[LoveStory] სერხიო და მისი ქალები... რომელი სურვილი შეუსრულა ცოლმა რეალის კაპიტანს?

ერთი ცნობილი ქართული მულტფილმის პერსონაჟის არ იყოს, როგორც კი ჭაბუკმა საყვარელი გოგო გვერდით დაიგულა, მყისვე დაიწყო და იმდენი შვილი გააჩინა... ესეც ბიჭი, ესეც გოგო, კიდევ ბიჭი, კიდევ გოგოო – იძახდა.

თუმცა შეყვარებულმა სერხიო რამოსმა მისგან განსხვავებით ოთხივე შვილის შემთხვევაში – ესეც ბიჭი, ესეც ბიჭიო იძახა და ბოლოს (ჯერჯერობით ბოლოს) ეს შეძახილი წლეულს ივლისში გაისმა, როდესაც მეოთხე ვაჟი მასიმო ადრიანო შეეძინათ მას და მის მეუღლეს პილარ რუბიოს.

სერხიო და მისი გულისსწორი შვილების გაჩენას ჩქარობდნენ, თორემ დაქორწინება იქამდე კი არ გახსენებიათ, ვიდრე სამი ვაჟი (სერჯიო, მარკო და ალეხანდრო) არ მოავლინეს ქვეყანას.

წყვილმა სასიყვარულო ურთიერთობის შესახებ საჯაროდ 2013 წელს განაცხადა, საქმე კი ქორწილით 2019 წელს 15 ივნისს დააგვირგვინა.

საგულისხმოა, რომ სერხიომ ჯვრისწერისთვის სევილია შეარჩია – მისი მშობლიური ქალაქი, სადაც 34 წლის წინათ დაიბადა. მიუხედავად იმისა, რომ რამოსისთვის დიდი ხანია  სახლი უფრო მადრიდია, ვიდრე სევილია, ძველი და მშობლიური სიყვარული განსაკუთრებული მომენტებისთვის მუდამ ახსოვს.

სერხიომ და პილარიმ ერთმანეთი 2012 წელს, მაშინ გაიცნეს, როდესაც ფეხბურთელი თავისი ქვეყნის ნაკრებთან ერთად მოპოვებულ ევროპის ჩემპიონობას ზეიმობდა. მოკლე ხანში მათ მედიის საშუალებით სიყვარულის ამბავიც ამცნეს საზოგადოებას. პრესამ კი მალევე ამ წყვილს ესპანეთის პოში და ბექზი შეარქვა, ვიქტორია და დევიდ ბექჰემის მიბაძვით.

მადრიდის ,,რეალში“ სერხიო რამოსმა მოგეხსენებათ, რომ ტიტულების მთელი წყება დააგროვა. საკლუბო თუ სანაკრებო წარმატებები მისი კარიერის ნათელი წერტილებია.

რამოსის მეუღლე, პილარ რუბიო, ტელეწამყვანი, მსახიობი და მოდელი გახლავთ. საამაყო კი პილარსაც აქვს – მაგალითად იგი 2010 წელს მიღებული „ოქროს მიკროფონით“ იწონებს თავს. ეს ჯილდო პილარმა საუკეთესო ტელეწამყვანის ამპლუაში მიიღო. ბუნებრივია, რომ მისი „ოქროს მიკროფონი“, იმავე წელს სერხიო რამოსის მიერ ესპანეთის ნაკრების შემადგენლობაში მოპოვებული მსოფლიოს ჩემპიონის ტიტულს ვერ გაუტოლდება, მაგრამ რას ვიზამთ – ყველას თავისი აქვს სახსოვარი.

აღსანიშნავია, რომ რამოსს, პილარის გაცნობამდეც არაერთი ცხელი და ხმაურიანი რომანი ჰქონდა, მეტწილად ესპანელ ლამაზმანებთან. თუმცა პილარიმდე ის მუდამ აღნიშნავდა, რომ ყველა იმ ქალში, ვისთანაც ურთიერთობა ჰქონია, აკავშირებდა მხოლოდ ლტოვლა სილამაზის გამო. ამ სილამაზეს კი არასოდეს ახლდა ჭეშმარიტი სიყვარულის გრძნობა, რაც ცნობილ ფეხბურთელს ოჯახის შექმნის სურვილს გაუჩენდა.

როგორც კი 19 წლის სევილიელი მობურთალი მადრიდში, ,,სამეფო კლუბში“ აღმოჩნდა და მიხვდა რომ უკეთესს ვერც ინატრებდა, გუნდში ფლანგზე თამაშის მოყვარულმა, ქალების ფლანგსაც ენერგიულად ჩამოურა.

