კახა კალაძე GAZZETTA DELLO SPORT-ს მინდა ქართველი ხალხი...

"გაძეტა დელო სპორტმა" ინტერვიუ ჩამოართვა კახა კალაძეს - საქართველოს ნაკრების ყოფილ მცველს, "მილანის" ლეგენდას, ვინც "სან სიროზე" "მილანისა" და "ემპოლის" მატჩს დაესწრო.

- თქვენ პარასკევ საღამოს სტადიონის ტრიბუნაზე იყავით. სიამოვნება თუ მიიღეთ?

- სეზონში პირველად ვიხილე "მილანი" ცოცხლად. ისე კი, ტელევიზორის მეშვეობით ყველა თამაშს ვუყურებ. ძალიან კარგად ითამაშეს. გუნდის პროგრესი თამაშიდან თამაშამდე უფრო თვალსაჩინო ხდება.

- თქვენ რომელ გარემოებას გამოარჩევდით ყველაზე მეტად?

- გუნდმა იცის, რა და როგორ უნდა აკეთოს. დაცვაში ახლა უფრო ცივსისხლიანად თამაშობს, შეტევაში კი - მწვავედ.

- ეს ჯენარო გატუზოს დამსახურებაა?

- მან შექმნა ეს თამაში. მან შექმნა კავშირი სათამაშო რგოლებს შორის, რომელიც ახლა კარგი და მტკიცეა.

- ელოდით, რომ გატუზოს სამწვრთნელო კარიერა ასეთი წარმატებული იქნებოდა?

- სიმართლე გითხრათ, ნაკლებად, რადგან ჩვენ ბოლო დროს ისე ხშირად აღარ ვსაუბრობთ ერთმანეთთან, როგორც ადრე, ფეხბურთელობის დროს. გატუზომ აირჩია თავისი გზა და დღეს ის წარმატებით მუშაობს მსოფლიო ფეხბურთის გრანდში. მოხარული ვარ იმის გამო, რომ თუნდაც მესამე ადგილით რინოს შეუძლია, ჩემპიონთა ლიგაზე გაიყვანოს "მილანი". ამას გარდა, გუნდი წარმატებით თამაშობს იტალიის თასზეც.

- რას იტყვით თქვენი ძველი თანაგუნდელების, ლეონარდოსა და მალდინის თაობაზე, რომლებიც კლუბში ჩინოსნების რანგში დაბრუნდნენ?

- მათ მენეჯერის პოზიციიდან მეტი სტაბილურობა მოიტანეს გუნდში. პირველ რიგში, ისინი რინოს ეხმარებიან. მთავარია, ელიოტს სურს, რომ კლუბში დიდი ინვესტიცია ჩადოს. ახალი ფეხბურთელების დამატების შემთხვევაში, "მილანი" დაბრუნდება ტოპკლუბებს შორის.

- პიონტეკი ასეთთა კატეგორიას მიეკუთვნება?

- ის კარგია და ჩემი აზრით, კიდევ უფრო უკეთესი იქნება. იტალიის ჩემპიონატში ადაპტაცია რთულია. განსაკუთრებით მაშინ, თუ იქ უცხოეთიდან ჩადიხარ. ეს განსაკუთრებით ფორვარდებს ეხებათ. მას აქვს სწორი დამოკიდებულება საქმისადმი - სულ არის ჩასაფრებული და გააქვს გოლი. მე მითამაშია მსოფლიოს დიდი თავდამსხმელების წინააღმდეგ. ის ვერ გახდება რონალდო, მაგრამ დიდი ფორვარდი რომ იყოს, ეს კი შეუძლია.

- მალე დაბრუნდებით "სან სიროზე" გატუზოს საგულშემატკივროდ?

- ველაპარაკები ტელეფონზე, ვწერ მესიჯებს... ახლა, როგორც თბილისის მერი, ძალიან დაკავებული ვარ. თითქმის მილიონნახევარი ადამიანის წინაშე მაკისრია პასუხისმგებლობა და ვცდილობთ, გადავჭრათ პრობლემები. გვინდა, რომ ახალმა პროექტებმა ხალხი უფრო ბედნიერი გახადოს.

ყოველდღიური სპორტული გაზეთი "ლელო"
2321
მკითხველის კომენტარები / 0 /
მსგავსი ამბები
რუბრიკის სხვა სიახლეები
;