გიორგი ასანიძე: ეს ოქრო ხალხისაა... 2004, როგორ დაუსველეს ბერძნებმა შტანგის ღერძი [VIDEO]

ეს იყო 2004 წლის 21 აგვისტოს.

- დი-მას! დი-მას! დი-მას! - ზანზარებდა "ნიკეას" ექვსსათასიანი სპორტის სასახლე. ტრიბუნები საბერძნეთის დროშების ტყეს დაეფარა.

ელინთა კერპია პიროს დიმასი - მასპინძლები მისგან მეოთხე ოლიმპიურ "ოქროს" ელიან, გამაყრუებელი ყიჟინითა და შეძახილებით ამხნევებენ.
წარმოშობით ალბანელ სპორტსმენს თორმეტი წელიწადია, წარმატებები მოაქვს ელადისთვის. ოლიმპიური თამაშების სამგზის (ბარსელონა, ატლანტა, სიდნეი) გამარჯვებულს მსოფლიოს ჩემპიონატების შვიდი ოქროს მედალი აქვს მოპოვებული.

მათ შორის ორჯერ - ორჭიდში. ვერცხლიცა და ბრინჯაოც მრავლად ამშვენებს მის სასპორტო კოლექციას. უზომოდ უყვართ პიროსი ბერძნებს - კვარცხლბეკის უმაღლეს საფეხურზე მის ასასვლელად ყველაფერს გაიღებენ. ტრიბუნაზე მსხდომ ბერძნული დროშის ფერებში გამოწყობილ სამ პატარა დიმასს (პიროსის შვილებს) გულზე 4-იანი ახატია - მამიკო მეოთხედ გახდებაო ჩემპიონი.

   #გიორგი ასანიძე: არ დაიჯერებთ და... მინდა კოსმოსში გავფრინდე

თუმცა, ელინელებს შიშიც აქვთ - მრისხანე მეტოქეები ჰყავს პიროსს: რუმინელმა ვალერიუ გალანჩეამ შარშან ვანკუვერში (კანადა) მსოფლიოს ჩემპიონობა მოიპოვა მრავალჭიდსა და აკვრაში. ამავე შეჯიბრების ვერცხლის პრიზიორია ჩინელი აიჯუნ იუანი. 2001 წლის მსოფლიოს ჩემპიონატზე ვერცხლის, ხოლო შარშან ბრინჯაოს მედლები დაიმსახურა ბელარუსმა ალექსანდრ ონიშჩენკომ. არც რუსეთელი ზაურ ტაკუშევი და კორეელი იონგ ჩიკ სონგია სათვალავიდან ამოსაგდები.

ბერძნულის მცოდნე ქართველებმა მითარგმნეს, თუ რას ჩურჩულებენ ჩემს ზურგს უკან მსხდომი მასპინძლები. "ნიკეას" დარბაზს "გეორგიელი" გიორგის ეშინია ყველაზე მეტად.

გიორგი ასანიძე ჩვენი ჯილაა. სიდნეიში პიროს დიმასმა მას და გერმანელ მარკ ჰუსტერს მხოლოდ პირადი წონით (სამივემ ორჭიდში 385-385 კგ დაძლია) აჯობა. 2002 წელს ვარშავის მსოფლიოს ჩემპიონატზე ქართველმა ძალოსანმა ერთ-ერთი მოძრაობისას მხარი დაიზიანა. მწვრთნელისა და ექიმების წინააღმდეგობის მიუხედავად, უდრეკი ჭაბუკი მაინც გავიდა ფიცარნაგზე და თითქმის ცალი ხელით მოიხვეჭა ვერცხლის მედალი.

მძიმე ოპერაცია გადაიტანა გიამ. სხვა, ალბათ, საბოლოოდ დაემშვიდობებოდა აქტიურ სპორტს. ის კი არ გატყდა - ასე იოლად არ დანებდა ბედისწერას. პირად მწვრთნელ ივანე გრიქუროვთან ერთად ჯიქურ მიიწევდა კვარცხლბეკისკენ. ოთხი თვის წინათ ევროპის ჩემპიონატზე პირველ ათეულშიც რომ ვერ მოხვდა, ბევრმა ხელი ჩაიქნია - ასანიძის ეპოქა დამთავრდაო. მწვრთნელსა და შეგირდს, მათს ახლობლებსა და ნაღდ ქომაგებს სჯეროდათ მხოლოდ, გიორგი კიდევ გაიბრწყინებდა და სამშობლოს ასახელებდა...

და კვლავ "ნიკეას" დარბაზი.

მაყურებელთა გუგუნში ნელ-ნელა იმსხვრევა იმედები, კერპები ბრძოლის ველს ტოვებენ უსახელოდ.

ღიმილი არ შორდება გიორგი ასანიძეს სახიდან. თანდათან უმატებს "სიჩქარეს". პირველ ცდაზე 172,5 კგ, მერე 177,5 კილოგრამი დაიმორჩილა. მესამე ჯერზე 180 კილოგრამი უნდა აიტაცოს, მაგრამ... შტანგა ხელიდან უსხლტება. გაკვირვებულია ათლეტი, თავის ქნევით ჩავიდა სარბიელიდან.
ვანო გრიქუროვი: ბერძნებმა გვიმუხთლეს - ფიცარნაგიდან ჩამოსულ გიას ხელისგულები სველი ჰქონდა: სიმძიმის გამოცვლისას მასპინძლებს შტანგის ღერძი (გრიფი) დაუსველებიათ...

