკური ძალისა და სათამაშო ხედვის მქონე მოთამაშეს ნახევარდაცვის ცენტრში შეუძლია გახდეს მნიშვნელოვანი ფიგურა. ხარისხი კი საკმარისად აქვს - იოლად შეუძლია მეტოქის ერთი-ერთზე მოტყუება და დაცვითი ბარიერების გადალახვა, რაც მას აღმოსავლეთ ევროპის ერთ-ერთი საუკეთესო პერსპექტივის მქონე ახალგაზრდად წარმოაჩენს. ასევე შეიძლება გამოყენებულ იქნას როგორც გამთამაშებელი, რადგან მისი უნარი დაცვის  ხაზის წინააღმდეგ ეფექტურია".

"პეროტის შემდეგ" - ამ ქვესათაურით ამთავრებს calciomercato წერილს, სადაც ამტკიცებს, რომ ჩაკვეტაძეს რომაელები დიეგო პეროტის შემცვლელად განიხილავენ, რადგან არგენტინის ნაკრებისა და "რომას" შემტევი ნახევარმცველი გუნდის დატოვებას აპირებს:

"მისი სახელი ასევე ჩაინიშნეს "რომას"  სელექციონერებმა, რომელიც ეძებენ დიეგო პეროტის შემცვლელს. პეროტის ტრავმების და სხვა მიზეზების გამო გამო არგენტინაში დაბრუნება სურს და შესაძლოა, მალე "რომა" დატოვოს. ჩაკვეტაძის ტრანსფერი "გენტს" ეკუთვნის, რომელმაც ჯერ მისი გადასვლა დაბლოკა. ქართველის სატრანსფერო ღირებულება კი დაახლოებით  10 მილიონ ევროს შეადგენს".

ყოველდღიური სპორტული გაზეთი "ლელო"
1837
მკითხველის კომენტარები / 0 /
მსგავსი ამბები
რუბრიკის სხვა სიახლეები