JUDOINMIDE.COM-მა პაპინაშვილის იპონი TOP-5-ში!

აბუ დაბის "დიდი მუზარადის" დასრულების შემდეგ ძიუდოს პოპულარულმა უცხოურმა საიტმა JUDOINMIDE.COM-მა ტურნირის ხუთი საუკეთესო იპონი დაასახელა, რომელშიც იმ შეჯიბრების გამარჯვებულ ამირან პაპინაშვილის (60) ერთ-ერთი გდებაც მოხვდა, კერძოდ, მეოთხედფინალში ბელგიელ ჟორე ვერსტრაეტენთან შესრულებული ულამაზესი გდება.

პაპინაშვილმა იმ ტურნირზე სხვა ორთაბრძოლებშიც გვაჩვენა მართლაც ფილიგრანული ტექნიკის დემონსტრირება. თუნდაც ფინალში ესპანელ ფრანსისკო გარიგოსთან შესრულებული კისრული გავიხსენოთ, მაგრამ ზემოხსენებულმა საიტმა ბელგიელის "მკვლელი" იპონი დაასახელა, რომელსაც ტოპ-ხუთეულში მეხუთე ადგილი მიანიჭა.

SUPER ილეთი! აი, როგორ მოიგო ამირან პაპინაშვილმა [VIDEO]

ახალგაზრდა ბელგიელმა ერთ მომენტში "წისქვილზე" დაუპირა ჩვენებურს "ჩამოფქვა", მაგრამ პაპინაშვილი დაუსხლტა, მეტოქეები მყისვე წამოხტნენ და შეხვედრაც დგომში გაგრძელდა, მაგრამ ვინ აცალა გაგრძელება: ჩვენებურმა მოხერხებულად მოიგდო მეტოქე და დათვი რომ მსხვერპლს ამოიჩრის, სწორედ იმგვარად ამოიჩარა იღლიაში და ზურგზე მოგდებული მოწყვეტით დააბერტყა ტატამს.

ჩვენ თუ გვკითხავთ, ეს გდება ხუთეულში უფრო მაღალ პოზიციას იმსახურებდა, მაგრამ საიტის ადმინისტრატორმა სხვაგვარად განსაჯა. მეოთხეზე ავსტრალიელი ქალბატონის კატარინა ჰაჩკერის (63) მოგვერდი გავიდა, მესამე ადგილისთვის პაექრობაში ტიტულოვან პოლონელ აგატა ბლაჩ-ოზდოვასთან რომ შეასრულა.

მესამე ადგილი სერბთა ევროპის ჩემპიონ ალექსანდრ კუკოლის (90) შუაკაურს ერგო, რამაც ბრინჯაოს მედალი მოუტანა უკრაინელთა წარმოშობით გვინეა-ბისაუელ დიდგვაროვან (მამამისი რომელიღაც ადგილობრივი ტომის ბელადთა ოჯახიდანაა და მოსკოვში სწავლისას გადაჰყრია უკრაინელ ქალბატონს) ქუანჯაუ ნჰაბალათან შეხვედრაში, ვინც ფეხის ამ მარტივი გამოსმით ტომარასავით დააგდო ტატამზე.

მეორე ადგილზე იტალიელი ოდეტა გიფრიდას (52) ჩახტომითი კისრულია, რამაც პირველ შეხვედრაში გაამარჯვებინა მაროკოელ ლამია ედინარისთან, გამარჯვებული კი რუსი ინალ თასოევის (+100) ბრუნია, რომელმაც ფინალური პაექრობა მოაგებინა ჩეხთა ოლიმპიურ, მსოფლიოსა და ევროპის ჩემპიონ ლუკაშ კრპალეკთან. რუსთა ოსი წელში შეეკრა ტიტულოვან მეტოქეს და მოწყვეტით დააბრუნა საიპონედ.

ყოველდღიური სპორტული გაზეთი "ლელო"
1562
მკითხველის კომენტარები / 0 /
მსგავსი ამბები
რუბრიკის სხვა სიახლეები
;