F**k Sarri-ball! ჩელსის ფანებმა სარის აგინეს. განაჩენი გამოტანილია, განშორება ახლოვდება...

"ჩელსიმ" მორიგი კოშმარი შესთავაზა გულშემატკივარს, დამარცხდა რა საკუთარ მოედანზე "მანჩესტერ იუნაიტედთან" ასოციაციის თასის მერვედფინალში. დამარცხდა სრულიად დამსახურებულად, ულაპარაკოდ.

"ჩელსის" მწვრთნელი მაურიციო სარი ისედაც გადაყენების პირას იყო და ახლა ხომ საერთოდ! საქმე ისაა, როდემდე მოითმენს რომან აბრამოვიჩი. მარტო მწვრთნელის მოხსნა არ ნიშნავს პრობლემის გადაწყვეტას, კიდევ უფრო მნიშვნელოვანია, ვის მოიყვან მის ნაცვლად - როცა ასეთი რამ ხდება, ახალი მწვრთნელი საყოველთაო ნდობით უნდა სარგებლობდეს როგორც ფეხბურთელებში, ისე გულშემატკივრებს შორის. როგორც ჩვენში იტყვიან, "დიმიტრი გელოვანი" უნდა იყოს...

"მანჩესტერთან" გუშინდელი წაგების შემდეგ უკანასკნელი ძაფიც გაწყდა - გულშემატკივრებმა აგინეს სარის და მის სამწვრთნელო ფილოსოფიას, რომელსაც "სარი-ბოლი" ჰქვია. ეს უკვე განაჩენია! რა თქმა უნდა, თავად იტალიელი წასვლას არ ისურვებს (შეიძლება, სურს კიდეც, მაგრამ დიდი ალბათობით ამას არ იზამს), ის იძულებულს გახდის აბრამოვიჩს, გაათავისუფლოს და გარკვეული კომპენსაციაც გადაუხადოს.

მოკლედ, ასეა საქმე. ყველაფერი უახლოეს საათებში უნდა გადაწყდეს. არადა, 24 თებერვალს "ჩელსის" კიდევ ერთი სათასო მატჩი აქვს - ოღონდ, ახლა ლიგის თასზე და თან უფრო მაღალი რანგის - ფინალი "მანჩესტერ სიტისთან", ვისთანაც ახლახან 0:6 წააგო პრემიერლიგაში. 

არ არის გამორიცხული, სარი ფინალამდე მოხსნან და სეზონის ბოლომდე გუნდის გაძღოლა ჯანფრანკო ძოლას მიანდონ. იცით, რომ ლეგენდარული იტალიელი, ვინც აქამდე სარის "მარჯვენა ხელი" იყო, "ჩელსიში" უცხო კაცი არ არის. ბოლოს და ბოლოს, "არისტოკრატებს" მისი გოლით აქვთ მოგებული თასების მფლობელთა თასი 1998 წელს...

არის ზინედინ ზიდანის ვარიანტიც. როგორც ამბობენ, აბრამოვიჩი განიხილავს მასიმო ალეგრის კანდიდატურასაც. მაგრამ ისინი მხოლოდ სეზონის ბოლოდან თუ შეუდგებიან მუშაობას, მეტადრე ალეგრი, რომელიც ახლა ფრიად საპასუხისმგებლო თანამდებობაზეა...

ყოველდღიური სპორტული გაზეთი "ლელო"
493
მკითხველის კომენტარები / 0 /
მსგავსი ამბები
რუბრიკის სხვა სიახლეები
;