EURO 2020. ყველაფერი დალაგდა, ველოდებით წილისყრას - მეოთხე კალათაში ვართ

კოსოვოს ნაკრებმა აზერბაიჯანს 4:0 სძლია და საქართველოს ნაკრების მეტოქეც გაირკვა - ერთა ლიგის ნახევარფინალში "ჯვაროსნები" ბელარუსს შეხვდებიან.

ერთა ლიგის D დივიზიონის ოთხივე ჯგუფში გამარჯვებულებს შორის საქართველოს ნაკრებმა 16 ქულა დააგროვა, ამ დივიზიონში საუკეთესო მაჩვენებელია. ამით ნახევარფინალის მასპინძლობა გავინაღდეთ. ამავე დროს, D დივიზიონში საუკეთესო რეიტინგიც გვაქვს.

რეგლამენტით, უკეთესი რეიტინგის გუნდი უნდა შეხვდეს უარესი რეიტინგის მქონეს. ეს უარესი კი (43-ე) აღმოაჩნდა ბელარუსს.

საბოლოოდ ვითარება ასეთია: საქართველო - 16 ქულა (ბურთების სხვაობა +10), მაკედონია - 15 (+9), კოსოვო - 14 (+13), ბელარუსი - 14 (+10).

ამას გარდა, საქართველო ევროპის 2020 წლის ჩემპიონატის წილისყრის წინ მოხვდა მე-4 კალათაში. ეს კალათები კი ასე დალაგდა:

1) ინგლისი, ჰოლანდია, პორტუგალია, შვეიცარია, ბელგია, ხორვატია, საფრანგეთი, იტალია, ესპანეთი, პოლონეთი
2) ავსტრია, ბოსნია, ჩეხეთი, დანია, ისლანდია, რუსეთი, შვედეთი, უკრაინა, უელსი, გერმანია
3) ფინეთი, ჩრ. ირლანდია, ნორვეგია, ირლანდია, სერბეთი, სლოვაკეთი, თურქეთი, შოტლანდია, ბულგარეთი, ისრაელი
4) უნგრეთი, რუმინეთი, ალბანეთი, კვიპროსი, ესტონეთი, საქართველო, საბერძნეთი, ლიეტუვა, ჩერნოგორია, სლოვენია
5) სომხეთი, აზერბაიჯანი, ბელარუსი, გიბრალტარი, ყაზახეთი, კოსოვო, ლუქსემბურგი, მაკედონია, მოლდოვა, ფარერები
6) ანდორა, ლატვია, ლიხტენშტაინი, სან მარინო, მალტა

წინასწარაა ცნობილი, რომ ევრო 2020 პირველი იქნება, სადაც საკვალიფიკაციო ეტაპს მასპინძელი ქვეყანაც გაივლის, რადგან ფინალურ ეტაპს 12 ქვეყანა უმასპინძლებს.

შესაბამისად, ფინალური ეტაპის მასპინძელი ქვეყნები (ინგლისი, შოტლანდია, ესპანეთი, გერმანია, დანია, იტალია, ჰოლანდია, ირლანდია, უნგრეთი, რუმინეთი, აზერბაიჯანი, რუსეთი) ერთ ჯგუფში ვერ მოხვდებიან.

ტერიტორიული შეზღუდვაც დაწესდა: მაგალითად, ისლანდია არ შეიძლება ერთდროულად საქართველოსთან, სომხეთთან, კვიპროსსა და ისრაელთან მოხვდეს...
პოლიტიკური დაპირისპირების გამო ერთ ჯგუფში ვერ მოხვდებიან უკრაინა-რუსეთი, აზერბაიჯანი-სომხეთი, გიბრალტარი-ესპანეთი, კოსოვო-ბოსნია, კოსოვო-სერბეთი.

კლიმატური შეზღუდვის გამო უეფა ამიერიდან არც იმას დაუშვებს, რომ ერთ ჯგუფში ორზე მეტი მკაცრი ზამთრით გამორჩეული ქვეყნის (ბელარუსი, ესტონეთი, ფარერები, ფინეთი, ისლანდია, ლატვია, ლიეტუვა, ნორვეგია, რუსეთი, უკრაინა) ნაკრები მოხვდეს.

ყოველდღიური სპორტული გაზეთი "ლელო"
701
მკითხველის კომენტარები / 0 /
მსგავსი ამბები
რუბრიკის სხვა სიახლეები