მადონა ფეხბურთელი შვილისთვის საცხოვრებელ ადგილს იცვლის

გასულ წელს მადონამ - პოპდედოფალმა და კომერციულად ყველაზე წარმატებულმა მომღერალმა ქალმა (Forbes-ის შეფასებით, მისი ქონება - 590 მილიონი დოლარია) დატოვა ნიუ იორკში მდიდრული სახლი, სადაც ათი წელი იცხოვრა და პორტუგალიაში გაეგზავრა. „ამერიკიდან ფეხბურთის გამო წავედი. ჩემმა ვაჟმა დევიდმა, რომელიც 24 სექტემბერს 13 წლის გახდება, ფეხბურთელობა გადაწყვიტა. პროფესიულ დონეზე“, - ახსნა მომღერალმა იტალიური Vogue-ის აგვისტოს ნომრისთვის მიცემულ ინტერვიუში.

დევიდი ნაშვილებია. მადონამ ბიჭი 13 თვის ასაკში იშვილა 2006 წელს, ჯერ კიდევ მაშინ, როცა გაი რიჩისთან ქორწინებაში (2000-08 წლები) იყო. დევიდი მალავიში - აფრიკის უღარიბეს სახელმწიფოში დაიბადა, სადაც პოპვარსკვლავი საქველმოქმედო მისიით იყო ჩასული. ბავშვის დედა მშობიარობას გადაყვა, მამამ - ფერმერმა იოჰან ბანდამ ვაჟზე უარი თქვა, რადგან ძლივს გაჰქონდა თავი.

სულ მადონას ექვსი შვილი ჰყავს: აქედან ორი საკუთარი გაი რიჩისგან - 21 წლის ქალიშვილი ლურდესი და 17 წლის ვაჟი როკო. და კიდევ ოთხი ნაშვილები: 12 წლის დევიდ ბანდა და ქალიშვილი მერსი ჯეიმსი, და კიდევ ტყუპი - სტელა და ესტერი. ისინი 5 წლისანი არიან, ასევე მალავიდან.
უფროსი ქალიშვილი, ბოლო დროს, დამოუკიდებლად ცხოვრობდა, როკო კი გარკვეული დრო მამასთან იყო ბრიტანეთში.

მადონა აყვანილ ბავშვებთან ერთად ამერიკის შეერთებულ შტატებში ცხოვრობდა. იქ დევიდი და მერსი სკოლაში წავიდნენ, სადაც ბიჭში ფეხბურთელის ნიჭმა გაიღვიძა. ის თამაშობდა ნიუ იორკის „დაუნთაუნ იუნაიტედის“ 14-წლამდელთა გუნდში და მნიშვნელოვან გოლებსაც იტანდა. 2016 წელს, მან ძალები მოსინჯა ფლორიდაში „პარი სენ-ჟერმენის“ აკადემიის ფილიალში. მადონა ესწრებოდა ერთ-ერთ მატჩს და იხილა ვაჟის დუბლი და მისი გუნდის მოგება - 2:1.

აშშ-ში მადონას ვარჯიშების ხარისხი არ აწყობდა. „მონდომებით ვცდილობდი მიმეყვანა ის საუკეთესო მწვრთნელებთან საუკეთესო აკადემიაში, მაგრამ ფეხბურთის დონე ამერიკაში გაცილებით დაბალია, ვიდრე დანარჩენ სამყაროში, - ხსნის მადონა. - ვხედავდი, როგორი იმედგაცრუებული იყო. მაშინ ვიგრძენი, რომ რაღაცის შეცვლის დრო მოვიდა და ამერიკიდან წასვლა მოვინდომე. როგორც იცით, აშშ-ში ახლა არც ისე კარგი დროებაა. საერთოდ, არსი იმაში არ არის, რომ შტატებიდან წასვლა რაღაცას შეცვლის. უკვე მიცხოვრია სხვა ადგილებში, მაგალითად, 10 წელი ლონდონში. მომწონს კომფორტის ზონიდან გამოსვლა და რისკზე წასვლა“.

