ძიუდო. გულშემატკივართა ნაწილი ჭრიკიშვილის განცხადების საპასუხოდ წერილს აქვეყნებს

რედაქციაში შემოვიდა ძიუდოს გულშემატკივართა ერთი ჯგუფის წერილი, რომელიც ავთანდილ ჭრიკიშვილის წერილს ეხმაურება. გულშემატკივართა ეს ჯგუფი ჭრიკიშვილის აზრის საპირისპიროდ მიიჩნევს, რომ ბექა ღვინიაშვილს 90-კგ წონაში აქვს უპირატესობა და არ არის საჭირო დამატებითი შეხვედრის გამართვა.

"ქართული ძიუდოს გულშემატკივრებს გვსურს გამოვეხმაუროთ ავთანდილ ჭრიკიშვილის მიერ გუშინ გაკეთებულ განცხადებას.

მიგვაჩნია, რომ ეს განცხადება უფრო პოპულისტურ ხასიათს ატარებს და გამოიწვევს სიტუაციის ესკალაციას როგორც უშუალოდ საქართველოს ნაკრებში, ისე გულშემატკივრებს შორის.

თავის განცხადებაში ჭრიკიშვილი ძირითად აქცენტს აკეთებს ბექა ღვინიაშვილზე და ფიქრობს, რომ მსოფლიოს ჩემპიონატზე არა ღვინიაშვილი, არამედ თავად იმსახურებს 90 კგ წონით კატეგორიაში ასპარეზობას.

საგულისხმოა, რომ ჭრიკიშვილმა თავისი ტიტულები და ყველა სერიოზული წარმატება მოიპოვა 81 კგ–ში ასპარეზობისას, თანაც ძირითადად 2015 წლამდე, რისთვისაც რასაკვირველია გულშემატკივრები დიდად მადლობლები ვართ, მაგრამ წარსულში, თანაც სხვა წონაში ნაჩვენები შედეგები არ უნდა იყოს ახალ წონაში ადგილის დამკვიდრების საფუძველი.

მას შემდეგ რაც 90 კგ–ში გადავიდა ჭრიკიშვილმა მხოლოდ ზაგრების შეჯიბრება მოიგო, სადაც ამ წონის გამორჩეულ ძიუდოისტებს არც უჭიდავიათ. ავთანდილს ამ წონაში გადასვლის შემდეგ (დაახლოებით 2 წელია) მსოფლიო რეიტინგის თითქმის არცერთი ფავორიტი არ დაუმარცხებია.

მნიშვნელოვანია ისიც, რომ მსოფლიო რეიტინგში ღვინიაშვილი 90 კგ–ში მესამე პოზიციაზეა, ჭრიკიშვილი კი 51–ზე.

განსხვავებით მისგან ბექა ღვინიაშვილი 90 კგ–ში დიდი ხანია მსოფლიო დონის ფალავნად ითვლება და ტიტულებიც უამრავი აქვს მოპოვებული და ამ წონის ყველა გამორჩეული ძიუდოისტისთვის უმთავრეს კონკურენტად მიიჩნევა.

ღვინიაშვილმა ბოლო საქართველოს ჩემპიონატის ფინალში აშკარა უპირატესობით დაამარცხა ავთანდილ ჭრიკიშვილი. გარდა ამისა, ბოლო მსოფლიოს ჩემპიონატიდან მოყოლებული მოიგო უაღესად მნიშვნელოვანი შეჯიბრება – მასტერსი, რომელშიც მხოლოდ მონაწილეობის უფლებაც კი აქვს რეიტინგში 16 საუკეთესო ძიუდოისტს. ის იყო ფინალისტი აბუ დაბის და პარიზის გრანდ სლემებზე.

მსოფლიოს ჩემპიონატზე ნაკრებში ადგილი ეკუთვნის მხოლოდ მას ვინც მოცემულ ეტაპზე ამას დაიმსახურებს. ჩვენთვის, ქომაგებისთვის მნიშვნელოვანია, რომ ნაკრები მსოფლიოს ჩემპიონატზე უძლიერესი შემადგენლობით გამოვიდეს, რათა გავიხაროთ ქართული ძიუდოსთვის საკადრისი წარმატებებით.

ჩვენთვის აგრეთვე მნიშვნელოვანია, რომ ნაკრებში არ იყოს დაძაბული ატმოსფერო და პოპულისტური განცხადებები ზეგავლენას არ ახდენდეს მნიშვნელოვანი შეჯიბრების წინ გუნდის განწყობაზე."

3927
მკითხველის კომენტარები / 0 /
მსგავსი ამბები
რუბრიკის სხვა სიახლეები
;