ეშმაკობამაც ვერ უშველა ელინელთა კერპს - მან 175-კილოგრამიანი შტანგა აიტაცა და 202,5 კილოგრამი აკრა. 205 კილო მკერდამდე აქაჩა, მაგრამ მერე ძალა არ ეყო. ორჭიდის ჯამში 377,5 კილოგრამით მხოლოდ ბრინჯაოს მედალი დაიმსახურა. ბოლო ცდის შემდეგ დიმასმა ფეხსაცმელი გაიხადა და ფიცარნაგის კუთხეში დააწყო - ამით გულშემატკივრებს აუწყა, სპორტული კარიერა დავამთავრეო კვლავ იქუხა დარბაზმა, დაინგრა ტრიბუნები. დიდხანს არ შეწყვეტილა ოვაცია.

სარბიელს ორნი შემორჩნენ: გიორგი ასანიძემ 205 კგ აკრა და 382,5 კილოგრამით დაწინაურდა. მხოლოდ ჩინელ იუანს შეეძლო დაწევა. ისიც ვა-ბანკზე წავიდა - მეორე ცდისა 215 კილოგრამი შეუკვეთა (როგორც შემდეგ შევიტყვეთ, იგი ასანიძეზე ოდნავ მსუბუქი ყოფილა). ვერც მესამე ცდაზე დაძლია ჩინელმა ეს წონა და 372,5 კილოგრამით მე-5 ადგილზე გავიდა.

ვერცხლის მედალი 22 წლის ბელარუს დებიუტანტ ანდრეი რიბაკოვს ხვდა.

ჩემპიონობა გიორგი ასანიძემ მოიპოვა.

ეს იყო 21 აგვისტოს.

ჩემპიონური პასუხი:

- საქართველოში "ოქროს ხანა" დაიწყო და თავს ბედნიერად მივიჩნევ, რომ ამაში ჩემი წვლილი შევიტანე, - თქვა პაექრობის დამთავრების შემდეგ პრესკონფერენციაზე გიორგი ასანიძემ. - ათლეტების მოსამზადებლად შესაძლებლობის მაქსიმუმი გაიღეს სპორტის სახელმწიფო დეპარტამენტმა, ეროვნულმა ოლიმპიურმა კომიტეტმა და ოლიმპიურმა ფონდმა. დიდი მადლობა მათ. ჩვენი გამარჯვებები ქართველ ხალხს ეკუთვნის, რომლის მორალური თანადგომა არასდროს მოგვკლებია.

- როდის იგრძენით, რომ ჩემპიონობა თქვენი იყო? - ჰკითხა გიორგის რუსმა კორესპონდენტმა.

- როცა კვარცხლბეკზე ოქროს მედალი ჩამომკიდეს.

- ბრინჯაოს პრიზიორ დიმასზე რას იტყვით? - ეს შეკითხვა მასპინძლებმა დაუსვეს ჩემპიონს.

წამიერი პაუზა. დარბაზი გაირინდა.

- პიროს დიმასი ბრინჯაოს პრიზიორი არ არის... იგი სამგზის ოლიმპიური ჩემპიონია და ასეთად დარჩება მარად.
იქუხა ტაშმა - მის პასუხს ოვაციით შეხვდნენ. კმაყოფილმა დიმასმა იქვე გადაკოცნა მეტოქე.

პრესკონფერენციაზე ჩემპიონს დოპინგზეც დაუსვეს შეკითხვა.

- მივესალმები იმ დაუნდობელ ბრძოლას, ბოლო დროს დოპინგის წინააღმდეგ რომ დაიწყეს. იგი სასიკეთოდ წაადგება როგორც სპორტის სახეობებს, ასევე მომავალი თაობის ზნეობრივად აღზრდას. მერწმუნეთ, აქაც უპირატესობა კავკასიელებს გვექნება...

პიროს დიმასი: "ოლიმპიადისთვის მოსამზადებლად ყველაფერ გავაკეთე. რაც შეეხება დღევანდელ შეჯიბრებას, მოიგო იმან, ვისაც უნდა მოეგო. გიორგი ასანიძემ ეს პირველობა დაიმსახურა, იგი ღირსეული ჩემპიონია... არიან ადამიანები, რომლებთანაც სპორტის მიღმა გსურს მეგობრობა. მე ვამბობ, რომ გიორგი ასანიძე ჩემი მეგობარია!..."

პრესკონფერნციის შემდეგ ჩემპიონის მწვრთნელს გავესაუბრე.

- დაძაბული ბრძოლა იყო, - მითხრა ვანო გრიქუროვმა. - ერთბაშად რვა სპორტსმენს ჰქონდა კვარცხლბეკის უმაღლეს საფეხურზე ასვლის შანსი, ამიტომ ვფრთხილობდით. ვცდილობდით, ზედმეტად არ გაგვერისკა, ჩვენმა ტაქტიკამ გაამართლა და ბედნიერი ვარ. ასეთი დიდი სიხარული პირველად ბარსელონაში განვიცადე 1992 წელს, როცა ჩემი შეგირდი კახი კახიაშვილი გახდა ჩემპიონი. ახლა გიამ გამახარა. ნამდვილად ბედნიერი ვარ!


P.S. ოლიპიური ჩემპიონი დღეს თავად არის ძალოსანთა ეროვნული ნაკრების მთავარი მწვრთნელი და შეგირდებს მწვერვალებისკენ უკაფავს გზას!

3531
მკითხველის კომენტარები / 0 /
მსგავსი ამბები
რუბრიკის სხვა სიახლეები