მადონას შორტ-ლისტში შევიდა ლისაბონის, ბარსელონისა და ტურინის აკადემიები, არჩევისას კი ბევრ ფაქტორს ითვალისწინებდა. „მოვიარე ყველა ეს ქალაქი და შევეცადე წარმომედგინა - როგორ ვიცხოვრებდი იქ. რა თქმა უნდა, ბარსელონა - სუპერმხიარული ქალაქია, ტურინი მომწონს, რადგან იქ მუზეუმები და ლამაზი არქიტექტურაა. მაგრამ არ მგონია, რომ ბავშვებს იქ მოსწონებოდათ და მხიარულად ეგრძნოთ თავი. ტურინი, უფრო მეტად, ინტელექტუალების ქალაქია, მე კი ყველა ფაქტორი უნდა გამეთვალისწინებინა. წავედი ლისაბონში და ეს ქალაქი საუკეთესო ვარიანტად მომეჩვენა ყველას შორის“.

ცნობილია, რომ ლისაბონში მადონა დასახლდა სასტუმრო Ritz-ის საპრეზიდენტო ნომერში, რომლის ღირებულება დღე-ღამეში 14 500 ევროა და ისადილა პორტუგალიის ნაკრების ყოფილ ფეხბურთელთან ნუნუ გომეშთან, რომელიც ხელმძღვანელობს „ბენფიკას“ აკადემიას.

გაზაფხულზე დევიდმა სამედიცინო შემოწმება გაიარა და მოხიბლა თავისი თამაშით 12-წლამდელთა გუნდის მწვრთნელი. ბიჭი აიყვანეს და მადონამ იპოვა სახლი - ოჯახი დასახლდა ლაპას არისტოკრატულ რაიონში მდებარე მე-19 საუკუნის ტაძარში - 7.5 მილიონი ევროს ღირებულებით.
მადონას „ინსტაგრამით“ თუ ვიმსჯელებთ, ის და ბავშვები მოწყენილები არ არიან - მუსიკით ერთობიან, ცეკვავენ და მხიარულობენ. მაგალითად, დევიდი კარგად მღერის, იცის გიტარაზე და პიანინოზე დაკვრა.

59 წლის პოპდედოფლისთვის პორტუგალია აღმაფრენის წყარო გახდა. „აქ მე გავიცანი ბევრი შესანიშნავი მუსიკოსი და უმეტეს მათგანთან ერთად ვმუშაობდი ჩემს ახალ ალბომზე. ამიტომაც, ლისაბონმა გავლენა იქონია ჩემს ხელოვნებაზე“.

მომღერალი კონცერტებს აღარ მართავს, მაგრამ, ხანდახან, წვეულებებს ესწრება, მათ შორის, ამერიკაში და ქველმოქმედებით არის დაკავებული.
„ნებისმიერ ქალს, რომელსაც შვილი ფეხბურთელი ჰყავს, შეუძლია თქვას, რომ აღარ რჩება პირადი ცხოვრებისთვის დრო, რადგან კვირიდან კვირამდე ყველაფერი იცვლება. ხანდახან არის მატჩები, ხანდახან - არა. ხუთშაბათამდე საერთოდ არ ვიცით, იქნება თუ არა შაბათს ან კვირას მატჩი. უბრალოდ შეუძლებელია გეგმების დაწყობა“.

საოჯახო ჰობია - ცხენებით სეირნობა. ჩვეულებრივ, მადონა ალკასერ-დუ-სალის მუნიციპალიტეტში სეირნობს, იქ ძალიან ლამაზი რაიონია - კომპორტა. შაბათს ან კვირას ესწრება დევიდის მატჩებს. მსოფლიოს 2018 წლის ჩემპიონატზე, მთელი ოჯახი პორტუგალიას გულშემატკივრობდა.

„ბევრი მეკითხება: „მართლა გინდა, რომ შენი ვაჟი წარმატებული ფეხბურთელი გახდეს, უფროსი ქალიშვილი - მოცეკვავე, როკო - მხატვარი?“ ყოველთვის ვპასუხობ: „არა“. მინდა, რომ ჩემი შვილები - მოსიყვარულე და პასუხისმგებლიანი ადამიანები დადგნენ, რომლებმაც იციან სხვების ნუგეში და ზრუნვა. სულ ეს არის, - ამბობს მადონა. - უბრალოდ მინდა, რომ ისინი კარგი ადამიანები იყვნენ, რომლებიც პატივისცემით ეპყრობიან სხვებს, მიუხედავად კანის ფერის, რელიგიისა და სქესისა“. ეს არის მთავარი. გესმით რას ვგულისხმობ? თუ რომელიმე მათგანი გახდება ახალი პიკასო ან კრიშტიანუ რონალდუ, ძალიან კარგი, მაგრამ ეს მხოლოდ ალუბალი იქნება ტორტის თავზე“.

2012
მკითხველის კომენტარები / 0 /
მსგავსი ამბები
რუბრიკის სხვა სიახლეები