,,რეალში“ გადასვლისთანავე ცნობილი გახდა ,,მის ესპანეთთან“ ელიზაბეტ რეისთან მისი რომანის შესახებ. მომდევნო ,,რეისი“ სერხიოს, მომდევნო წელს, ფეხბურთელს ულამაზეს ტელეწამყვან ნანი გაიტანთან ჰქონდა.

გაიტანი რომ ავანსცენიდან გაიტანა, შეეცადა ფართოდ გაეღო კარი ნერეიდა გალიარდოსთვის, რომლის ეფექტურმა ფიგურამ მაშინვე მიიქცია ფეხბურთელის ყურადღება. არ აღმოჩნდა გალიარდოსთან ურთიერთობა გრძელვადიანი და ისინი დაშორდნენ. ოღონდ, სერხიოსგან წასული ნერეიდა ზოგადად ფეხბურთისგან არ წასულა შორს და არცთუ დიდი ხნის პაუზის შემდეგ თვით კრიშტიანო რონალდუს მკლავებში აღმოჩნდა. ანუ რამოსს ამ შემთხვევაში მთლად საგოლე პასი არ მიუცია პორტუგალიელი ვარსკვლავისთვის, მაგრამ იმ კომბინაციაში კი მიიღო მონაწილეობა, რომელშიც კრიშტიანუ დამაგვირგვინებელ ფაზაში ფიგურირებდა.

აქ სერხიოს ცხოვრებაში დადგა ეტაპი, როდესაც თავისზე უფროს ქალბატონს დაადგა თვალი. ბლანკა რომერო მისი მომდევნო სიყვარული, რამოსზე 10 წლით უფროსი გახლდათ. სერხიოსთან ურთიერთობის აწყობის დროს, რომეროს ჰყავდა უკვე თინეიჯერი შვილები და ზურგს უკან ორი უიღბლო ქორწინება. ამბობენ, რომ რამოსს ბლანკაში იზიდავდა ის ეგზოტიკური გარეგნობა, რომელსაც მისი პერუულ – ბოშური ფესვები განაპირობებდა. მაგრამ ერთ წელიწადში რამოსს აღარც პერუ ახსოვდა და არც ამ ქვეყნის ყველაზე დიდი ღირსშესანიშნაობა მაჩუ–პიქჩუ. ეს რომანიც დამთავრდა.

ყველაზე დიდ ხანს, ამჟამინდელ გულისსწორთან ურთიერთობის დაწყებამდე სერხიო რამოსი  ლარა ალვარესთან ცხოვრობდა. მართალია ეს ,,ყველაზე დიდი ხანი“ სულ რაღაც 2 წელიწადს მოიცავს, მაგრამ მაინც ღირს აღნიშვნად.

ლარა ალვარესი ჟურნალისტი და ტელეწამყვანი გახლდათ. ის იყო ესპანური ტელესივრცის კარგად ცნობილი სახე. ერთ–ერთ საქველმოქმედო საღამოზე, სადაც სერხიოც იღებდა მონაწილეობას, ლარა მივიდა ფეხბურთელთან და სთხოვა ესახსოვრა მაისური, ზედ გაკეთებული რამოსისეული ავტოგრაფით. ფეხბურთელმა არც მაისური დაინანა და არც ავტოგრაფი, თუმცა გოგონასთვის საჩუქარი ისე არ მიუცია, სამაგიერო რომ არ მოეთხოვა.

რამოსისა და ალვარესის სიყვარული კი გაგრძელდა ფეხბურთელის სხვა ურთიერთობებთან შედარებით დიდ ხანს, მაგრამ უთანხმოებები ხშირი ყოფილა, რადგან რამოსს უნდოდა ლარა შეშვებოდა ტელეეთერში ჯდომას და ამის ნაცვლად შინ დამჯდარიყო. ორ წელიწადს გაუძლო ლარამ შეყვარებულის ზეწოლას და დაღლილი წავიდა.

და აი, ახლა რამოსს გვერდით ჰყავს პილარ რუბიო, რომელიც სახლშიც დასვა, ბაშვებიც დაახვია და ლამის ყოველ წელიწადს იძახის – ესეც ბიჭი, ესეც ბიჭი...

9046
მკითხველის კომენტარები / 0 /
მსგავსი ამბები
რუბრიკის სხვა სიახლეები
;