irishtimes: საქართველო იტალიაზე უკეთესია

საქართველოსა და ინგლისის ნაკრებების ერთობლივმა ვარჯიშმა უცხოური პრესა კიდევ ერთხელ აალაპარაკა ქართულ რაგბიზე. გუშინ irishtimes.com-ზე ბრაიან ოკონორმა ამ თემას პუბლიკაცია მიუძღვნა - "გადამწყვეტი მომენტი: საქართველო ექვსი ერის რადარებზე უნდა იყოს".

"გასულ შაბათს, რამდენიმე საათით ადრე, ვიდრე ირლანდიამ ევროპის მეშვიდე გუნდს 37 ქულის სხვაობით მოუგო, მეექვსე გუნდმა, საქართველომ, ბელგიის ნაკრები 47:0 დაამარცხა. გასაოცარია, მაგრამ ნათლად ჩანს, რომ ექვსი ერის ექვსეულში არ არის ევროპის ექვსი საუკეთესო გუნდი.

ვინმემ შეიძლება იფიქროს, მართლა მდებარეობს თუ არა საქართველო ევროპაში. რამდენს შეუძლია მისი მდებარეობა ზუსტად აჩვენოს რუკაზე? მიუხედავად ყველაფრისა, უდავოა, რომ მსოფლიოს რეიტინგის მიხედვით, ეს პატარა ქვეყანა 3,7 მილიონი მოსახლეობით, რომელიც კავკასიის სამხრეთ ფერდობზეა შეფენილი, უკეთესია, ვიდრე იტალია.

საქართველოს ნაკრები მრავალი წლის განმავლობაში დომინირებდა "რაგბი ევროპის ჩემპიონატის" გათამაშებაში. 2018 წელს ამ ტურნირის მოგება ქართველებისთვის ჩვეულებრივი ამბავი იქნება. მხოლოდ 2007 წლის მსოფლიოს თასზე ირლანდიასთან მატჩი ადასტურებს, რაოდენ კონკურენტუნარიანი იქნება საქართველო პირველი დონის ქვეყნებისთვის.

ბოლო მსოფლიოს თასზე ორი მოგებით ქართველებმა იაპონიაში გასამართავ მსოფლიოს თასზე მონაწილეობის უფლება დაიბევეს. გასული წლის ნოემბრის ტესტებზე კარდიფში უელსს დიდი თავსატეხი გაუჩინეს და მხოლოდ 6:13 დამარცხდნენ. საქართველოს ნაკრების მორაგბეთა უმრავლეოსობა საფრანგეთში პროფესიულ დონეზე თამაშობს. ეს ცოტა არაა.

ამასთან ერთად, ქართველებს უყვართ რაგბი. ეს თამაში მათ ცნობიერებაში ისეა გამჯდარი, როგორც ეს შეიძლება ჩრდილოეთ ნახევარსფეროში მხოლოდ უელსში იყოს. მათ აქვთ უძველესი ეროვნული თამაში "ლელო", რომელიც ძალიან წააგავს რაგბის.

საბჭოთა ეპოქაში, სტალინის დიქტატურის პირობებშიც კი, რაგბის ეს ფორპოსტი გადარჩა. დამოუკიდებლობის მოპოვების შემდეგ კი რაგბი საქართველოში განვითარდა და მრავალი წლის განმავლობაში მისი მზერა დასავლეთისკენ იყო მიპყრობილი. სამიზნე, ცხადია, ექვსი ერია.

ექვსი ერის ბოსებმა ერთმნიშვნელოვნად განაცხადეს, რომ მათი მოვალეობა არ არის რაგბის განვითარებაზე ზრუნვა. საქართველოს მეშვიდე ერად დამატება აუცილებელი არ არის. საამისოდ არც დროა და არც სურვილი. თუმცა, გავარდნა-აღზევების იდეას აქვს არსებობის საკმაოდ მყარი საფუძველი. ის აუცილებლად უნდა იქნას განხილული.

ეს უწინარესად იტალიის ნაკრების სტაგნაციას შეწყვეტს. ეს გუნდი, დიდი ალბათობით, ისევ ბოლო ადგილს დაიკავებს. მათ ბოლო სამ შეხვედრას ექვსი ერის წლევანდელ გათამაშებაში აზრი არ აქვს. იტალიისთვის სეზონი დასრულებულია. დარჩენილი შეხვედრები კი მათემატიკური ვარჯიშია ანგარიშში სხვაობის გამოთვლაზე. გუნდს არანაირი პერსპექტივა არ აქვს.

აი, სწორედ ეს არის მთავარი არგუმენტი. თუ გავარდნა-აღზევება იქნება, სავარაუდოდ, ორმატჩიანი პლეი ოფის გამოყენებით, იტალია მშვიდად ვეღარ იგრძნობს თავს და იძულებული იქნება განვითარებაზე, წინსვლაზე უფრო სერიოზულად იზრუნოს.

მთავარი აქ სპორტული პრინციპი იქნება. ექვს ერში სწორედ რომ ევროპის ექვსი საუკეთესო გუნდი ითამაშებს და აღარავინ იქნება ჩაგრულის მანტიით შემოსილი".

1865
მკითხველის კომენტარები / 0 /
მსგავსი ამბები
რუბრიკის სხვა სიახლეები