CNN: ქართველებს წარმოუდგენელი გენეტიკა აქვთ

სანაკრებო რაგბის სეზონი მალე იწყება და საქართველოს ნაკრები ისევ უცხოური მედიის ინტერესის სფეროში მოხვდა.

ამჯერად ერთ-ერთმა ყველაზე პოპულარულმა გამოცემამ, CNN-მა დაგვაფასა, რომელმაც საკმაოდ ვრცელი პუბლიკაცია მიუძღვნა ქართულ რაგბის. გთავაზობთ ამონარიდს ამ სტატიიდან.

CNN პუბლიკაციას „ბორჯღალოსნების“ ახალი შერკინების მწვრთნელის, ინგლისელი გრემ როუნთრის დახასიათებით იწყებს და ხაზს უსვამს მის შთამბეჭდავ კარიერას, როგორც მოთამაშის, ასევე მწვრთნელის რანგში

„როდესაც მის კარიერას აფასებ ფიქრობ, რომ 47 წლის სპეციალისტს ძნელად თუ რამე გააკვირვებს, მაგრამ საქართველოს ნაკრებში შერკინების მწვრთნელად დანიშვნის შემდეგ, პირიქით მოხდა.

საქართველოს ძალიან დიდი რეპუტაცია აქვს და არაერთი დიდი, მამაცი მორკინალი აღუზრდია. მათი ძალისა და მომზადების შემხედვარე როუნთრიც კი აღფრთოვანებული დარჩა.

აქამდე არასდროს მინახავს, სპორტსმენს ასეთი წონა აეწიოს. მათ წარმოუდგენელი გენეტიკა აქვთ. ისინი წარმოუდგენლად ძლიერები არიან“ - ამბობს როუნთრი.
როგორც მოთამაშეს, როუნთრის ქართველების წინააღმდეგ არასდროს უთამაშია, თუმცა ყოველთვის იცოდა მათი სიძლიერის შესახებ. სწორედ ამ რეპუტაციამ გადააწყვეტინა, 2019 წლის მსოფლიოს თასის წინ საქართველოს ნაკრებში მუშაობას დათანხმებოდა.

„როდესაც ოქტომბერში პირველად შევხვდი დავით ქუბრიაშვილს, თავი უხერხულად ვიგრძენი. მისი დიდი ქომაგი ვიყავი და შეხვედრისას თავს პატარა ბავშვივით ვგრძნობდი. მასთან მუშაობა განსაკუთრებული იყო. შერკინება და მოლი არის ის, რაც ქართველთა შესრულებით მუდამ მომწონდა“ - თქვა როუნთრიმ.

„ბორჯღალოსნებთან“ მუშაობის პირველ თვეებში გრემმა ნახა, რომ გუნდის თიკუნი „ლელოები“ ტრადიციული ქართული თამაშიდან, ლელობურთიდან მომდინარეობს, რომელიც ძალიან ჰგავს რაგბის. ასევე ნახა სარეკორდო სხვაობით გამარჯვება სამოასთან და ტონგასთან, თუმცა მარცხი იტალიასთან.
როდესაც ის თბილისში არაა, ბევრს მოგზაურობს საფრანგეთში, კლუბებში, რომლებშიც ქართველი მორაგბეები თამაშობენ.

„საქართველო ძალიან მომწონს, ის ჩემთვის ზედგამოჭრილია. ჯერ მხოლოდ თბილისში ვიყავი, რომელიც შესანიშნავი ქალაქია, კარგადაა შეხამებული ახალი და ძველი, თანამედროვე და ძველი არქიტექტურა. ძალიან თბილი ხალხი ცხოვრობს, ბევრი მაგარი რესტორანი და წარმოუდგენლად მაგარი ღვინოა - დამიჯერეთ, ყველას გასინჯვა ვცადე. ის არ ჰგავს ყოფილი საბჭოთა კავშირის რომელიმე ქალაქს. თბილისი ძალიან ლამაზია. ადამიანები კი თბილი, ამაყი და შრომისმოყვარენი არიან“ - ასე ახასიათებს როუნთრი დედაქალაქს.

2019 წლის მსოფლიოს თასზე საქართველო იაპონიაში ჯგუფურ ეტაპზე ავსტრალიასთან, უელსთან, ფიჯისთან და ურუგვაისთან ითამაშებს. ჯგუფში, რომლის მსგავსში 2015 წლის მსოფლიოს თასზე იმ ინგლისის ნაკრებმა ითამაშა, რომლის ერთ-ერთი მწვრთნელი როუნთრი იყო. მაშინ ინგლისი ჯგუფში ჩარჩა.

- მსოფლიოს თასი უდიდეს წნეხთანაა დაკავშირებული. წინა მსოფლიოს თასზე ინგლისის ნაკრებთან ერთად ვიყავი. პირველი დონის გუნდები წარმოუდგენელ წნეხს განიცდიან, როდესაც საქართველოს მსგავს გუნდებს ეთამაშებიან. 2015 წლის მსოფლიოს თასმა ბევრი მასწავლა. ჩემი ცოდნის ყველა მარცვალს გადავცემ საქართველოს. მინდა, რომ ამ მსოფლიოს თასის შემდეგ ყველა ჩვენზე საუბრობდეს“.

საქართველოს მსოფლიოს თასზე ყოველთვის სოლიდური ფორვარდები მიჰყავდა. თუმცა, ნაკრების მთავარი მწვრთნელი მილტონ ჰეიგი აღიარებს, რომ დროთა განმავლობაში გუნდის სათამაშო სტილი ერთფეროვანი და ამოცნობადი ხდება. ის თავდაუზოგავად მუშაობდა, რათა ეს შეეცვალა:

ჩვენი თამაში მორკინალებზე იყო დაფუძნებული, მაგრამ იაპონიაში ასე არ იქნება. ერთ-ერთი მიზეზი ისაა, რომ ძალიან ბევრი ახალგაზრდა მოთამაშე გამოჩნდა და გუნდსაც მოსწონს გაშლილი თამაში.

ჰეიგს საქართველოს ნაკრებთან კონტრაქტი 2019 წლის მსოფლიოს თასის შემდეგ ეწურება. ესაა ქვეყანა, რომელსაც ის და მისი ოჯახი სახლს ეძახიან უკანასკნელი 7 წლის განმავლობაში. მისი ორი ქალიშვილი თავისუფლად საუბრობს ქართულად. პროფესიონალური თვალსაზრისით, მილტონისთვის შემდგომი ნაბიჯი მნიშვნელოვანი იქნება:

- რა იქნება საუკეთესო ჩემთვის და ჩემი ოჯახისთვის, სწორედ ესაა მამოძრავებელი. ჩემი მეუღლე და ქალიშვილები მუდამ ჩემს გვერდით არიან და ესაა უმთავრესი. საქართველოში მოსწონთ ჩემი ასეთი დამოკიდებულება. ჩვენ ამ ქვეყანაში უდიდესი გამოცდილება შევიძინეთ და მას არასდროს დავივიწყებთ.

ყოველდღიური სპორტული გაზეთი "ლელო"
5445
მკითხველის კომენტარები / 0 /
მსგავსი ამბები
რუბრიკის სხვა სიახლეები
;